Bókun Flokks fólksins undir liðnum: Laugasól. Óskað er eftir að borgarráð heimili sviðinu að hætta framkvæmdum og segja upp verksamningi við verktaka um viðgerðir og endurbætur á leikskólanum Laugasól, Leirulæk 6. Þá er jafnframt óskað eftir að borgarráð heimili umhverfis- og skipulagssviði að óska eftir heimild til niðurrifs á núverandi húsi og að láta hanna nýjan leikskóla á lóðinni.
Meirihlutinn óskar eftir að borgarráð heimili umhverfis- og skipulagssviði að hætta framkvæmdum og segja upp verksamningi við verktaka um viðgerðir og endurbætur á leikskólanum Laugasól, Leirulæk 6, og hefja niðurrif. Þetta er eitt vandræðalegasta mál sem komið hefur upp í borginni: Mál sem enginn skilur. Flokkur fólksins hefur óskað upplýsinga um hversu miklu fé hefur verið varið í endurbætur á húsnæði leikskólans Laugasól í Reykjavík og hvort ekki hafi verið hægt að sjá og meta burðarstyrk í jarðvegi og undirstöðum áður en ráðist var í framkvæmdirnar. En ekki er öll vitleysan eins: Vandinn er bara að svona mál eru ekki ný af nálinni í borgarkerfinu. Dæmi eru um að offjár er eytt í endurgerð á ónýtum húsum. Endurbætur sem hér um ræðir hófust í sumar. Til stóð að reisa viðbyggingu, stækka kjallara og fara í aðrar viðgerðir. Við nánari skoðun á byggingunni, jarðvegi og burði kemur í ljós að húsið er ekki í því ástandi sem gert var ráð fyrir. Þetta er hús sem var byggt 1965. Það virðist vera að það sé ekki mikill burður í jarðveginum né heldur undirstöðunum. Búið er að henda háum fjárhæðum út um gluggann því nú skal rífa húsið og byggja nýtt.
Bókun Flokks fólksins undir liðnum: Lagt fram að nýju bréf borgarritara, dags. 8. október 2024, þar sem óskað var eftir því að borgarráð samþykki að rifta kaupsamningi, dags. 16. janúar 2018, upphaflega milli Loftkastalans ehf. og Reykjavíkurborgar um kaup á fasteignum ásamt tilheyrandi lóðarréttindum og byggingarrétti í landi Gufuness, vegna verulegra vanefnda kaupanda á greiðslum skv. kaupsamningi og síðari viðaukum, sem samþykkt var á fundi borgarráðs 10. október 2024 og fært í trúnaðarbók.
Meirihlutinn vill rifta kaupsamningi vegna vanefnda milli Loftkastalans og Reykjavíkurborgar um kaup á fasteignum og lóðarréttindum í landi Gufuness. Loftkastalinn vill ekki greiða fyrir vöru sem ekki er tilbúin til afhendingar og einskis virði þar sem hún nýtist ekki í þeim tilgangi sem henni var ætlað en nýta átti húsið fyrir leikmyndagerð. Lóðinni var skipt í tvennt eftir að kaupin gengu í gegn en án samráðs við kaupendur. Síðar kom í ljós að hækka átti baklóðina. Lóðarhafi reyndi að fá staðfesta hæðarkóta í kringum eignir sínar sem dróst og þegar kótar loks komu voru þeir rangir. Reykjavíkurborg hefur þegar viðurkennt mistökin í viðaukum við kaupsamning. Óbyggð lóð er hækkuð um allt að 60 cm. Þessi mismunandi hæð á lóðum hindrar nýtingu þar sem ekki er hægt að renna stórum hlutum, leikmunum, á milli húsanna og einnig hindrar þetta aðkomu að núverandi húsum. Ekki er búið að finna lausn á þessum vandamálum. Í deiliskipulagi er ekkert sem gefur heimild til að breyta landslagi. Enginn hæðarkóti er enn komin á Þengilsbás 1. Í júlí 2022 var greiðslum frestað og Reykjavíkurborg ætlaði að finna viðunandi lausn. Það hefur ekki gengið eftir. Staðan hefur ekkert breyst og þess vegna hafa byggingarréttargjöld ekki verið greidd.
