Bókun Flokks fólksins undir liðnum: Fram fer kynning á minnisblaði um umferðaröryggi og aðgengi í Vogabyggð.
Flokkur fólksins lagði fram 2. október s.l. tillögu um að setja göngubrú yfir Sæbraut sem forgangsverkefni í ljósi hörmulegs banaslyss sem varð við Sæbraut fyrir skemmstu. Sú framkvæmd er að hefjast. Koma verður strax upp snjallstýrðum gangbrautarljósum sem lesa umferðarflæði, aðstæður og hreyfingar vegfarenda. Aðgerðir til lengri tíma snúa að Sæbraut í stokk því vitað var að að göngubrú yrði yfir Sæbraut milli Tranavogs og Snekkjuvogs, yrði hæðarlega erfið. Stokkur myndi tengja saman Vogabyggðina við Vogana vestan Sæbrautar, og gera göngubrúna óþarfa. Skóla- og frístundasvið Reykjavíkur heldur úti akstri skólabíls milli Vogabyggðar og Vogaskóla á virkum dögum, sem þó fullnægir ekki ferðaþörf allra nemanda í Vogabyggð, s.s. í tengslum við frístund. Sæbrautarstokkur mun bæta úr vandamálum en fram að þeim tíma ætti að nota snjallljósakerfi til að stýra umferðinni. Vogabyggð er orðin fjölmenn byggð og börnin í hverfinu þurfa daglega að fara yfir Sæbrautina til að sækja skóla, frístundir og fleira. Íbúar hafa lengi verið að kalla eftir úrbótum. Þetta er hættulegar aðstæður fyrir gangandi og hjólandi vegfarendur. Íbúar Vogabyggðar hafa þurft að takast á við ótta um öryggi barna sinna allt of lengi og gangandi vegfarendur eru í stöðugri hættu.
Bókun Flokks fólksins undir liðnum: Lagt er til að umhverfis- og skipulagsráð samþykki að afturkalla gjaldskyldu á eftirfarandi götum, þar til Háskóli Íslands hefur gjaldtöku á nærlægum svæðum:
Lögð er fram tillaga um að afturkalla gjaldskyldu á eftirfarandi götum, þar til Háskóli Íslands hefur gjaldtöku á nærlægum svæðum: • Aragata • Oddagata • Sæmundargata. Flokkur fólksins fagnar þessari afturköllun og vill láta ganga lengra og afturkalla gjaldskyldu í kringum alla skóla og sjúkrastofnanir. Gengið hefur verið of langt í að seilast í vasa þeirra sem verða og vilja nota bíl ekki síst meðan ljóst þykir að almenningssamgöngur eru langt því frá að vera viðunandi.
Bókun Flokks fólksins undir liðnum: Fram fer kynning á vinningstillögu að hugmyndaleit fyrir Leirtjörn Vestur og stöðu deiliskipulagsvinnu.
Fulltrúa Flokks fólksins líst vel á ef byggðin verður að stórum hluta fyrir eldra fólk með allri þeirri þjónustu sem eldra fólk þarfnast og langar að hafa nálægt sér. Fyrir liggja samningar um uppbyggingu lífsgæðakjarna, húsnæðisuppbyggingar fyrir eldri borgara með fjölbreyttu framboði af þjónustu í nærumhverfinu, meðal annars á þessu svæði. Ef lífsgæðakjarni verður þarna er ekki þörf á skólum og leikskólum. Gæta þarf einnig að samráði og fara snemma af stað í samtalið við nærliggjandi byggðar og þeim hugmyndir og möguleika sem eru um þróun þar. Bent er loks á að í nýjum hverfum er þörf á bílastæðum oft stórlega vanmetin og má nefna Þorpið í Gufunesi og mögulega mun skorta bílastæði í Keldnalandinu. Bílastæðahús inn í hverfum í stað bílastæða við heimilin og deilibílakerfi hefur ekki almennilega náð að virka hér enn sem komið er og þarf að horfa til þess þegar ný hverfi eru skipulögð. Hönnuðir þurfa að aðlaga sig að þörfum og óskum borgarbúa, þeirra sem þarna er ætlað að búa.
Bókun Flokks fólksins undir liðnum: Að lokinni kynningu er lögð fram að nýju skipulagslýsing umhverfis- og skipulagssviðs, dags. 29. maí 2024, vegna gerð deiliskipulags fyrir Borgarspítalareit.
