Tillaga borgarfulltrúa Flokks Fólksins um stofnun starfshóps um biðlista eftir skólaþjónustu í Reykjavík
Lagt er til að borgarstjórn samþykki að stofna starfshóp sem fengi m.a. þau verkefni að rýna biðlista barna og ungmenna eftir skólaþjónustu til að meta hvort framsetning listans og skráning erinda/tilvísana sé með þeim hætti að hann gefi raunsanna mynd af stöðu mála. Í því felst að skoða hvað mörg börn á biðlistanum hafa fengið þjónustu eða hluta af þjónustu. Einnig hvaða þjónustu var óskað eftir samkvæmt tilvísun/beiðni og meta hvaða breytingar þurfi að gera á fyrirkomulagi skólaþjónustunnar til að gera hana skilvirkari. Markmið hópsins er að ná biðtíma barna eftir þjónustu undir 90 daga.
Greinargerð
Flokkur fólksins hefur lengi haft áhyggjur af biðlista barna og ungmenna eftir skólaþjónustu. Við upphaf þessa kjörtímabils lagði Flokkur fólksins fram tillögu um að fá að skipa svokallaðan spretthóp til að rýna biðlista barna með það að markmiði að fá hugmynd um stöðu þeirra barna sem á honum eru og finna leiðir til að stytta biðtíma barna eftir fagþjónustu.
Fulltrúi Flokks fólksins í velferðarráði lagði til að starfsfólki BUGL yrði boðið á sameiginlegan fund velferðarráðs og skóla- og frístundaráðs til að kynna niðurstöður átaks við að stytta biðlista eftir göngudeildarþjónustu. Átakið skilaði góðum árangri. Borgarfulltrúi Flokks fólksins telur að Reykjavíkurborg geti farið í sömu vegferð til að stytta biðtíma barna eftir þjónustu.
Á biðlista eru nú 2.086 börn sem bíða eftir fyrstu og/eða frekari þjónustu. Bak við hvert barn er tilvísun, undirrituð af skóla og foreldrum. Meirihluti barnanna bíður eftir skimun/greiningum á vitsmuna-, tilfinninga- og/eða félagslegum vanda sínum sem skólinn og foreldrar telja nauðsynlegt að greina til að hægt sé að veita börnunum sérhæfða þjónustu út frá einstaklingsþörfum. Það skiptir sköpum í lífi þessara barna og fjölskyldna þeirra að börnin fái þessa faglegu þjónustu hið fyrsta til að þau geti notið styrkleika sinna
Bókun Flokks fólksins undir þessum lið:
Fulltrúi Flokks fólksins leggur til að stofnaður verði starfshópur sem fær það verkefni að rýna biðlista barna eftir skólaþjónustu og finna leiðir til að ná biðtímanum undir 90 daga. Flokkur fólksins hefur lengi haft áhyggjur af þessum langa biðlista. Við upphaf þessa kjörtímabils lagði fulltrúi Flokks fólksins fram sambærilega tillögu sem meirihlutinn felldi. 2.086 börn bíða nú eftir skólaþjónustu en þau voru 400 árið 2018. Bak við hvert barn er tilvísun, undirrituð af skóla og foreldrum. Það skiptir sköpum í lífi þessara barna að fá fagþjónustuna fljótt til að þau geti notið styrkleika sinna. Meðalbiðtími er nú sex mánuðir, þ.e. 180 dagar og mörg börn bíða jafnvel í allt að tveimur árum eftir að fá fagþjónustu. Fara þarf í átak við að stytta biðlista líkt og BUGL fór í með góðum árangri. Flokki fólksins finnst börn ekki sett nægjanlega í forgang í borginni. Börn eiga aldrei að þurfa að bíða eftir þjónustu. Setja á þau í forgang og ekki spara í neinu í þjónustu við þau. Langur biðtími eftir aðstoð af þessu tagi getur valdið börnum langvarandi skaða.
