Á dagskrá þingfundar í dag er mikilvægt frumvarp sem snýr að breytingum á lögum um sorgarleyfi. Félags- og húsnæðismálaráðherra hefur lagt fram frumvarpið í þeim tilgangi að bæta aðstæður fjölskyldna sem lenda í þeim erfiðu aðstæðum að missa ástvin. Við gerð frumvarpsins var m.a. byggt á tillögum frá Gleym mér ei – styrktarfélagi og Sorgarmiðstöðinni.
Markmið frumvarpsins er að veita fjölskyldum sem glíma við missi ástvinar nauðsynlegan stuðning og svigrúm til að vinna úr sorginni.
Samkvæmt frumvarpinu á foreldri sem missir maka sinn rétt á allt að sex mánaða sorgarleyfi eða sorgarstyrk, en hingað til hefur það aðeins átt við um missi barns, andvanafæðingu eða fósturlát.
Þessi breyting er talin sérstaklega mikilvæg þar sem hún viðurkennir að missir maka getur haft veruleg áhrif á fjölskyldulíf og getu foreldris til að sinna börnum sínum og vinnu.
Sorg og sorgarferli
Sorg er ekki eitthvað sem hægt er að reka á eftir, drífa af. Fólk fer í gegnum þetta ferli á eigin forsendum. Fyrstu daga og vikur eftir missir er algengt að sorgin taki alfarið yfir, svo mikið að sá eða sú sem syrgir er ófær um að taka ákvarðanir og gera áætlanir. Í sorgarferli getur verið ótrúlega erfitt að gera einföldustu hluti.
Tíminn er sagður lækna öll sár, hann gerir það ekki en sannarlega mildar tíminn sársaukann. Þess vegna skiptir svo miklu máli að fyrst eftir missi að fólk sem syrgir fái næði og tíma til að vera í sorginni á sínum forsendum.
Samfélagið þarf að standa að baki einstaklingum sem glíma við sorg og missi. Það er sýnt með því að leggja fram þetta frumvarp. Nú erum við, samfélagið eins og vinurinn góði sem sýnir skilning, þolinmæði og vitum að það er engin ein rétt leið við að syrgja. Það getur tekið fólk mislangan tíma og hver gerir það á sinn hátt. Samfélaginu stendur ekki á sama um þegna samfélagsins þegar á reynir
Makamissir
Með því að veita foreldri sem missir maka rétt til töku sorgarleyfis er verið að gefa því tækifæri til að vinna úr sorginni og aðlagast breyttum aðstæðum.
Þessi réttur er ekki síður mikilvægur fyrir barn sem missir foreldri sitt. Barnið gengur í gegnum sorg og þarf tíma til að vinna úr þeirri sorg, þá er samvera með foreldri mjög mikilvæg á þessum erfiðu tímum.
Auk þess að setja í lög ákvæði um sorgarleyfi vegna makamissis eru einnig í frumvarpinu tillögur um lengingu sorgarleyfis vegna fósturláts og andvanafæðingar.
Þessar breytingar snerta aðallega foreldra og börn þeirra og ættu að stuðla að meira jafnrétti á vinnumarkaði óháð efnahag og kyni. Það er mikilvægt að vinnumarkaðurinn sé sveigjanlegur og taki tillit til fjölskylduaðstæðna, sérstaklega þegar fjölskyldur ganga í gegnum erfiða tíma eins og missi ástvinar. Sumir vinnustaðir eru einstakir hvað þetta varðar en aðrir sýna minni skilning.
Þetta frumvarp er afar mikilvægt skref til. Með þessu frumvarpi er samkennd og manneskjulegheit í fyrirrúmi. Allir geta lent í þessum sporum, andlát gera oft ekki nein boð á undna sér.