Umhverfis- og skipulagsráð 10. apríl 2024

Bókun Flokks fólksins undir liðnum: Lögð fram að nýju tillaga fulltrúa ungmennaráðs Vesturbæjar, Miðborgar og Hlíða, sbr. 1. liður fundargerðar borgarstjórnar og Reykjavíkurráðs ungmenna, dags. 27. febrúar 2024, sem vísað var til meðferðar umhverfis- og skipulagsráðs. Tillaga ungmennaráðsins er svo hljóðandi:

Fulltrúi Flokks fólksins styður heilshugar þessa tillögu Ungmennaráðsins um hækkun launa í Vinnuskóla Reykjavíkur. Laun ungmenna sem starfa í Vinnuskóla Reykjavíkur hafa verið langt undir því sem unglingar fá í öðrum sveitarfélögum fyrir sambærileg störf. Kallað er eftir því að unglingum sé ekki mismunað eftir því hvar þeir búa, jafnræði sé tryggt og að laun í Vinnuskólanum fylgi launaþróun í landinu. Fulltrúi Flokks fólksins telur mikilvægt að hlúa að vinnuskólanum að öllu leyti. Vinnuskólinn þjónar mikilvægu hlutverki. Meginhlutverk Vinnuskólans er að veita nemendum úr efstu bekkjum grunnskóla uppbyggileg sumarstörf, fræðslu og tækifæri til að starfa við fjölbreytt verkefni sem flest snúa að garðyrkju og umhirðu í borginni. Laun í Vinnuskólanum þurfa að vera vísitölutengd enda ekki annað sanngjarnt. Þótt verðbólga sé eitthvað að síga niður má ætla að langur tími sé í einhvern viðvarandi stöðugleika í efnahagslífinu. Laun þessa hóps eiga að lúta almennum verð- og kjarabótum eins og laun annarra í samfélaginu. Umhverfis-og skipulagsráð lagði til hækkun launa sem ber að fagna en Flokkur fólksins hefði viljað að sjá breytingar tillögu Sjálfstæðisflokksins samþykkta þar sem laun hefðu hækkað meira þ.e. í samræmi við breytingar á launavísitölu frá því að síðasta launahækkun tók gildi vorið 2022.

 

Bókun Flokks fólksins undir liðnum: Að lokinni grenndarkynningu er lögð fram að nýju umsókn Plúsarkitekta ehf. og Fring ehf., dags. 3. nóvember 2022, um breytingu á deiliskipulagi Skúlagötusvæðis vegna lóðarinnar nr. 14 við Lindargötu:

Þetta hverfi er nú þegar frekar skuggsýnt og jafnvel á köflum drungalegt. Þétting byggðar hefur ekki komið vel út þarna. Þröngt er á milli húsa og þrengsl víða. Bein áhrif breytinga eru á einstaka íbúðir. Athugasemdir eru ekki margar en snúa að áhyggjum af því að birtuskilyrði í íbúðum muni skerðast með tilkomu ofanábyggingar sökum nálægðar hennar. Ennfremur muni útsýni og kvöldsól skerðast. Ofanábyggingin að Lindargötu 14 mun fá mikið útsýni á kostnað þeirra sem eru að missa útsýni sem þeir hafa núna. Einnig mun við ofanábygginguna og væntanlegri tilkomu svala á breyttu húsnæði skapast innsýn inn í núverandi íbúðir sem ekki var til staðar áður eins og segir í athugasemdum. Fulltrúi Flokks fólksins leggur höfuðáherslu á að birta sé ekki skert. Skerðing birtu getur gjörbreytt íbúð sérstaklega smáum búðum. Birta í híbýlum hefur mikil áhrif á andlega líðan fólks. Í svari við athugasemdum segir að “við þéttingu byggðar má búast við því að útsýni úr einstökum húseignum geti tekið breytingum og að nýbyggingar geti haft í för með sér innsýn inn í íbúðir sem fyrir eru.” Þetta eru engin rök að mati fulltrúa Flokks fólksins. Komin er fram málamiðlunartillaga og vonar Flokkur fólksins að málið fái góðar málalyktir.

 

Bókun Flokks fólksins undir liðnum:  Lögð fram skipulagslýsing umhverfis- og skipulagssviðs, skipulagsfulltrúa, dags. í apríl 2024, vegna nýs deiliskipulags við Malarhöfða í Reykjavík, á landnotkunarsvæði M4 í Aðalskipulagi Reykjavíkur 2040.

Um er að ræða nýtt deiliskipulag við Malarhöfða í Reykjavík þar sem ekkert deiliskipulag er í gildi á svæðinu. Segir í gögnum að uppbyggingu á Ártúnshöfða við Elliðaárvog býðst einstakt tækifæri til að glæða lífi í gamalt iðnaðarhverfi og umbreyta því í spennandi og vistvænt hverfi. Benda má á í þessu sambandi að einföld leið til að byggja upp skemmtileg hverfi er að sjá til þess að félagsleg blöndun geti átt sér stað. Þetta má gera með því að hafa kvaðir um meðalstærð íbúða. Þannig að ef meðalstærð sé ákvörðuð af skipulagsyfirvöldum að eigi að vera 100 ferm, leiði það til þess að ef byggð er 150 ferm íbúð þurfi einnig a byggja aðra sem er 50 ferm. Fjölbreytni í húsakosti stuðlar að félagslegri blöndun sem skapar skemmtilegt samfélag.