Bókun Flokks fólksins undir liðnum: Fram fer umræða um ávinning stafrænnar umbreytingar fyrir borgarbúa:
Vissulega hafa einhverjar stafrænar lausnir litið dagsins ljós síðustu ár en tilbúnar afurðir eru hins vegar ekki í neinu samhengi við þá 20 milljarða sem nú þegar er búið að eyða. Sárlega vantar enn mikilvægar lausnir á svið borgarinnar. Verkefni hafa mörg verið illa skilgreind og jafnvel dagað uppi í tilraunasmiðjum. Núverandi meirihluti er áfram sama gagnrýnislausa málpípa þessa sviðs og eru borgarfulltrúar meirihlutans fastir í blindri meðvirkni. Tugum milljóna hefur verið eytt í dýran húsbúnað, tækjakost og skemmtanaviðburði. Boðið er upp á uppskrúfaðar kynningar um verkefni sem flest eru „á leiðinni“ og fullyrt að árangur sviðsins sé á heimsmælikvarða. Fulltrúi Flokks fólksins hefur rætt þessi mál við embætti innri endurskoðanda. Starfsmannavelta sviðsins er áhyggjuefni enda virðist það vera daglegt brauð að fólk sé ráðið og rekið á þjónustu- og nýsköpunarsviði. Stafrænni vegferð borgarinnar hefur verið líkt við fyrirbærið „startup cult“ sem skilgreinist m.a. þannig að umhverfið og ásýndin er aðalatriðið hvort sem verið er að skila vöru eða ekki. Hugmyndafræði slíkra fyrirtækja er að leggja upp með óljósar áætlanir og fara með fjármagn eins og um áhættufjármagn sé að ræða.
Borgarfulltrúar Samfylkingarinnar, Framsóknar, Pírata og Viðreisnar leggja fram svohljóðandi gagnbókun:
Fulltrúar meirihlutans vísa þessari gagnrýni alfarið á bug. Öllum fyrirspurnum um stöðu verkefna, nýtingu fjármuna og framvindu hefur verið svarað, oft ítrekað. Farið hefur verið yfir framvindu stafrænnar umbreytingar margoft, bæði í borgarstjórn, borgarráði og á fundum stafræns ráðs og áður mannréttinda-, nýsköpunar- og lýðræðisráðs. Aldrei hefur reynst steinn yfir steini í þessum síítrekuðu dylgjum fulltrúa Flokks fólksins. Eins eru gögn um ársreikninga og ársskýrslur þjónustu- og nýsköpunarsviðs aðgengilegar. Það er óboðlegt að vegið sé að fagmennsku og starfsheiðri þeirra sem fást til að starfa við stafræna þjónustuumbreytingu hjá borginni og er þeim borgarfulltrúum sem tekið hafa þátt í þessum linnulausa rógburði ekki til sóma.
Bókun Flokks fólksins undir liðnum: Lagt er til að borgarstjórn samþykki að fela skrifstofu borgarstjóra og borgarritara að leita samninga við lóðarhafa að Ægisíðu 102 með það að markmiði að tryggja varðveislu hússins samkvæmt ábendingum Borgarsögusafns Reykjavíkur:
Borgarfulltrúi Flokks fólksins tekur undir að leitað verði samninga við lóðarhafa að Ægisíðu 102 með það að markmiði að Reykjavíkurborg leysi til sín lóðina og tilheyrandi fasteignir svo hana megi nýta í annað uppbyggilegt í hverfinu eða það sem vantar inn í þjónustumöguleika þess, sem dæmi leikskóla. Lóðin Ægissíða 102 geymir bensínstöð og stórt þvottaplan. Minjastofnun Íslands vill að húsið verði friðað og þeir hafa heimildina. Það er mikilvægt að hverfisbúar fái um það að segja hvað verður á þessari lóð. Sem stendur er lóðin hluti af samkomulagi milli Reykjavíkurborgar og lóðarhafa frá árinu 2021 um fækkun bensínstöðva. Mikilvægt er að endurskoða samkomulagið meðal annars út frá niðurstöðu skýrslu Borgarsögusafns um húsakönnun og mat á varðveislugildi 12 bensínafgreiðslustöðva í Reykjavík þar sem bygging bensínstöðvarinnar að Ægisíðu er metin með hátt varðveislugildi. Eins og ferskt er í minni urðu mikil læti og megn óánægja í kringum þessa samninga við olíufélögin og sterkar líkur eru á að borgin hafi í einhverjum þessara mála samið af sér. Spyrja má af hverju innviðagjöld eru felld niður gagnvart Festi á þessari lóð.
