Bókun Flokks fólksins undir liðnum: Fram fer kynning á endurskoðun samgöngusáttmála höfuðborgarsvæðisins. Einnig er lögð fram sex mánaða skýrsla Betri samgangna dags. í júní 2024.
Fulltrúi Flokks fólksins fagnar uppfærslu samgöngusáttmálans sem nú stendur í 310 milljörðum og hafa áætlanir tvöfaldast. Því er fagnað að nú á að taka almenningssamgöngur inn í jöfnuna. Horft er á samgöngur í meiri heild en áður. Í dag ríkir ófremdarástand í umferðarmálum borgarinnar og er það nú meira viðurkennt en áður. Síðasti meirihluti borgarstjórnar vanrækti að taka á umferðarvanda borgarinnar sem fer versnandi með hverjum degi. Bílum fjölgar og ekki er hægt að hunsa lengur kraðak í umferðarmálum sem m.a. má rekja til úreltrar ljósastýringar. Flokkur fólksins hefur ítrekað lagt til að farið verði í að snjallvæða umferðarljósakerfið á þeim stöðum sem mest á mæðir. Nýlega lagði Flokkur fólksins t.d. fram tillögu um að snjallljós með innrauðum búnaði (nemum) sem lesa umferðina og aðstæður, taka myndir og greina lifandi verur, verði settir upp við Höfðabakka en þessi ljós hafa nú þegar verið keypt og eru komin til landsins. Mikilvægt er að ljósin verði sett upp fyrir haustið til að auka afkastagetu umferðarflæðis. Miklabraut er löngu sprungin og þar eru ljósastýringar í miklum ólestri á annatímum. Einnig er lagt til að snjallljósum af nýjustu gerð verði komið upp á helstu umferðargötum borgarinnar til að auka umferðaröryggi.
Bókun Flokks fólksins undir liðnum: Lagt er til að borgarráð samþykki að fela Innri endurskoðun og ráðgjöf Reykjavíkurborgar að ráðast í heildarúttekt á ferlinu í kringum byggingu leikskólans Brákaborgar í ljósi mögulegra hönnunar- og/eða framkvæmdagalla. Í því felst heildarúttekt á hönnun, framkvæmdum og eftirliti við framkvæmdir leikskólans. Einnig er óskað eftir því að Innri endurskoðun og ráðgjöf geri tillögur að umbótum í tengslum við ferlið.
Mál Brákarborgar er hneyksli og ber vott um dómgreindarleysi fólks sem gefur sig út fyrir að vera sérfræðingar á sviðinu. Nú vill meirihlutinn að Innri endurskoðun og ráðgjöf rannsaki málið en Flokkur fólksins telur að finna þurfi aðila ótengdan borgarkerfinu til að kryfja þetta mál ef finna á út hver ber ábyrgðina. Meirihlutinn, ekki síst sá síðasti, hefur verið gapandi yfir ótrúlegustu hlutum og látið plata sig upp úr skónum. Hver man ekki eftir verkinu Pálmatré eða dönsku stráunum? Það eru eiginlega engin takmörk fyrir hvað valdhafar borgarinnar hafa látið temja sig út í mikla vitleysu á kostnað borgarbúa. Hinn 30. júlí skrifaði oddviti Flokks fólksins grein um Brákarborg og torfþakið sem bar titilinn „Torfþakið varð að mýri“. Auðvitað reikna allir með að skipulags-, hönnunar- og arkitektasviðið viti t.d. að vatn er þungt. Losna þarf fljótt við það vatn ef það er á flötu þaki. Vatnið þarf að færast frá miðju þaksins út í rennur sem tekur óratíma. Því má segja að með torfþakinu á Brákarborg hafi verið mynduð mýri. Torfþök fyrr á öldum voru algeng en þau voru brött. Þá skildu menn að vatnið þurfti að renna fljótt á brott. Hefur þessi þekking glatast meðal hönnuða?
Bókun Flokks fólksins undir liðnum: Lagt fram bréf umhverfis- og skipulagssviðs, dags. 21. ágúst 2024, sbr. samþykkt umhverfis- og skipulagsráðs frá 21. ágúst 2024, á úthlutun styrkja úr loftslagssjóði ungs fólks:
Fulltrúi Flokks fólksins fagnar þessum umsóknum sem eru merki um áhuga ungs fólks á loftslagsmálum. Styrkumsóknir eru mismunandi eins og gengur. Votlendi er ein stærsta uppspretta losunar gróðurhúsalofttegunda á Íslandi. Vandasamt er að endurheimta votlendið og eru því allar hugmyndir vel þegnar. Endurheimt votlendis skiptir miklu máli en Reykjavík er ekki á votlendissvæði, ekki síst því að mýrar sem voru í Reykjavík hafa að mestu verið þurrkaðar upp og vandasamt er að endurheimta þær, svo sem Kringlumýri og Laugarmýri. Þá hefur meirihlutinn hafnað því að auka skógrækt með kolefnisbindingu í huga.
