Borgarfulltrúi Flokks fólksins leggur fram svohljóðandi dagskrártillögu:
Lagt er til að borgarstjórn samþykki að gera svohljóðandi breytingar á dagskrá fundarins: Mál sem er númer 5 á útsendri dagskrá borgarstjórnar, umræða um málefni Borgarskjalasafns, verði númer 1. Mál sem er númer 3 á útsendri dagskrá, tillaga um framtíðartilhögun á starfsemi Borgarskjalasafns, verði númer 2. Mál sem er númer 1 á útsendri dagskrá, umræða um hvernig borgarstjórn endurheimti traust almennings, verði númer 3. Mál sem er númer 2 á útsendri dagskrá, tillaga borgarfulltrúa Sjálfstæðisflokksins um þróun og uppbyggingu á lífsgæðakjörnum fyrir eldri Reykvíkinga, verði númer 4. Mál sem er númer 4 á útsendri dagskrá, umræða um Betri borg fyrir börn og skilvirkni þess, verði númer 5. Að öðru leyti er dagskrá fundarins óbreytt. MSS23010044
Tillagan er felld með þrettán atkvæðum borgarfulltrúa Samfylkingarinnar, Framsóknar, Pírata og Viðreisnar gegn þremur atkvæðum borgarfulltrúa Sósíalistaflokks Íslands og Flokks fólksins.
Borgarfulltrúar Sjálfstæðisflokksins og Vinstri grænna sitja hjá við afgreiðslu málsins.
Bókun Flokks fólksins undir liðnum: Fram fer umræða um hvernig borgarstjórn endurheimti traust almennings:
Það skal ekki undra að traust almennings til meirihlutans í borgarstjórn er lítið sem ekkert. Síðustu meirihlutar undir stjórn borgarstjóra hafa gert ítrekuð alvarleg mistök í störfum sínum og ekki komið heiðarlega fram við borgarbúa. Í dag verða enn ein afglöpin gerð með því að leggja niður Borgarskjalasafn og undir það ætla Framsóknarmenn, nýir fulltrúar í meirihlutanum að kvitta. Það er mat Flokks fólksins að borgarstjóri sé fyrir löngu búinn að tapa yfirsýn og eru embættismenn farnir að stýra borginni. Flokkur fólksins óttast að verið sé að stýra skútunni í strand. Fjármálin eru í lamasessi og ítrekað er farið gegn óskum borgarbúum og að þeim logið. Skemmst er að minnast leikskólamálanna. Dæmi um forgangsmál meirihlutans er menningarhús í Grófinni, göngugötur og þétting byggðar þar sem bílar fá helst ekki aðkomu. Börn sem þurfa þjónustu vegna vanlíðunar sinnar eru sett á bið. Skilvirkni í rekstri og þjónustu er víða alvarlega ábótavant. Þetta er ástæða þess að traust mælist svo lágt. Það segir sig sjálft að mælingar lagast ekki fyrr en forgangsröðun verður í þágu fólksins og komið verður heiðarlega fram við það, haft við það samráð og virkt gagnsæi verði í störfum borgarinnar.