Bókun Flokks fólksins undir liðnum: Fram fer umræða um bættar almenningssamgöngur til Keflavíkurflugvallar:
Fulltrúi Flokks fólksins telur skynsamlegt að efla almenningssamgöngur á milli Keflavíkurflugvallar og höfuðborgarsvæðisins. Þúsundir manna sækja flugvöllinn á degi hverjum. Það er því gríðarlegt hagsmunamál fyrir stóran hóp fólks að fá góðar samgöngur til og frá flugvellinum. Það er líka óþarfi að mörg þúsund bílar séu að keyra, með tilheyrandi mengun fyrir umhverfið, milli höfuðborgarsvæðisins og Keflavíkurflugvallar með örfáa farþega. Samkvæmt upplýsingum um ferðavenjur í dag þá er eingöngu áætlað að um 15% ferðamanna ferðist til og frá flugvelli með hópbifreiðum sem ferðast eftir tímatöflu. Talan hækkar upp í 25-30% að vetri til. Um 2% starfsfólks Isavia nýta sér strætó/rútur í ferðum til og frá vinnu (2021). Um 1% alls starfsfólks flugvallarins sem býr í Reykjanesbæ nýtti sér strætó til að ferðast til vinnu árið 2023 samkvæmt samgöngukönnun Isavia. Þessar upplýsingar sýna gríðarlega litla notkun á almenningssamgöngum sem er miður en jafnframt skiljanlegt. Samgöngurnar sem eru núna eru stopular og þær eru mjög dýrar.
Bókun Flokks fólksins undir liðnum: Fram fer umræða um akstursþjónustu Pant. MSS24030027
Fulltrúi Flokks fólksins telur að Pant akstursþjónusta hafi gengið vel alla vega um nokkurt skeið. ÖBÍ er með fulltrúa í notendaráði Pant og er það mjög gott. Þó hafa komið upp alvarleg tilvik sem eru mjög sláandi eins og þegar einstaklingur gleymist í bílnum eða er skilinn eftir. Það er reiðarslag og verður að rannsaka slíkt mál ofan í kjölinn. Það þarf einnig að ræða að kalla eftir hvernig upplýsingar um farþega/notendur eru skráðar (þ.e. þarfir og hvað á að forðast), hvaða upplýsingar bílstjórar fá og hvaða verkferlum þeir eiga að vinna eftir (bæði almennt og fyrir hvern farþega fyrir sig). Síðast en ekki síst vill fulltrúi Flokks fólksins vita hvaða bakgrunnstékk hefur verið gert á bílstjórum áður en þeir byrja að keyra fyrir Pant, hvaða þjálfun þeir fá í upphafi og hvort það fari fram símenntun. Bent er á að stór hluti notenda þjónustunnar fer um í leigubílum, eitt með bílstjóra. Þetta er viðkvæmasti hópur samfélagsins, oft ungmenni með þroskaskerðingu. Þá verður utanumhaldið að vera gríðarlega öruggt.
Bókun Flokks fólksins undir liðnum: Lögð fram svohljóðandi tillaga borgarfulltrúa Sjálfstæðisflokksins um að hafist verði handa við skipulagningu íbúðasvæðis við Halla og í Hamrahlíðalöndum í Úlfarsárdal, þ.e. á svokölluðum M22 reit.