Bókun Flokks fólksins undir liðnum: Lagt fram trúnaðarmerkt bréf þjónustu- og nýsköpunarsviðs, dags. 28. nóvember 2024, þar sem óskað er eftir heimild borgarráðs til að hefja verkefnið stafrænt borgarkort.
Fulltrúi Flokks fólksins hefur oft áður lagt fram fyrirspurnir varðandi lausnir sem þessar – sem bæði fyrirtæki og opinberir aðilar eru fyrir löngu komin með. Til gamans má geta þess að það virðist oft vera svo að fljótlega eftir að fulltrúi Flokks fólksins hefur gagnrýnt skort á svona lausnum, fara að dúkka upp verkefnaáætlanir og annað fyrir þau sömu verkefni. Eflaust gæti verið þarna um að ræða tilviljanir, en hvernig sem í því liggur fagnar fulltrúinn hverri þeirri lausn sem sparar tíma borgarbúa og starfsfólks. Það er bara ekki í lagi að stærsta sveitarfélag á Íslandi skuli í raun vera svo langt á eftir í innleiðingu svona snjalllausna. Fulltrúinn minnist þess varla að til sé nokkurt Reykjavíkur-app til hægðarauka fyrir borgarbúa – svona eitthvað í líkingu við Ísland.is-appið sem tilbúið var í mars 2022. Sundkort er t.d. fyrir löngu komið í síma Garðbæinga svo annað dæmi sé tekið fram.
Bókun Flokks fólksins undir liðnum: Lagt fram trúnaðarmerkt bréf þjónustu- og nýsköpunarsviðs, dags. 28. nóvember 2024, þar sem óskað er eftir heimild borgarráðs til að hefja frumathugun fyrir verkefnið rafrænar beiðnabækur fyrir FAS:
Hér er um að ræða þrjú mál frá þjónustu- og nýsköpunarsviði: Heimild til að hefja verkefnið stafrænt borgarkort, heimild til að hefja frumathugun fyrir verkefnið rafrænar beiðnabækur og heimild til að ljúka innleiðingu á Teams Phone símakerfi inn á öll svið Reykjavíkurborgar. Eftir því er tekið að það er trúnaður á öllum þessum málum. Af hverju þessi leynd, leyndarmál? Hvað er það á þessu stigi sem ekki þolir dagsins ljós hjá þjónustu- og nýsköpunarsviði? Sem svar við fyrirspurn um þetta atriði er ástæðan sú að kostnaðartölur eru birtar og gæti það haft áhrif á útboð. Það er þannig í fjölmörgum málum og er þó ekki trúnaður á þeim. Fulltrúi Flokks fólksins hefur áður bókað um pappírsbeiðnakerfi þjónustu- og nýsköpunarsviðs. Um er að ræða handskrifaðar pappírsbeiðnir sem fylgja pappírsreikningum sem sendir eru til borgarinnar sem síðan þarf að skrá handvirkt í tölvukerfi. Beiðnakerfið býður upp á alls konar misnotkun. Beiðnum úr beiðnaheftum borgarinnar hefur stundum verið stolið og í einu tilfelli var ekki hægt að gera grein fyrir allt að sjö milljónum sem verslað var fyrir með handskrifaðri innkaupabeiðni frá Reykjavíkurborg. Tapast hafa e.t.v. tugir milljóna á þessu úrelta kerfi. Verklag innkaupabeiðna hefur verið nánast óbreytt undanfarna áratugi.
Bókun Flokks fólksins undir liðnum: Lagt fram bréf þjónustu- og nýsköpunarsviðs, dags. 28. nóvember 2024, þar sem óskað er eftir heimild borgarráðs til að ljúka innleiðingu á Teams Phone símakerfi inn á öll svið Reykjavíkurborgar:
Því ber að fagna að loksins sjái fyrir endann á rekstri og útgjöldum vegna gamalla og löngu úr sér genginna símalausna sem ekkert virðist hafa verið hróflað við árum saman. Reykjavíkurborg hefur verið að greiða gríðarlegar fjárhæðir vegna Microsoft leyfissamninga – og eflaust verið greitt af Teams leyfum í langan tíma. Það er því fyrir löngu komin tími til þess að þetta verkefni verði klárað. Verður fulltrúi því enn og aftur að taka það fram að eitthvað meira en lítið virðist vera bogið við forgangsröðunina á verkefnalista þjónustu- og nýsköpunarsviðs. Er það von fulltrúans að enn fleiri verkefni, sem ekki hefur verið hugað að fyrr, sjái dagsins ljós með hag bæði starfsfólks og borgarbúa að leiðarljósi.