Bókun Flokks fólksins undir liðnum: Lagt er til að borgarráð samþykki hjálagða tillögu Samtaka sveitarfélaga á höfuðborgarsvæðinu, dags. 16. ágúst 2024, um að ljúka máli gagnvart ESA er varðar ríkisstyrk í formi tekjuskattsundanþágu. Tillagan felur í sér að efnahagsleg starfsemi SORPU bs. verði flutt í félag eða eftir atvikum félög með takmarkaðri ábyrgð.
Svo virðist vera að þeir þættir í rekstrarfyrirkomulagi SORPU sem þarf að breyta muni leiða til þess að þau muni þurfa að afla meiri tekna. Útgjöldin munu aukast við það að skattaafsláttur fellur niður. Ólíklegt er t.d að molta verði gefin í framtíðinni og einhver gjöld verða sett á þá sem úrgangi henda.
Bókun: Lagt fram bréf velferðarsviðs, dags. 6. júní 2024, sbr. samþykkt velferðarráðs frá 5. júní 2024 á hækkun tekjumarka í reglum Reykjavíkurborgar um sérstakan húsnæðisstuðning. Einnig er lögð fram umsögn fjármála- og áhættustýringarsviðs, dags. 24. júní 2024.
Á þessu ári er gert ráð fyrir því að borgin greiði um 1,7 milljarð í sérstakan húsnæðisstuðning. Frá árinu 2022 til ársins 2024 er áætlað að kostnaður vegna sérstaks húsnæðisstuðnings verði um 4,6 milljarðar.
Bókun Flokks fólksins undir liðnum: Lögð fram fundargerð íbúaráðs Laugardals frá 29. maí 2024. Áheyrnarfulltrúi Flokks fólksins leggur fram svohljóðandi bókun undir 1. lið fundargerðarinnar:
Þær sviptingar sem urðu frá sviðsmynd 1 sem eftir miklar bollaleggingar og rannsóknarvinnu var valin af íbúum Laugardals yfir í sviðsmynd 4 (afbrigði af sviðsmynd 3) sem mikill meirihluti hafði hafnað flokkast ekki undir neitt nema vanvirðingu gagnvart heilu hverfi enda voru viðbrögð samkvæmt því. Tekið er undir bókun foreldrafélagsins þar sem segir „stjórnsýsla borgarinnar er átalin og virðingarleysi borgaryfirvalda gagnvart íbúalýðræði. Skóla- og frístundaráð og fulltrúar meirihlutans í borgarstjórn hyggjast nú ganga gegn öllu samráði sem m.a. byggði á endurteknum umsögnum sem unnar voru m.a. af skólastjórnendum, starfsmönnum og börnum í Laugardal. Til stuðnings breyttri afstöðu hefur borgaryfirvöldum mistekist hrapallega að sýna fram á breyttar forsendur og sundurlaus rök um erfiðar framkvæmdir og rask sannfæra engan.“ Flokkur fólksins gerir þá kröfu að tillaga um sviðsmynd 1 sem valin var af íbúum Laugardals og samþykkt var í borgarráði 2022 verði fylgt. Þetta eru gróf samráðssvik. Sviðsmynd 1 hefur aldrei verið könnuð til hlítar. Tilkoma Þjóðarhallar eru ekki rök fyrir því að ekki sé hægt að fylgja sviðsmynd 1 enda hefur lengi verið vitað að Þjóðarhöll muni rísa á þessum stað. Íbúar Laugardals og Flokkur fólksins hafna því að skólahverfinu verði umbylt með vanhugsuðum breytingum sem virðast bera keim af tækifæriskenndum lausnum.
Ný mál
Fyrirspurn um hvað margir starfsmenn Reykjavíkurborgar fara út á meðal ungmenna þar sem þau hópast saman eftir skóla?
Fulltrúi Flokks fólksins spyr hvað margir starfsmenn Reykjavíkurborgar fara út á meðal ungmenna þar sem þau hópast saman eftir skóla?
