Bókun Flokks fólksins undir liðnum: Lagt fram bréf umhverfis- og skipulagssviðs, dags. 7. október 2024, þar sem óskað er eftir að borgarráð heimili umhverfis- og skipulagssviði að bjóða út framkvæmdir vegna endurbóta á húsnæði leikskólans Brákarborgar:
Stefnt er að því að framkvæmdum vegna endurbóta á húsnæði leikskólans Brákarborgar verði lokið á fyrsta ársfjórðungi 2025 sem þýðir að framkvæmdum verði lokið eftir rúmt hálft ár. Eins mikilvægt og það er að drífa af þessar framkvæmdir þarf líka að gæta þess að lofa ekki upp í ermina á sér. Fátt fer meira fyrir brjóstið á borgarbúum en svik og falsboð. Nóg er komið af slíku. Brákarborgarmálið er allt hið vandræðalegasta og eiginlega ótrúlegt þegar horft er til allra þeirra sérfræðinga sem áttu aðkomu að því. Hver vísaði á annan og hefur verið gripið til þess að innri endurskoðun finni þann eða þá sem bera ábyrgðina. Til upprifjunar, þá var lagt torfþak á Brákarborg sem reyndist þyngra en reiknað var með og tilgreint var á teikningum en á flötu þaki varð torfþakið eiginlega að mýri. Fulltrúi Flokks fólksins lýsti yfir áhyggjum sínum á þeim tíma sem hönnunartillagan var kynnt, áhyggjur sem lutu að gerð torfþaks. Flokkur fólksins lagði þá fram viðvörunarbókun. Í ofanálag er það stórskrýtið að svona hönnun hafi verið verðlaunuð. Mistökin koma ekki aðeins illa við borgarsjóð heldur einnig börnin á Brákarborg og foreldra þeirra. Flytja þurfti leikskólann í húsnæði í Ármúla.
Bókun Flokks fólksins undir liðnum: Lögð fram svohljóðandi tillaga áheyrnarfulltrúa Vinstri grænna, dags. 10. október 2024:
Nú hækka Félagsbústaðir leigu umfram verðlag. Borgarráð samþykkir að verja leigjendur Félagsbústaða fyrir þessum hækkunum og hækka sérstakan húsnæðisstuðning sem nemur hækkunum Félagsbústaða.
Vísað til umsagnar fjármála- og áhættustýringarsviðs. MSS24100035
Bókun Flokks fólksins undir liðnum: Lögð fram fundargerð umhverfis- og skipulagsráðs frá 9. október 2024. 7. liður fundargerðarinnar er samþykktur. Áheyrnarfulltrúi Flokks fólksins leggur fram svohljóðandi bókun undir 3. lið fundargerðarinnar:
Rafhlaupahjól eða öllu heldur rafskreppur eins og betra er að kalla þessi farartæki hafa verið bönnuð í sumum borgum, t.d. París. Þar sem rafskreppur eru leyfðar verður að vera meira regluverk í kringum þær og skoða af alvöru að setja aldurstakmark á þær t.d. að fólki yngra en 18 ára verði óheimilt að fara um á rafhlaupahjólum, nái þau meira en 25 kílómetra hraða. Leigurnar þurfa sjálfar að beita sér og að ýta við löggjafanum til að fá betra regluverk í kringum skreppurnar og að sett verði á aldurstakmark. Vandamálið er ekki síst að skreppurnar eru skildar eftir á miðjum gangstéttum og hjólastígum í andstöðu við lögin. Þetta eru regluleg og ítrekuð tilfelli og kerfisbundið ástand. Slys eru tíð. Fjórðungur allra alvarlegra slysa í umferðinni verða á skreppum. Fram hefur komið í fréttum að endurhæfingardeild Grensáss tekur á móti alvarlegustu tilfellunum; fólki með mænu- og heilaskaða og sumir ná sér aldrei til fulls. Á sama tíma og innreið rafskreppa markaði ákveðna byltingu í samgöngum fór hópur þeirra sem slasast alvarlega í umferðinni að taka miklum breytingum. Fyrstu slysin á skreppum voru skráð árið 2020 og hlutdeild þeirra í slysatölum hefur vaxið hratt. Slysafaraldur er staðreynd og nálgast tuginn á sólarhring.
Bókun Flokks fólksins undir liðnum: Lögð fram fundargerð íbúaráðs Breiðholts frá 2. október 2024. Áheyrnarfulltrúi Flokks fólksins leggur fram svohljóðandi bókun undir 3. og 4. lið fundargerðarinnar:
Liður 3
kynning á áhrifum óhóflegs skjátíma. Fulltrúi Flokks fólksins fagnar því að íbúaráð vilji fræðast um málefni barna eins og áhrif óhóflegs skjátíma.
Liður 4
Lagt er til að íbúaráð Breiðholts óski eftir því við borgarráð að gerður verði samningur við íþróttafélagið Leikni um stuðning borgaryfirvalda við starf íþróttafulltrúa á vegum félagsins. Fulltrúi Flokks fólksins telur þetta afar mikilvægt mál og löngu tímabært. Leiknir er að skila ómetanlegu starfi við einstakar aðstæður. Tillaga um íþróttafulltrúa hjá Leikni hefur verið lögð fram áður og felld með þeim rökum að Leiknir njóti nú þegar hlutfallslega hærri styrkja en önnur íþróttafélög borgarinnar. Þetta eru auðvitað fráleit rök. Leiknir er félag sem hefur lengi verið undir í baráttunni um krónuna og aurinn til að geta haldið úti metnaðarfullu íþróttastarfi með þau spil sem félagið hefur á hendi. Meira en tíu þúsund manns búa nú í efra-Breiðholti og íbúum þar fjölgar. Leiknir vill fjölga iðkendum. Það háir starfsemi félagsins að hafa ekki íþróttafulltrúa í fullu starfi. Efra-Breiðholt hefur mikla félagslega sérstöðu og myndi íþróttafulltrúi í fullu starfi styrkja starfsemi félagsins t.d. með því að fjölga iðkendum af báðum kynjum, sem og af erlendum uppruna.