Bókun Flokks fólksins undir liðnum: Lögð fram svohljóðandi tillaga borgarfulltrúa Sjálfstæðisflokksins. Borgarstjórn samþykkir að skipa stýrihóp um áframhaldandi þróun og uppbyggingu á lífsgæðakjörnum fyrir eldri Reykvíkinga. Stýrihópnum verði falið skoða þá lífsgæðakjarna sem nú eru starfræktir í borginni og þá sem eru fyrirhugaðir:
Fjölmargir eldri Reykvíkingar njóta húsnæðisöryggis. Fólk á almennum leigumarkaði er í erfiðari stöðu. Sjálfsagt er að skipa stýrihóp um áframhaldandi þróun og uppbyggingu á búsetuúrræðum fyrir eldri Reykvíkinga sem starfar með hagsmunasamtökum eldra fólks. Flokkur fólksins hefur lagt fram tillögur um skipulagða byggð fyrir eldra fólk. Það er hlutverk Reykjavíkurborgar að mæta fjölgun eldri borgara í borginni. Hugmyndir nútímans ganga út á að eldra fólk geti búið sem lengst í eigin húsnæði og það er hlutverk okkar í Reykjavíkurborg að aðstoða og skipuleggja slíka byggð. Töluverður hluti húsnæðis í Reykjavíkurborg hefur ekki verið hugsaður til slíks. Stoðþjónusta er einfaldlega ekki til staðar. Þar þarf að hugsa til útivistar, áhugamála, félagslegrar þjónustu, heilsugæslu o.s.frv. Með slíku er hægt að styðja við að eldast heima. Það vantar þjónustuíbúðir, uppbygging þeirra gengur hægt. Það vantar einnig leiguíbúðir með sameiginlegri félagsaðstöðu fyrir eldri Reykvíkinga, búsetuúrræði sem er t.d. rekið eftir Eden hugmyndafræðinni. Það væri eins konar millistig milli sjálfstæðrar búsetu og hjúkrunarrýmis. Fulltrúi Flokks fólksins elur enn þá von í brjósti að Reykjavík eigi eftir að eignast hagsmunafulltrúa aldraðra sem gæti einmitt unnið að þróun og uppbyggingu á lífsgæðakjörnum fyrir eldri Reykvíkinga.
Lögð fram að nýju svohljóðandi tillaga borgarstjóra, dags. 14. febrúar 2023, sbr. 3. lið fundargerðar borgarráðs frá 16. febrúar 2023, ásamt fylgiskjölum: Lagt er til að borgarráð samþykki að starfsemi Borgarskjalasafns taki breytingum í samræmi við valkost þrjú í meðfylgjandi skýrslu KPMG um framtíðarhögun á starfsemi safnsins og verði verkefninu flýtt eins og kostur er. Tillagan felur í sér að skilgreind lögbundin verkefni þess verði flutt til Þjóðskjalasafns Íslands:
Tillaga borgarfulltrúa Sjálfstæðisflokks, Sósíalistaflokks Íslands, Flokks fólksins og Vinstri grænna um frávísun málsins er felld með þrettán atkvæðum borgarfulltrúa Samfylkingarinnar, Framsóknar, Pírata og Viðreisnar gegn tíu atkvæðum borgarfulltrúa Sjálfstæðisflokksins, Sósíalistaflokks Íslands og Flokks fólksins og Vinstri grænna.
Borgarfulltrúar Sjálfstæðisflokks, Sósíalistaflokks Íslands, Flokks fólksins og Vinstri grænna leggja fram svohljóðandi breytingartillögu:
Borgarstjórn samþykkir að vinna nánari greiningar á tillögum og ólíkum sviðsmyndum um framtíðarhögun á starfsemi Borgarskjalasafns. Endanleg ákvörðun í málinu verði hvorki tekin fyrr en að undangengnu ítarlegu samtali og samvinnu við bæði ráðherra menningarmála og Þjóðskjalasafn, né fyrr en starfshópur menningar- og viðskiptaráðherra um framtíðarfyrirkomulag skjalasafna og mótun stefnu um rafræna langtímavörslu skjala hefur lokið störfum. Jafnframt verði þess gætt að til grundvallar tillögunni liggi ítarlegar greiningar á því hagræði sem náð skal fram með breytingunni, þeim fjárhagslegu forsendum sem ákvörðuninni er ætlað að byggja á og því hvernig kostnaði við mögulega yfirfærslu verkefna verður skipt milli ríkis og borgar.
Greinargerð fylgir breytingartillögunni.
Breytingartillagan er felld með þrettán atkvæðum borgarfulltrúa Samfylkingarinnar, Framsóknar, Pírata og Viðreisnar gegn tíu atkvæðum borgarfulltrúa Sjálfstæðisflokksins, Sósíalistaflokks Íslands og Flokks fólksins og Vinstri grænna.
Forseti ákveður samkvæmt ósk borgarfulltrúa Sjálfstæðisflokksins, Sósíalistaflokks Íslands, Flokks fólksins og Vinstri grænna að fram fari nafnakall um tillögu borgarstjóra með vísan til 3. mgr. 28. gr. samþykktar um stjórn Reykjavíkurborgar.