Greinargerð
Áhættuhegðun virðist fara vaxandi, miðað við tilkynningar sem berast barnaverndum landsins. Samkvæmt nýlegum tölulegum gögnum hjá Barna-og fjölskyldustofu hefur orðið 30 prósenta aukning á áhættuhegðun ungmenna á fyrstu þremur mánuðum ársins 2024 ef borið er saman við 2023. Tilkynningum hefur fjölgað í öllum flokkum áhættuhegðunar og meira af tilkynningum vegna þess að barn stefnir eigin heilsu og þroska í hættu, beiti ofbeldi og sé í afbrotum. Í fyrsta sinn eru fleiri tilkynningar um vímuefnanotkun stúlkna en drengja. Fulltrúa Flokks fólksins finnst þetta uggvænleg þróun sem þarf að fylgjast vel með og skoða hvaða þróun á sér stað í hegðun ungmenna. Starfsmenn sem fylgjast með hópamyndunum unglinga gætu verið lykilmenn í að grípa ungmenni í viðkvæmri stöðu sem eru líkleg til að leiðast út í áhættuhegðun. Vitað er að ungmenni í viðkvæmri stöðu eru líklegri til að verða fórnarlömb glæpagengja. Við höfum fylgst með ískyggilegri þróun á norðurlöndum þar sem glæpagengi fá ungmenni til liðs við sig. Við verðum að forðast með öllum ráðum að slíkt gerist hér á landi.
Fyrirspurn um hundaheimsóknir í skóla
Fulltrúi Flokks fólksins spyr hvað margir skólar í Reykjavík bjóða hunda velkomna í skólana til að veita nemendum stuðning og vellíðan?
Greinargerð
Nú er komið fordæmi fyrir að sérþjálfaðir hundar gangi í skóla til að styðja börn og veita þeim vellíðan. Fulltrúi Flokks fólksins telur að þetta sé til fyrirmyndar enda vita allir hvað nærvera hunda og margra annarra gæludýra er nærandi og slakandi. Ekki er endilega þörf á að hundur í þessu hlutverki sé sérþjálfaður heldur eru allir þeir hundar sem eru barngóðir og barnvænir færir um að fara í heimsóknir í skóla að mati Flokks fólksins. Sjálfsagt er að setja einhvern grófan ramma í kringum heimsóknir hunda í skóla en í sjálfu sér er þetta ákvörðun skólayfirvalda í hverju skóla fyrir sig. Heilbrigðiseftirlitið hefur verið þrándur í götu þegar kemur að því að hleypa gæludýrum inn í skólana. Reglur sem nú gilda í því sambandi eru aftur úr fornöld og hefur Heilbrigðiseftirlitið lítið gert til að kalla eftir breytingum á þeim. Því meira sem börn umgangast hunda því óhræddari verða þau við þá, séu þau skelfd við dýrin fyrir. Einnig er nú staðfest að lausn á ofnæmi, kunni það að vera vandamálið, er ekki alfarið að finna með því að forðast ofnæmisvaldinn. En um það geta læknar betur tjáð sig en borgarfulltrúi Flokks fólksins sem ekki er læknismenntaður.
Tillaga um að rýmka aftur opnunartíma sjósundbaða.
Fulltrúi Flokks fólksins leggur til að opnunartímar í sjósundsaðstöðunni í Nauthólsvík verði áfram opnir á sunnudögum og mánudögum. Mikil aðsókn er í böðin. Sjósund er stór og mikilvægur liður í lífi fjölmargra enda hefur fjöldi manns fundið verulegan mun á andlegri og líkamlegri líðan við að stunda sjósund. Um er að ræða smáaur í stóra samhenginu. Flokkur fólksins hefur ítrekað mótmælt skerðingum á opnunartíma mikilvægrar þjónustu eins og í sundlaugum og bókasöfnum og mótmælir nú skerðingu á opnunartíma í sjósundböð.
Fyrirspurnir um stöðuna á Loftkastalamálinu
Fulltrúi Flokks fólksins spyr hver staðan er á máli Loftkastalans, lóðirnar Gufunesvegur 34. Þengilsbás 1 sem skipt var í tvennt en borgarfulltrúar fá reglulega skeyti frá hagaðilum þar sem fram kemur ýmist að upplýsingum sé haldið frá eigendum eða staðfestar leiðréttingar sem þeim hefur verið lofað að verði gerðar eru hunsaðar. Lögfræðingar skipulags hafa staðfest í tölvupósti sem fulltrúi Flokks fólksins hefur séð að þeir ætli ekki að afhenda þau gögn sem gefa upp hver beri ábyrgð á röngum mælingum í Gufunesi.