Bókun Flokks fólksins undir liðnum: Lagt fram svar fjármála- og áhættustýringarsviðs, dags. 27. nóvember 2024, við fyrirspurn áheyrnarfulltrúa Flokks fólksins um sölu Perlunnar, sbr. 40. lið fundargerðar borgarráðs frá 7. nóvember 2024:
Flokkur fólksins spurði um söluferli Perlunnar og skilyrði sem snúa að m.a. notkun hússins, aðgengi almennings og bílastæðum, t.d. hvort þau verði opin almenningi endurgjaldslaust. Í svari má lesa að greiða þarf bílastæðagjöld, hófleg, hvað svo sem það þýðir. Líklegt er að bílastæðin verið tekjuuppspretta þeim sem þau eiga. Það er ekki ásættanlegt og taka þarf fyrir slíkt í leigusamningi. Einnig kemur fram að ákvörðun um sölu Perlunnar var tekin í ljósi þess að húsnæði hennar nýtist ekki fyrir kjarnastarfsemi Reykjavíkurborgar. Það hefur aldrei verið þörf á þessu húsnæði fyrir starfsemi borgarinnar svo ekkert er nýtt í þeim efnum. Segir í svari að tilgangurinn með sölu hennar til lengri tíma litið er að ná fram hagræðingu í rekstri og skerpa með þeim hætti á hlutverki borgarinnar. Auðvitað á að færa söluna í bókhald á því ári sem hún selst en ekki að færa mögulegt söluandvirði fyrirfram eitthvert ár þar sem er alls ekki víst að hún seljist á því ári. En það er rétt sem kemur fram í svari að litlu máli skiptir hvort Perlan verði seld fyrir eða eftir áramót. En meirihlutinn gefur sér hins vegar að hún verði seld fyrir áramót og lappi þá uppá bókhald ársins 2024.
Bókun Flokks fólksins undir liðnum: Lögð fram fundargerð stjórnar Orkuveitu Reykjavíkur frá 28. október 2024.
Í fundargerð kemur fram að samþykkt er heimild til kaupa á lóðum úr landi Æsustaða. Um er að ræða land þar sem þegar boraðar holur eru. Er það ekki slök verkstjórn að kaupa lóðir eftir að borholur hafa verið gerðar og nýting þeirra hafin? Orkuveitan þarf þá að taka hverju því verði sem sett er upp. Væri ekki betri stjórnun að kaupa fyrst og bora svo? Undir öðrum málum, lið 13, er sagt að „Líkur eru á því að hundruð megavatta liggi þar ónýtt í jörðu“ á Hellisheiðarsvæðinu. Þetta er hæpin fullyrðing að vatnið liggi ónýtt, en margoft hefur komið fram hjá jarðvísindamönnum að heitt vatn í jörðu sé einnota auðlind. Það eyðist sem af er tekið. Þannig að ef vatnið er ekki nýtt núna getur það nýst komandi kynslóðum, en ekki ef það er nýtt núna.
Bókun Flokks fólksins undir liðnum: Lagðar fram fundargerðir stjórnar SORPU bs. frá 30. september og 2. og 18. október 2024. Áheyrnarfulltrúi Flokks fólksins leggur fram svohljóðandi bókun undir 1. lið fundargerðarinnar frá 30. september 2024 og 3. lið fundargerðarinnar frá 2. október 2024:
Liður 1
Stjórn felur framkvæmdastjóra, í samræmi við fjárhagsáætlun, að flytja rekstur gashreinsistöðvar SORPU yfir í einkahlutafélagið Metan ehf., sem er í 100% eigu SORPU bs. Fulltrúa Flokks fólksins finnst athyglisvert að það þyki sjálfsagt að SORPA flytji rekstur gashreinsistöðvar SORPU yfir í einkahlutafélagið Metan ehf., sem er þó í 100% eigu SORPU bs. Ekki er séð hvernig hagræði er af þessu, öllu heldur kallar þetta hugsanlega á meiri yfirbyggingu. 3. liður: Ekki er annað að sjá en að stefnt sé að hátæknisorpbrennslu á Helguvíkursvæðinu. Því er velt upp hvort það sé vel ígrundað og hvernig þessi ákvörðun var tekin. Þar eru minni möguleikar á að nýta varma og orku sem myndast í brennslunni en ef brennslan væri nær höfuðborgarsvæðinu, t.d á Álfsnesi. Flokkur fólksins hefur áður bókað um þessi mál. Hátæknisorpbrennsla á Sjálandi í Danmörku er nálægt miðborg Kaupmannahafnar til að auðvelt sé að nýta afurði sorpbrennslunnar. Þessi staðsetning sýnir að slík brennsla hefur lítið slæmt í för með sér fyrir umhverfið. Út að Helguvík er miklu lengra að aka með sorp frá Reykjavík en á Álfsnes. Það eykur kolefnissporið sem alltaf er verið að berjast við.