Já segja Alexandra Briem, Árelía Eydís Guðmundsdóttir, Dagur B. Eggertsson, Einar Þorsteinsson, Heiða Björg Hilmisdóttir, Hjálmar Sveinsson, Kristinn Jón Ólafsson, Magnea Gná Jóhannsdóttir, Magnús Davíð Norðdahl, Sara Björg Sigurðardóttir, Skúli Helgason, Þorvaldur Daníelsson og Þórdís Lóa Þórhallsdóttir.
Nei segja Friðjón R. Friðjónsson, Helgi Áss Grétarsson, Hildur Björnsdóttir, Kjartan Magnússon, Kolbrún Áslaugar Baldursdóttir, Marta Guðjónsdóttir, Ragnhildur Alda María Vilhjálmsdóttir, Sanna Magdalena Mörtudóttir, Stefán Pálsson og Trausti Breiðfjörð Magnússon.
Tillaga borgarstjóra um framtíðarhögun starfsemi Borgarskjalasafns er samþykkt.
Bókun Flokks fólksins undir liðnum:
Borgarstjóri er að gera mistök með því að leggja niður Borgarskjalasafn undir merkjum sparnaðar. Borgarstjóri er að fylgja eftir vondri og eiginlega óskiljanlegri ráðgjöf. Borgarskjalasafn heyrir undir sviðsstjóra þjónustu- og nýsköpunarsviðs sem er sérkennilegt þar sem það svið hefur það hlutverk að styðja við svið og stofnanir borgarinnar en ekki ráðskast með þær eða leggja niður. Meintur sparnaður við aðgerðina er stórlega ýktur. Alvarlegar athugasemdir eru gerðar við kostnaðarmat í skýrslu KPMG af borgarskjalaverði. Kostnaðurinn er uppblásinn og kostnaðarliðir eins og rekstri og kostnaði við byggingu blandað saman. Fullyrt er af starfsfólki að farið var á svig við samráð og samvinnu við starfsmenn og borgarskjalavörð og kom ákvörðun um niðurlagningu eins og blaut tuska í andlit þeirra. Lítil framtíðarsýn er um hvað gera eigi við þau gríðarlegu verðmæti sem safnið heldur utan um og þjónustuna sem það veitir. Í skýrslunni er gert ráð fyrir að verja þurfi milljörðum í skrifstofur fyrir safnið þar sem það eigi að víkja úr Grófinni. Miðað er við áratuga greiningu á húsnæðisþörf fyrir tíma stafrænnar geymslu. Þetta stendur allt í skýrslu KPMG án þess að rætt hafi verið við borgarskjalavörð um málið sem hlýtur að þekkja þarfir þess best. Að baki þessum gjörningi liggur eitthvað allt annað en sparnaður.
Bókun Flokks fólksins undir liðnum: Fram fer umræða um hlutverk Borgarskjalasafns Reykjavíkur ÞON:
Meirihlutinn í borgarstjórn hefur lagt niður Borgarskjalasafn. Allir í minnihluta greiddu atkvæði gegn tillögunni. Til grundvallar er skýrsla KPMG. Sagt er að gjörningurinn sé til að spara sem einfaldlega stenst ekki. Þegar ávirðingar á einhvern starfsmann eða stofnun í skýrslu sem þessari eru settar fram án þess að gefa viðkomandi aðila tækifæri til að tjá sig um málið þá er verið að brjóta stjórnsýslulög. Fulltrúa Flokks fólksins finnst það ófagmannlegt að birta slíkar ávirðingar, í keyptri milljóna skýrslu, án þess að andmælaréttur viðkomandi sé virtur. Að baki liggur eitthvað allt annað en sparnaður. Rekstur Borgarskjalasafns kostar nálægt 7,5% af þeim fjármunum sem hafa runnið til starfsemi þjónustu- og nýsköpunarsviðs á hverju ári að undanförnu svo það dæmi sé tekið til samanburðar (200 milljónir á móti þremur milljörðum). Hvað fjármuni varðar þá er enginn vandi að fá út háar fjárhæðir ef nógu mörgum árum er hrært saman. Rekstur Borgarskjalasafns kostar ekki mikið. Laun undir 100 milljónum króna á ári og annar kostnaður um 100 milljónir á ári. Ekkert af þessu var borið undir borgarskjalavörð. Allt yfirbragð KPMG skýrslunnar hefur það að markmiði að komast að tiltekinni niðurstöðu, að leggja Borgarskjalasafnið niður í núverandi mynd.