Er búið að kanna stjórnsýslu Loftkastalamálsins ofan í kjölinn t.d. hlut borgarlögmanns en staðfest hefur verið að borgarstjóri óskaði eftir að hann kafaði ofan í stjórnsýslu málsins frá upphafi þess og taki þá að sjálfsögðu mið af þeim ábendingum sem hafa komið frá forsvarsmönnum Loftkastalans?
Spurt er hvort öll gögn í Loftkastalamálinu séu upp á borði og aðgengileg borgarfulltrúum og er hér með vísað m.a. til gagna sem sýna útfærslu á deiliskipulagi sem ber að gera skv. skipulagsreglugerð, afstöðu gatna og jarðvegs við gólfhæð 1. hæðar húsa, hæð landslags á lóðum og fleira?
Greinargerð
Alvarleg mistök voru gerð þegar Reykjavíkurborg hunsaði að fylgja skilyrðum framkvæmdaleyfis og hafði ekki samráð um sveigjanleika með m.a. aðkomu og innkeyrslur í útgefnu framkvæmdaleyfi fyrir gatnagerð og fl. í Gufunesi. Gefið var út framkvæmdaleyfi fyrir gatnagerð í Gufunesi sem ekki fellur að þeim húsum sem fyrir eru í Gufunesi og sem hindrar nýtingu húsa Loftkastalans þrátt fyrir að annað hafi verið haldið fram í bréfum frá Reykjavíkurborg til Úrskurðarnefndar umhverfis og auðlindamála. Vandinn snýr að því að ekki er búið að tryggja aðkomur og innkeyrslurétt að Gufunesvegi 34. Reykjavíkurborg fór í landslagsbreytingar gegn hagsmunum lóðarhafa og húseiganda sem gerir það að verkum að gólf núverandi húsa eru komin niðurfyrir jarðveg sem skapar hættu á vatnstjónum.
Málið hefur dregið dilk á eftir sér og sú hola sem meirihlutinn, sá síðasti og núverandi ásamt skipulagsyfirvöldum gróf sér hefur gert fátt annað en að dýpka. Mikið hefur borið af leið. Nú situr borgarbúi uppi með skertar eignir vegna samskipta- og samráðsleysis, með þessu hefur Reykjavíkurborg komið í veg fyrir uppbyggingu 23 íbúða og valdið skerðingu á rekstri 2ja fyrirtækja í 5 ár. Fulltrúi Flokks fólksins óskaði upplýsinga um málið í febrúar 2022 og var staðan þá orðin óásættanleg. Óskað er eftir upplýsingum um stöðu mála nú og hvað Reykjavíkurborg hefur gert eða boðið eigendum til að ljúka málinu. Það er ekki hagur neins að það mál sem hér um ræðir verði eilífðarmál. Flokkur fólksins kallar eftir lúkningu og að eigendum verði bættur upp sá skaði sem Reykjavíkurborg hefur valdið þeim með sanngjörnum hætti.
Málið er orðið margslungið og ekkert lát hefur verið á valdníðslu borgarinnar gagnvart eigendum Loftkastalans. Síðasta tilraun eigenda Loftkastalans árið 2022 til að ná einhverri lendingu í þessu máli, þar sem málið var þæft fram og til baka milli starfsmann Reykjavíkurborgar og útkoman var einhver lækkun á götum en allt látið halla að húsum Loftkastalans en á milli húsanna var leiðbeinandi hæð 20 cm hærri en gólf núverandi húsa. Þrátt fyrir ákall eigenda um að fá heildar lausn á málið þá var vilji borgarinnar enginn. Tillaga að lækkun í kringum hús Loftkastalans barst 18 nóvember 2022 3 dögum eftir að 1 gjalddagi af byggingaréttargjöldum var sem eigendur neita að greiða á meðan varna er ónothæf, staðan í dag er sú að Reykjavíkurborg getur aldrei afhent óskerta vöru nema með miklum lagfæringum. Á eigendum hefur Reykjavíkurborg brotið í 5 ára og látið sem það sé verið að vinna í málinu. Það er kominn tími til þótt fyrr hefur verið að Reykjavíkurborg sjái sóma sinn í að viðurkenna mistök sín í þessu máli og ná lendingu við eigendur sem þeir geta sætt sig við eftir 5 ára þrautargöngu.