Deiliskipuleggja á reitinn sunnan Borgarsjúkrahússins undir nýja íbúðabyggð og segir í gögnum að leggja eigi áherslu á fjölbreytta og spennandi byggð fyrir unga sem aldna. Fulltrúi Flokks fólksins vill sjá þarna fyrst og fremst kjarna fyrir eldri borgara enda nú þegar komin slík byggð sem reynst hefur vel. Þessi staðsetning hentar mjög vel fyrir íbúðabyggð fyrir eldra fólk sbr. það sem fyrir er á Sléttuvegi og nágrenni. Þarna gæti verið skemmtilegur lífsgæðakjarni fyrir eldri borgara. Öll svæði eiga vissulega að vera lífsgæðasvæði/-kjarnar. Flokkur fólksins lagði til árið 2021 að skipuleggja byggð fyrir eldra fólk víðsvegar í Reykjavík. Fjölmargir vilja einmitt að íbúðasvæði í borginni verði skipulögð þar sem sérstök áhersla er lögð á þjónustu við eldra fólk og þeirra þarfir. Þessi reitur sem hér um ræðir hentar vel þegar horft er til nærþjónustu og afþreyingarmöguleika.
Bókun Flokks fólksins undir liðnum: Lögð fram að nýju tillaga áheyrnarfulltrúa Flokks fólksins um hólma í ofanvatnstjörn norðan við Breiðholtsbraut, sbr. 31. liður fundargerðar umhverfis- og skipulagsráðs 25. september 2024. Einnig er lögð fram umsögn umhverfis- og skipulagssviðs, skrifstofu umhverfisgæða, dags. 9. október 2024.
Tillagan er felld með fimm atkvæðum fulltrúa Samfylkingar, Framsóknar, Pírata, Viðreisnar og Vinstri grænna.
Fulltrúi Flokks fólksins lagði til að hólmar yrðu gerðir í ofnavatnstjörn norðan við Breiðholtsbraut. Tillagan er felld sem er miður. Umsögn er neikvæð. Í henni segir: að ekki sé heppilegt að laða fuglalíf sérstaklega að svæðum sem eru hönnuð til þess að taka á móti mengun úr byggðu umhverfi og að hólmi minnki vatnið, Í ljósi ofangreinds er mælt með því að tillagan verði felld. Fulltrúi Flokks fólksins er ekki sáttur við þessi rök enda ekki góð rök. Ekkert er því til fyrirstöðu að stækka tjörn sem nemur því rúmmáli sem hólminn tekur og eru því rök um að hann dragi úr virkni settjarna haldlítil. Þetta er spurning um hönnun mannvirkja og líffræðilega hugsun, en ekki bara verkfræðilega. Margar fuglategundir synda ekki, svo sem allar spörfuglategundir, og munu því ekki ,,mengast” af vatninu, en í hólma finna þær frið fyrir t.d. köttum og geta alið upp unga. Það er ekki í þágu fuglalífs að halda því frá tjörnum. Þvert á móti. Skynsamlegt væri fyrir umhverfis- og skipulagsyfirvöld að endurskoða þessa umsögn sína og leita frekari ráðgjafar.
Áheyrnarfulltrúi Flokks fólksins leggur fram svohljóðandi fyrirspurn um endurbætur og mögulegt niðurrif leikskólans Laugasól. Spurt er um kostnað:
Fulltrúi Flokks fólksins óskar upplýsinga um hversu miklu fé hefur verið varið í endurbætur á húsnæði leikskólans Laugasól í Reykjavík?
Flokkur fólksins spyr einnig hvort ekki hafi verið hægt að sjá og meta burðarstyrk í jarðvegi og undirstöðum áður en ráðist var í framkvæmdirnar?
Greinargerð
Ekki er öll vitleysan eins en vandinn er bara að svona mál eru ekki ný af nálinni í borgarkerfinu. Dæmi eru um að offjár er eytt í endurgerð á ónýtum húsum.
Endurbætur sem hér um ræðir hófust í sumar. Til stóð að reisa viðbyggingu, stækka kjallara og fara í aðrar viðgerðir. Við nánari skoðun á byggingunni, jarðvegi og burði kemur í ljós að húsið er kannski ekki í því standi sem gert var ráð fyrir. Þetta er hús sem var byggt 1965. Það virðist vera að það sé ekki mikill burður í jarðveginum né heldur undirstöðunum. Hafa framkvæmdir því verið stöðvaðar á meðan beðið er eftir úttekt. Hvað skyldi vera búið að eyða miklum fjármunum í að gera við ónýtt hús og eitthvað kostar úttektin. Nærri 150 börn eru í leikskólanum. Framkvæmdirnar hafa þó ekki áhrif á öll börnin því hluti þeirra er í öðru húsnæði sem er á samtengdri lóð. Þá hefur leikskólinn fengið aðstöðu í bráðabirgðahúsnæði við Safamýri.