Frétt í DV birt 29. maí 2021
Kolbrún Áslaugar Baldursdóttir, borgarfulltrúi Flokks fólksins, gerði starfsánægju í Slökkviliðinu á höfuðborgarsvæðinu að umræðuefni á fundi forsætisnefndar borgarinnar í gær en þá var voru kynntar þar niðurstöður starfsánægjukönnunar sem gerð var í nóvember í fyrra. Útkoman í könnuninni er slæm og töluvert lakari en útkoman í starfsánægjukönnun sem birt var sumarið 2019. Sú niðurstaða þótti þó líka vera áfall.
Í könnuninni er spurt meðal annars hvort starfsmenn eigi gott með að samræma vinnu og einkalíf. Spurt er hvort hlustað sé á hugmyndir þeirra, hvort yfirmenn veiti gagnlega og uppbyggilega endurgjöf, og um samskipti á vinnustaðnum.
Hæsta einkunn fyrir hverja spurningu er 5,0. Niðurstöðum er skipt í þrjá litaflokka, þar sem einkunnir 4,20-5,00 tákna mjög góðan árangur, einkunnabilið 3,70 til 4,19 er góður árangur og 1,00 til 3,69 er meðalgóður árangur og þar undir.
Í könnuninni árið 2019 var meðaleinkunnin í efstu lögum rauða svæðisins, eða 3,68, og þótti áhyggjuefni. Núna er einkunnin komin niður í 3,16.
Lengi hefur borið á óánægju slökkviliðsmanna á höfuðborgarsvæðinu, meðal annars vegna samskipta við yfirmenn, auk þess sem kvartað hefur verið undan undirmönnun og mikilli óánægju lýst yfir svokölluðum krossvöktum, en þá eru starfsmenn skráðir á vakt á slökkviliðs- og sjúkrabíl samtímis.
Kolbrún Áslaugar Baldursdóttir segir að hvergi skipti meira máli að starfsmenn upplifi jákvætt viðmót yfirmanna en í slökkviliði þar sem starfsmenn séu oft í lífshættu við störf sín. Hún minnir á ábyrgð borgarstjóra yfir þessum þessum vinnustað en vandinn hafi líklega gegnsýrt slökkviliðið árum saman. Hún veltir einnig fyrir sér hvort slökkviliðsstjóri þurfi að segja af sér. Bókun hennar í forsætisnefnd um málið er eftirfarandi:
„Sú starfsánægjukönnun Slökkviliðsins á höfuðborgarsvæðinu sem lögð er hér fram lýsir óviðunandi ástandi í starfsmannamálum slökkviliðsins. Skýrslan spannar tímabilið frá maí 2019 til nóvember 2020. Lengi vel hefur heyrst af mörgum líður illa á þessum vinnustað en engan óraði fyrir slíkri útkomu. Allir kvarðar eru á eldrauðu ef svo má að orði komast. Óánægja er með starfshætti og samskipti við yfirmenn.
Fulltrúi Flokks fólksins hefur kallað eftir nánari upplýsingum m. a. um fjölda eineltistilkynninga og um hvort niðurstöður starfsánægjukönnunarinnar hafi verið ræddar meðal starfsmanna og hvort liggi fyrir viðbrögð þeirra við henni. Einnig veltir fulltrúi Flokks fólksins fyrir sér hvernig starfsandinn sé núna og hvernig samskipti ganga við yfirmenn. Þeirri spurningu er velt upp hvort slökkviliðsstjóri þurfi ekki hreinlega að segja af sér enda sá aðili sem er ábyrgur fyrir ástandinu?
