Undir liðnum Störf þingsins
Töluvert hefur verið rætt um Háholt í Skagafirði síðustu vikur og mánuði og möguleika á að opna þar aftur meðferðarheimili en slíkri starfsemi var hætt þar árið 2017. Ástæða lokunarinnar var lítil eftirspurn eftir vistun. Í því sambandi var m.a. vísað til þess að meiri áhersla væri lögð á svo kallaða fjölkerfameðferð (MST) í starfi Barnaverndarstofu og samhliða því hefði dregið úr þörf á stofnanameðferð.
Nú hefur eignin í tvígang verið í söluferli. Sumir hafa spurt hvort ekki ætti að skoða að ríkið keypti eignina og nýtti hana sem meðferðarheimili fyrir börn með fjölþættan vanda og þar með endurvekja starfsemina.
Fyrrverandi og núverandi barnamálaráðherra hefur sagt ítrekað að það standi ekki til. Fjölmörg gild rök eru fyrir þeirri ákvörðun.
Almennt hefur verið lögð á það áhersla að mæta þörfum barna fyrir stuðning og þjónustu í nærumhverfi þeirra. Þessi áhersla endurspeglast einnig í lögum. Börn með fjölþættan vanda, sem þurfa á sérhæfðri meðferð að halda utan heimilis, eru flest búsett á suðvesturhorninu. Það á einnig við um þá sem sinna þeirri sérhæfðu og fjölþættu þjónustu sem börnin hafa þörf fyrir og eiga rétt á lögum samkvæmt.
Að reka meðferðarheimili í Háholti yrði ekki aðeins kostnaðarsamt heldur einnig erfitt börnunum sem þar yrðu vistuð, foreldrum þeirra og sérfræðingum sem standa að meðferð og ráðgjöf til barnanna og fagfólki sem sinnir handleiðslu og eftirliti með starfseminni.
Með hliðsjón af framangreindu hefur komið fram að það sé mat ráðherra og sérfræðinga þessa málaflokks að ekki séu forsendur til að hefja rekstur á meðferðarheimili fyrir börn í Háholti í Skagafirði.
Ástæðan er einfaldlega „fjarlægðin“ frá höfuðborgarsvæðinu. Hún gerir foreldrum og aðstandendum, sérfræðingum og eftirlitsaðilum, heilbrigðisþjónustu og barnavernd óþarflega erfitt fyrir í aðhlynningu þessara barna.