Áheyrnarfulltrúi Flokks fólksins leggur fram svohljóðandi fyrirspurn seldan byggingarrétt í Gufunesi, gjafagjörning:
Fulltrúi Flokks fólksins óskar upplýsinga um hvernig standi á því að Reykjavíkurborg hafi selt byggingarrétt uppá 15.000 kr.m2. án nokkurs fyrirvara í fyrsta kaupsamningi í Gufunesi 26. maí 2016 með hagnað upp á rúman einn milljarð fyrir kaupanda. Er ekki rétt að viðskipti sem þessi stangist á við ríkisaðstoð samkvæmt 61. gr. EES-samningsins og jafnaðarreglu í stjórnarskrá? Sjá nánar í greinargerð. Byggingarréttur á óbyggðum fermetrum er seldur á 15.000- krónur óverðtryggður og engir vextir og engin takmörk á byggingarmagni og að ekki þurfi að greiða fyrr en teikningar eru lagðar inn. Spurt er hvernig þetta má vera.
Greinargerð
Með gildistöku deiliskipulags fékk sá aðili rétt til að byggja á sinni lóð 10725 fm af íbúðum og auk heimildar til að bæta við fyrir atvinnustarfsemi 6141 fm. Ríkisaðstoð er óheimil ef hún raskar eða gæti raskað samkeppni með því að veita tilteknum fyrirtækjum eða atvinnugreinum óréttmætan efnahagslegan ávinning. Sala opinberra eigna undir markaðsvirði gæti talist sem slíkur ólögmætur ávinningur, ef það felur í sér að kaupandi fær efnahagslegan ávinning sem hann hefði ekki fengið undir venjulegum markaðsaðstæðum. Fulltrúa Flokks fólksins sýnist hér að Reykjavíkurborg hafi farið gegn öllum samkeppnislögum og brotið á öðrum fyrirtækjum í þessu landi í sömu starfsgrein og óskar skýringa.
Áheyrnarfulltrúi Flokks fólksins leggur fram svohljóðandi fyrirspurn staðsetningu hátæknisorpbrennslu:
Hvers vegna er fyrirhuguð hátæknisorpbrennsla ekki staðsett þar sem auðvelt er að nýta afurðirnar? Afurðir hátæknisorpbrennslu eru aðallega varmi sem myndast í brennslunni. Má ekki nýta þennan varma til að hita upp vatn sem yrði best nýtt til hitaveitu? Ekki er annað að sjá en að stefnt sé að hátæknisorpbrennslu á Helguvíkursvæðinu. Er það vel ígrundað og hvernig var þessi ákvörðun tekin ef svo er?
Greinargerð
Flokkur fólksins hefur áður minnst á þetta mál. Á Helguvíkursvæðinu eru minni möguleikar á að nýta varma og orku sem myndast í brennslunni en ef brennslan væri á höfuðborgarasvæðinu , t.d á Álfsnesi.
Hátæknisorpbrennsla á Sjálandi í Danmörk er nálægt miðborg Kaupmannahafnar til að auðvelt sé að nýta afurðir sorpbrennslunnar. Þessi staðsetning sýnir að slík brennsla hefur lítið slæmt í för með sér fyrir umhverfið. Út að Helguvík er miklu lengra að aka með sorp frá Reykjavík en á Álfsnes. Það eykur kolefnissporið sem alltaf er verið að berjast við.