Bókun Flokks fólksins undir liðnum: Lögð fram fundargerð borgarráðs frá 2. mars. MSS23010001
Borgarfulltrúi Flokks fólksins leggur fram svohljóðandi bókun undir 11. og 19. lið fundargerðar borgarráðs frá 2. mars:
Liður 11: Regluvörður hefur óskað eftir því við þjónustu- og nýsköpunarsvið að útbúa rafræna lausn við söfnun upplýsinga um innherjaskráningar frá starfsmönnum og kjörnum fulltrúum til að einfalda skráningu. Beiðnin er enn í bið hjá þjónustu- og nýsköpunarsviði og óvíst hvort eða hvenær hún verður afgreidd. Hér er einmitt vandamál sviðsins í hnotskurn. Það eru fleiri sem kvarta sáran yfir hægagangi hjá sviðinu með ýmsar lausnir. Liður 19: Niðurlagning Borgarskjalasafns. KPMG skýrslan er ekki vandað plagg að mati Flokks fólksins. Niðurstaðan er pöntuð. Flokkur fólksins telur að borgarstjóri og hans fólk séu fyrir löngu búin að ákveða að leggja niður Borgarskjalasafn og fengið KPMG til að leiða að þeirri niðurstöðu í skýrslunni. Einungis voru höfð tvö viðtöl við borgarskjalavörð og teymisstjóra eftirlits og rafrænna skila. Ekkert hefur verið fundað með öllum starfsmönnum Borgarskjalasafns, engir stefnumótunar- eða verkefnafundir haldnir með starfsmönnum. Greinendur hafa ekki kynnt sér ítarlega verkefni eða störf safnsins. Hér er ekki um neina stefnumótunarvinnu að ræða heldur er aðeins keyrt áfram og yfir alla sem málið varðar. Skýrslan er neikvæð, full af ávirðingum gagnvart borgarskjalaverði. Flokkur fólksins telur að borgarstjóri eigi umsvifalaust að draga þessa tillögu til baka og biðja starfsfólk Borgarskjalasafns afsökunar.
Bókun Flokks fólksins undir liðnum: Lagðar fram fundargerðir forsætisnefndar frá 3. mars, menningar-, íþrótta- og tómstundaráðs frá 28. febrúar, skóla- og frístundaráðs frá 20. febrúar, stafræns ráðs frá 22. febrúar, umhverfis- og skipulagsráðs frá 1. mars og velferðarráðs frá 1. mars. MSS23010061
Borgarfulltrúi Flokks fólksins leggur fram svohljóðandi bókun undir 5. og 6 lið fundargerðar stafræns ráðs frá 22. febrúar:
Liður 5: Í svari sviðsins segir að Gartner og Bloomberg ásamt John Hopkins háskólanum hafi verið að leita út um allan heim eftir viðurkenndum mælikvörðum sem mæla ávinning stafrænnar umbreytingar en án árangurs. Þrátt fyrir það ákvað sviðið að eyða bæði tíma og fjármunum í að leita þessara mælikvarða innanlands sem utan. Það er í raun með ólíkindum hversu langt þjónustu- og nýsköpunarsvið virðist ætla að ganga í leit sinni að mælikvörðum til að mæla sjálft sig. Það hljóta að vera góðar og gildar ástæður fyrir því að engar aðrar borgir í heiminum séu að eyða tíma í svona lagað. Það á ekki að vera hlutverk þjónustu- og nýsköpunarsviðs að sjá um úttektir á meintri arðsemi sjálfs síns heldur er það hlutverk óháðra ytri aðila. Liður 6: Á sama tíma og þjónustu- og nýsköpunarsvið heldur fram að engir mælikvarðar séu til í veröldinni til að mæla ábata stafrænna umbreytinga, er fullyrt að „góður og vandaður undirbúningur þar sem m.a. lögð er áhersla á að draga fram og skilja raunverulegar þarfir notenda hefur ítrekað sýnt sig að vera mjög hagkvæm nýting á tíma og fjármunum.“ Svör sviðsins eru eins og oft áður, meira í takt við hentugleika hverju sinni en raunveruleika.