Bókun Flokks fólksins undir liðnum: Lagt fram yfirlit skrifstofu borgarstjórnar, dags. í dag, yfir embættisafgreiðslur erinda sem borist hafa borgarráði, alls 10 mál. Áheyrnarfulltrúi Flokks fólksins leggur fram svohljóðandi bókun undir 1. lið yfirlitsins:
Fulltrúi Flokks fólksins vill benda á áminningarbréf frá eftirlitsnefnd með fjármálum sveitarfélaga. Minnt er á í bréfinu að þrátt fyrir að bráðabirgðaákvæði VII i sveitarstjórnarlögum nr. 138/2011 heimili sveitarstjórn að víkja frá skilyrðum um jafnvægisreglu út árið 2025. Eftirlitsnefndin bendir á að á árinu 2026 þarf Reykjavíkurborg að uppfylla framangreind skilyrði. Ekki er annað hægt en að vera uggandi yfir þessu. Fjármálastaða borgarinnar er enn grafalvarleg og árið 2026 er handan við hornið ef svo má segja. Borgin hefur um eitt ár til að rétta úr kútnum. Samkvæmt ársskýrslu hefur Reykjavík ekki uppfyllt þau lágmarksviðmið sem kveðið er á um í lögum, væru þau virk, né heldur lágmarksviðmið eftirlitsnefndarinnar. Reykjavíkurborg er hvött nú þegar til að leita allra leiða til að uppfylla þessi lágmarksviðmið.
Bókun Flokks fólksins undir liðnum: Riftun samnings milli Reykjavíkurborgar og Loftkastalans:
Meirihlutinn vill rifta kaupsamningi vegna vanefnda milli Loftkastalans og Reykjavíkurborgar um kaup á fasteignum og lóðarréttindum í landi Gufuness. Loftkastalinn vill ekki greiða fyrir vöru sem ekki er tilbúin til afhendingar og einskis virði þar sem hún nýtist ekki í þeim tilgangi sem henni var ætlað en nýta átti húsið fyrir leikmyndagerð. Lóðinni var skipt í tvennt eftir að kaupin gengu í gegn en án samráðs við kaupendur. Síðar kom í ljós að hækka átti baklóðina. Lóðarhafi reyndi að fá staðfesta hæðarkóta í kringum eignir sínar sem dróst og þegar kótar loks komu voru þeir rangir. Reykjavíkurborg hefur þegar viðurkennt mistökin í viðaukum við kaupsamning. Óbyggð lóð er hækkuð um allt að 60 cm. Þessi mismunandi hæð á lóðum hindrar nýtingu þar sem ekki er hægt að renna stórum hlutum, leikmunum, á milli húsanna og einnig hindrar þetta aðkomu að núverandi húsum. Ekki er búið að finna lausn á þessum vandamálum. Í deiliskipulagi er ekkert sem gefur heimild til að breyta landslagi. Enginn hæðarkóti er enn komin á Þengilsbás 1. Í júlí 2022 var greiðslum frestað og Reykjavíkurborg ætlaði að finna viðunandi lausn. Það hefur ekki gengið eftir. Staðan hefur ekkert breyst og þess vegna hafa byggingarréttargjöld ekki verið greidd.
Nýtt mál
Fyrirspurn í framhaldi af svari þjónustu- og nýsköpunarsviðs við fyrirspurn áheyrnarfulltrúa Flokks fólksins um innkaupabeiðnir – úr fundargerð stafræns ráðs frá 9. október 2024.
Spurt er hvort margra ára bið eftir hinu “fullkomna” kerfi sbr. það sem fram kemur í svari þjónustu- og nýsköpunarsviðs við fyrirspurn fulltrúa Flokks fólksins að
,, Rafrænt kerfi þarf að uppfylla ríkar kröfur borgarinnar um öryggi gagna” réttlæti áframhaldandi notkun pappírsbeiðna frekar en að innleiða rafrænt símakort eins og flestar aðrar stofnanir og sveitarfélög eru fyrir löngu komin með og hafa virkað frábærlega? Mun stærri vinnustaðir og stofnanir í löndunum hér í kringum okkur eru varla enn að notast við það úrelta pappírskerfi sem enn er við lýði hjá borginni?
Greinargerð
Sú skýring að enn sé ekki til í heiminum rafrænt innkaupakerfi sem uppfyllir öryggiskröfur Reykjavíkurborgar er í raun fáránleg sérstaklega í ljós þess að öryggi núverandi fyrirkomulags er fyrir neðan allar hellur. Í þeim skýringum sem komu fram í svari þjónustu- og nýsköpunarsviðs felst mikill tvískinnungur. Réttara væri fyrir borgina að líta í eigin barm og viðurkenna að þessi seinagangur stafrænnar umbreytinga innkaupamála Reykjavíkurborgar er fyrst og fremst vegna lausungar í forgangsröðun verkefna frekar en skorti á öryggi þeirra stafrænu lausna sem nú þegar eru til.