Fulltrúi Flokks fólksins styður þessa tillögu. Í Úlfarsárdal er nægt land til að byggja á og þar eru innviðir til staðar. Það er glapræði ef ekki á að byggja þarna meira og það af krafti. Víða annars staðar í borgarlandinu eru uppbyggingarsvæði, s.s. í Grafarvogi, og þar eru einnig innviðir sem geta tekið við fólksfjölgun. Haldið er of fast um tauminn og þétting byggðar er orðin meira en eitthvað sem gagnast fólkinu. Horfa þarf til þess að brjóta nýtt land undir byggð. Átak í húsnæðismálum í Reykjavík er löngu tímabært. Flokkur fólksins hefur lengi bent á að of mikil stífni hafi ríkt í úthlutun lóða hjá þessum og síðasta meirihluta. Sjálfsagt hefur verið að þétta byggð víða í Reykjavík þar sem byggð er dreifð en það þarf meira til. Það þarf að brjóta nýtt land undir byggð og hafa meiri sveigjanleika við úthlutun lóða. Horfa þarf til atvinnutækifæra í hverfum mun meira en gert hefur verið. Reykjavík verður að finna leiðir til að bjóða fleiri lóðir til þeirra sem vilja og geta byggt hús og skipuleggja fleiri svæði til að byggja á. Það veltur á Reykjavík hvernig til tekst við að byggja upp öflugan húsnæðismarkað.
Bókun Flokks fólksins undir liðnum Fundargerðir. Borgarfulltrúi Flokks fólksins leggur fram svohljóðandi bókun undir 18. lið fundargerðar borgarráðs frá 29. febrúar:
Flokkur Fólksins hefur verið að leita í dyrum og dyngjum að lausnum til að leysa mannekluvandann í leikskólum og hugkvæmdist að leggja fram tillögu um að nemendum á efri skólastigum yrði boðið starf á leikskóla á þeirra forsendum. Gerðir yrðu skammtímaráðningarsamningar um vinnu á leikskólum sem mátast við námskrá hvers og eins nemanda. Það er ekki verið að gera nákvæmlega þetta, þ.e. leggja áherslu á hóp námsmanna og bjóða þeim upp á sveigjanleika í starfi eftir því hvað þeim hentar. Fulltrúi Flokks fólksins hefur rætt þessa tillögu við marga og hefur hún fengið góðan hljómgrunn. Öll þekkjum við hversu gríðarleg mannekla er í leikskólum sem hefur valdið því að foreldrar fá ekki pláss fyrir börn sín og sífellt er verið að biðja foreldra að sækja börn sín því ekki tókst að manna daginn. Vel kann að vera að einhverjir eða fleiri nemendur séu tilbúnir að vinna á leikskólum borgarinnar ef þeim er gert auðvelt að laga vinnuna að námi þeirra. Af hverju vill meirihlutinn í borginni ekki kanna þennan möguleika?
Bókun Flokks fólksins undir liðnum Fundargerðir. Borgarfulltrúi Flokks fólksins leggur fram svohljóðandi bókun undir 13. lið fundargerðar stafræns ráðs frá 14. febrúar:
Fulltrúi Flokks fólksins lagði fram fyrirspurn varðandi kvartanir um kynferðislega áreitni á þjónustu- og nýsköpunarsviði síðastliðin fjögur ár. Spurt var einnig hvort einhver hefur hætt störfum í tengslum við slíkt mál. Á fundi ráðsins lagði Sjálfstæðisflokkurinn fram tillögu um að vísa málinu frá. Það kom fulltrúa Flokks fólksins mjög á óvart. Svona mál á ekki að þagga. Meirihluti ráðsins ákvað að vísa fyrirspurninni til þjónustu- og nýsköpunarsviðs sem er eina sviðið sem getur svarað henni þar sem meintar kvartanir áttu sér stað þar en voru aldrei formlega tilkynntar eftir því sem næst er komist. Verkferlar í málum af þessu tagi hjá borginni virkjast ekki nema borist hafa formlegar tilkynningar. Hægt er þó að hefja frumkvæðisathugun á málinu. Starfsánægjukannanir segja ekkert til um einstök mál eða hvort brotið hafi verið á starfsmönnum. Ástæða fyrirspurnar þessarar eru ábendingar sem Flokki Fólksins hafa borist þar sem fram kemur að þolendur hafi verið reknir þegar þeir kvörtuðu yfir kynferðislegri áreitni. Flokkur fólksins vill fá að vita hvort þetta sé rétt og hvort einhver hafi hætt störfum hjá þjónustu- og nýsköpunarsviði vegna mála af þessu tagi.