Umræða um vaxandi fátækt og ójöfnuð í Reykjavík (að beiðni borgarfulltrúa Flokks fólksins)
Greinargerð
Flokkur fólksins var stofnaður til að að berjast gegn fátækt. Það er bláköld staðreynd að fátækt og ójöfnuður hefur aukist í Reykjavík á vakt þessa og síðasta meirihluta. Erfiðara er að ná endum saman. Færri áttu fyrir jólunum nú en áður. Þetta kemur fram í nýjum Þjóðarpúlsi Gallup. Þau tekjuminnstu eru líklegust til að ná ekki endum saman fjárhagslega og hlutfall þeirra hefur ekki verið jafn hátt í sjö ár. Um þriðjungur þekkir fátækt af eigin raun eða í sínu nærumhverfi. Leigjendur eru í hópi þeirra verst settu. Fátækt bitnar mest á börnum og viðkvæmum hópum. Þó við sjáum ekki börn betlandi á götuhornum fyrir mat er talið að mörg þúsund börn í Reykjavík búi við fátækt og bætist hratt í hópinn. Aðeins brot af þeim fjölskyldum sem búa í fátækt eru á fjárhagsaðstoð. Árlegar skýrslur Barnaheilla lýsa vaxandi fátækt og ójöfnuði. Þessar skýrslur eru jafnan kolsvartar.
Bókun Flokks fólksins við umræðu um fátækt:
Flokkur fólksins var stofnaður til að að berjast gegn fátækt. Það er bláköld staðreynd að fátækt og ójöfnuður hefur aukist í Reykjavík á vakt þessa og síðasta meirihluta. Erfiðara er að ná endum saman og eru leigjendur í hópi þeirra verst settu. Færri áttu fyrir jólunum nú en áður. Þetta kemur fram í nýjum Þjóðarpúlsi Gallup. Fátækt bitnar mest á börnum og viðkvæmum hópum. Þó við sjáum ekki börn betlandi á götuhornum fyrir mat er talið að mörg þúsund börn í Reykjavík búi við fátækt og bætist hratt í hópinn. Aðeins brot af þeim fjölskyldum sem búa í fátækt eru á fjárhagsaðstoð. Farið er fram á að meirihlutinn í borgarstjórn kynni aðgerðir til að spyrna megi fótum við þessari neikvæðu þróun á lífskjörum stækkandi hóps. Flokkur fólksins skorar á meirihlutann og nýjan borgarstjóra að marka skýrari stefnu og gera raunhæfa áætlun um að uppræta fátækt í Reykjavík. Ganga þarf í þetta verkefni af meiri skörungsskap en gert hefur verið fram til þessa. Fátækt er brot á mannréttindum barna. Fátækt rænir börn tækifærum, vonum og draumum. Fátækt mismunar börnum um lífsins gæði, heilsu og menntun. Barn sem elst upp við fátækt er jafnframt líklegra að búa við fátækt sem fullorðinn einstaklingur.
Bókun Flokks fólksins undir liðnum. Fram fer umræða um þjóðarhöll:
Flokkur fólksins styður að byggð verði þjóðarhöll enda er þörf á slíku mannvirki. Ekki er þó fram hjá því litið að áhyggjur eru af nýtingu þjóðarhallar og Laugardalshallar í framtíðinni. Ekki hefur verið sýnt fram á að aðstöðumál Þróttar og Ármanns verði leyst farsællega sem og íþróttaaðstöðumál grunnskólanna í Laugardal. Liðin og skólarnir hafa ekki aðstöðu sem hægt er að ganga að vísri heldur eru þau víkjandi notendur húsanna sem er óásættanlegt fyrir samfélagið í Laugardal. Fulltrúa Flokks fólksins finnst mikilvægt að foreldrar og börn fái rödd í þessu máli. Það mun verða þeim mikið áfall ef sérsambönd og útleiga verða í forgangi í aðstöðunni en börnin í Laugardal sett aftar og jafnvel aftast í forgangsröðuninni. Búið er að lofa ítrekað að aðstaðan fyrir íþróttafélög og skólana í Laugardal verði færð í ásættanlegt horf til framtíðar. Íþróttafélögin og foreldrar hafa aðeins fengið stutt samtal við undirnefnd framkvæmdanefndarinnar (líklega kölluð ráðgjafanefnd í svarinu). Forsvarsfólk íþróttafélaganna virðist vera úti í kuldanum í þessari vinnu þótt öðru sé haldið fram. Kalla þarf fram viðhorf íbúa, foreldra og barnanna í Laugardal áður en lengra er haldið í skipulagningu á notkun hallarinnar. Íbúaráð Laugardals hefur bókað um áhyggjur sínar.
Bókun Flokks fólksins undir liðnum. Lögð fram svohljóðandi tillaga borgarfulltrúa Sjálfstæðisflokksins:
Sú tillaga sem hér er lögð fram er í takt við tillögu Flokks fólksins sem lögð hefur verið fram í tvígang. Flokkur fólksins lagði til að boðin yrði út sorphirða í einu póstnúmeri innan Reykjavíkur ásamt því að kanna hagkvæmni á útboði vegna þjónustu við djúpgáma. Sjálfsagt væri að byrja aðeins á einu póstnúmer til að sjá hvernig útkoman er, kosti og ókosti þess að verkið sé í höndum annarra en hins opinbera. Öll sveitarfélög önnur en Reykjavík bjóða út sorphirðu og hefur það reynst vel. Gjaldskrár sorphirðu í Reykjavík eru langhæstar. Gjaldskrár eru t.d. 45% hærri í Reykjavík en Kópavogi. Það er ekki ásættanlegt. Ekki hefur verið kannað hvort hagkvæmara er að bjóða út einstök verk eða verkefni eins og flest önnur sveitarfélög hafa gert. Þetta gagnrýnir fulltrúi Flokks fólksins. Það er skylda sveitarfélags að fara vel með fjármagn, útsvar borgarbúa, og finna ávallt hagkvæmustu leiðirnar.
