Bókun Flokks fólksins undir liðnum: Ársreikningur Reykjavíkurborgar fyrir árið 2022, sbr. 1. lið fundargerðar borgarstjórnar frá 2. maí 2023 – síðari umræða:
Fjárhagsstaða Reykjavíkurborgar er það slæm að í raun þarf mun meira að koma til en aðgerðir núverandi meirihluta.. Það virðist vera sem meirihlutinn skilji ekki vandann til fulls og hefur þess vegna ekki burði til að bregðast við sem skyldi. Rekstur A-hluta borgarinnar stefnir í enn meira óefni innan nokkurra ára ef ekkert af viti verður að gert. Í ofanálag kom í ljós milli umræðna að skekkja er í reikningnum. Við endurskoðun reyndust verðbætur í sjóðstreymi oftaldar um 2.492 m.kr. og lántaka vantalin um sömu fjárhæð. Meirihlutinn segir að þetta hafi engin áhrif. Ekki er það trúverðugt.
Alveg ljóst er orðið að núverandi meirihluti hefur ekki það sem þarf til þess að leysa úr þeim fjárhagsvanda sem fulltrúar hans sjálfs hafa komið borginni í með óráðsíu undanfarinna ára. Sú óráðsía heldur áfram athugasemdarlaust, samanber glórulausan fjáraustur meirihlutans á milljörðum í stefnulausa tilraunaleiki þjónustu og nýsköpunarsviðs.
Þegar svona er komið og rekstraraðilar sýna ekki meiri skilning á vandamálinu en raun ber vitni, er besta lausnin að kalla eftir aðkomu eftirlitsaðila með sérþekkingu á hallarekstri sveitarfélags af þessari stærðargráðu. Þessi meirihluti mætti stíga til hliðar og sýna þannig ákveðna auðmýkt.
Bókun Flokks fólksins undir liðnum: Fundargerðir:
Bókun við lið 4. í fundargerð stafræns ráðs frá 26. apríl 2023
Þrátt fyrir að búið sé að úthluta milljörðum í þjónustu og nýsköpunarsvið og margar gagnadeildir orðið til, hafa fullkláraðar lausnir ekki skilað sér í samræmi við það. Nýjustu glærukynningar sviðsins í stafrænu ráði, snúast um allskyns gagnavinnslu. Þarna er ekki mikið verið að kynna langt komnar lausnir um gagnamál, heldur eru hér mestmegnis á ferðinni einhverskonar vangaveltur um gögn almennt. Þessi auglýsingamennska sviðsins á almennum fyrirbærum stafrænna umbreytinga virðist því oft þjóna þeim tilgangi að reyna sanna að sviðið sé markvisst að gera eitthvað þrátt fyrir að tilbúnar lausnir hafi skilað sér bæði seint og illa.
Eitt dæmi af mörgum um skilningsskort sviðsins á forgangsröðun stafrænna lausna kemur fram í kynningu lið 4. um hagnýtingu gagna. Þar sést að miklum tíma og fjármunum hefur verið eytt í allskyns mælaborð og flóknar upplýsingar um sorphirðu. Einnig kemur fram að nú ætlar sviðið að leggjast í miklar notendarannsóknir til að komast að því hvaða ,,gagnasögur” borgarbúar eru mest spenntir að fá birtar á vef Reykjavíkurborgar.
Á sama tíma þurfa foreldrar leikskólabarna enn að handskrifa sjö pappírs blaðsíður til þess að klára umsókn fyrir hvert barn í leikskóla. Þangað er stafræn vegferð komin.