Bókun Flokks fólksins undir liðnum: Lögð fram svohljóðandi tillaga borgarfulltrúa Sósíalistaflokks Íslands:
Sú tillaga sem hér er lögð fram af Sósíalistaflokki Íslands snýst um að vinna gegn útvistun starfa. Flokkur fólksins telur að útvistun sé ekki góður kostur þegar kemur að beinni þjónustu við fólkið. Sum störf hentar að bjóða út en önnur ekki og sérstaklega þarf að skoða hvort útvistun sé góður kostur þegar um er að ræða þjónustu við viðkvæma hópa. Nefna á í þessu sambandi rekstur Strætó. Ekki er víst að útboðsleiðin henti þeirri tegund þjónustu. Hætta er á að þjónusta versni. Skerðingar á þjónustu Strætó gætu orðið enn meiri væri reksturinn boðinn út. Ef horft er til reynslu er hætta á lækkun launa og að einkaaðilar hirði þann launamun í sinn vasa. Einnig hefur reynslan sýnt í alltof mörgum tilfellum að þjónustan verði dýrari en ekki betri fyrir vikið. Ef reksturinn verður boðinn út er útilokað að borgin hafi þann kost að hafa frítt í strætó eins og talað hefur verið um að skoða. Vísað er til slæmrar reynslu af útvistun almenningssamgangna í Bretlandi og Svíþjóð. Enginn býður í rekstur nema hann eða hún ætli að græða á honum. Á hinn bóginn gæti sorphirða verðið þjónusta sem hentar vel til útboðs. Hvort útvista eigi verkefnum eða störfum hlýtur ávallt að þurfa að meta hverju sinni og horfa þá á hagkvæmni og hvers lags þjónustu um er að ræða, lögbundna eða aðra.
Bókun Flokks fólksins undir liðnum: Lögð fram fundargerð borgarráðs frá 11. janúar: Borgarfulltrúi Flokks fólksins leggur fram svohljóðandi bókun undir 21. og 28. lið fundargerðarinnar:
- liður: Eftirlitsnefnd með fjármálum sveitarfélaga hefur aftur séð þörf á að senda borgarráði brýningu og viðvörun. Í bréfinu eru talin upp þrjú atriði í fjármálum A-hluta á árinu 2022 þar sem staðan er metin óásættanleg. Framlegð; veltufé frá rekstri og rekstrarniðurstaða er allt neikvætt. Reksturinn skilar minna en engu fjármagni til að greiða afborgarnir lána og standa undir fjárfestingum. Með slíkum rekstri er ekki hægt að halda uppi þjónustu sem gjaldendur næstu áratuga munu þurfa að greiða.
28. liður: Skýrsla innri endurskoðunar um umfang vinnu vegna stafrænna kennslulausna í skólastarfi er lögð fram. Stafræn mál skóla- og frístundasviðs eru í ólestri. Í ljósi þess að um 20 milljarðar hefur farið til þjónustu- og nýsköpunarsviðs á fáum árum er alvarlegt að svið eins og skóla- og frístundasvið skuli hafa verið skilið eftir út í kuldanum. Í minnisblaði frá sviðsstjóra skóla- og frístundasviðs segir að þjónustu- og nýsköpunarsvið beri á þessu ábyrgð enda upplýsingatækni og gagnastjórnun ásamt tæknilegum umbótum og þjónustu á því sviði. Sama tón má lesa úr bréfi frá Sambandi íslenskra sveitarfélaga sem er á þá leið að borgin sé einangruð í stafrænni vegferð sinni og að önnur sveitarfélög og Reykjavík nái ekki að vinna nógu skilvirkt saman.
Bókun Flokks fólksins undir liðnum: Lagðar fram fundargerðir. Borgarfulltrúi Flokks fólksins leggur fram svohljóðandi bókun undir 8. lið fundargerðar skóla- og frístundaráðs frá 8. janúar:
Fulltrúi Flokks fólksins óskar upplýsinga um hvernig skóla- og frístundasvið ætlar að bregðast við nýjustu niðurstöðum PISA. Í svari kemur að mestu það sama fram og heyrst hefur árum saman frá skóla og frístundasviði: „Fá fólk til að greina og meta og koma með tillögur til framtíðar“. Þetta svar segir nákvæmlega ekki neitt. Það er upplifun Flokks fólksins að skóla- og frístundasvið sé ekki að taka þessi mál alvarlega. Allt of mikið kraðak hefur ríkt í þessum málum árum saman. Vissulega þarf að rýna en ekki láta síðan þar við sitja. Vandinn er margþættur en á rætur að rekja til þess að það skortir miðlæga stýringu og samræmt mat á lestrarkennslu. Þessi mál eru stefnulaus, þau skortir pólitíska ákvörðun sem leiðir til þess að hver og einn skóli er að reyna að fóta sig sem best hann getur með því að gera sitt lítið af hverju, hljóðaaðferð að hluta og byrjendalæsi að hluta sem ekki er gagnreynd aðferð. Fulltrúi Flokks fólksins hefur ítrekað lagt til að innleiða Kveikjum neistann sem er eina heildstæða rannsóknarverkefnið í gangi í dag sem skilað hefur marktækum árangri. Það sætti því undrun þegar fram kom í svari frá skóla- og frístundasviði að enginn skóli í Reykjavík hafi sýnt verkefninu áhuga.