 

Bókun Flokks fólksins undir liðnum: Lögð fram fundargerð frá fundi stjórnar Reykjanesfólkvangs, dags. 22. mars 2024. USK24020008

Í raun liggur engin sérstakur rökstuðningur fyrir því af hverju Reykjavík vill segja sig úr Reykjanesfólkvanginum. Það er svo sem kannski engin ástæða fyrir Reykjavík að taka þátt í þessu samstarfi þar sem fólkvangurinn er fjarri Reykjavík en Reykjanesfólkvangur er á sunnanverðum Reykjanesskaga, milli Vesturháls í vestri og að sýslumörkum Árnessýslu í austri og niður að sjó. Norðan megin liggja mörk hans meðfram Heiðmörk og Bláfjallafólkvangi. Að honum standa 7 sveitarfélög; Reykjavík, Seltjarnarnes, Kópavogur, Garðabær, Hafnarfjörður, Grindavík og Reykjanesbær.

 

Bókun Flokks fólksins undir liðnum:  Lögð fram að nýju fyrirspurn áheyrnarfulltrúa Flokks fólksins um Laugarásveg og öryggismál götunnar, sbr. 25. liður fundargerðar umhverfis- og skipulagsráðs, dags. 6. september 2023. Einnig lagt fram svar skrifstofu samgangna og borgarhönnunar dags. 4. apríl 2024. USK23090041

Þessi fyrirspurn er eldgömul eða frá því í sept. 2023. Ítrekað hafði Flokkur fólksins bent á að þótt fjölmargar ábendingar hafi borist þá var lengi vel ekki brugðist við til að styrkja öryggi á Laugarásvegi. Fulltrúi Flokks fólksins var farinn að verða uggandi um að slys gæti átt sér stað og hvort ekki ætti að byrgja brunninn áður en barnið fellur í hann. Búið er að mála götuna en það væri mjög fínt að fá skilti sem sýnir 30 km. hraða. Af hverju er ekki hægt að setja skilti. Það er sérkennilegt að segja að skilti séu eingöngu þar sem svæði á ákveðnum hraða byrjar og endar. Nauðsynlegt er að hafa allar þær merkingar sem bjóðast, hraðahindranir og skilti. Meðalhraðinn þarna er vel yfir 30 og mesti hraðinn mjög mikill þannig þetta er greinilega hættuleg gata.

 

Bókun Flokks fólksins undir liðnum:  Lögð fram að nýju fyrirspurn áheyrnarfulltrúa Flokks fólksins um viðhorfskönnun Maskínu um göngugötur 2023, sbr. 20. liður fundargerðar umhverfis- og skipulagsráðs, dags. 13. september 2023. Einnig lagt fram svar skrifstofu samgangna og borgarhönnunar dags. 2. apríl 2024 USK23090134

Hér er loks verið að svara fyrirspurn sem lögð var fram í september 2023 eða fyrir 7 mánuðum. Spurt var um kostnað könnunar Maskínu og óskað var eftir upplýsingum aftur í tímann. Í svari kemur fram að heildarupphæð greiddra reikninga vegna kannana um göngugötur frá árinu 2017 er 2.927.419 kr. þar af var kostnaður við gerð könnunar 2023 609.615 kr. Flokkur fólksins áttar sig ekki á þessum sífelldu könnunum sem sýna ár eftir ár að mestu sömu niðurstöður. Um er að ræða umtalsverðar upphæðir sem betur væri notað í annað en að borga fyrir að fá sömu svörin ár eftir ár. Í þessu tilfelli vitum við vel að þeir sem búa fjarri miðbænum og eru eldri eru neikvæðir gagnvart göngugötu og þeir sem búa nær og eru yngri eru jákvæðari gagnvart göngugötum. Hér er ekki um nein geimvísindi að ræða og engan nýjan sannleik heldur. Í raun er hér fátt nýtt undir sólinni.

 

Lögð fram að nýju fyrirspurn áheyrnarfulltrúa Flokks fólksins, sbr. 28. liður fundargerðar umhverfis- og skipulagsráðs, dags. 3. apríl 2024, um breytingar á sorpgerði í Bólstaðarhlíð. Greinargerð fylgir fyrirspurn.

Vísað til umsagnar umhverfis- og skipulagssviðs, skrifstofu umhverfisgæða. USK24040021

 

Bókun Flokks fólksins undir liðnum:  Lögð fram að nýju tillaga áheyrnarfulltrúa Flokks fólksins um gönguljós á Miklubraut á móts við Klambratún/Kjarvalsstaði, sbr. 22. liður fundargerðar umhverfis- og skipulagsráðs, dags. 10. maí 2023. Einnig lögð fram umsögn skrifstofu samgangna og borgarhönnunar dags. 2. apríl 2024.

Flokkur fólksins lagði til að koma á snjallljósum við gönguljósið á Miklubraut á móts við Klambratún. Í umsögn eru talin upp mörg vandamál við að bæta flæði við gönguljósin. Talið er að ekki sé hægt að bæta úr flæðinu vegna umferðar öryggissjónarmiða. Tillagan er því felld. Fulltrúa Flokks fólksins finnst þetta mjög miður því þessi gönguljós valda miklum umferðartöfum. Þetta er ólíðandi aðstæður fyrir alla svo ekki sé minnst á mengun meðan bílar bíða. Fulltrúi Flokks fólksins telur að fyrst ekki er talið óhætt að bæta ljósastýringu þarna þá verði að horfa til annarra lausna eins og til dæmis að staðsetja göngubrú á þessu svæði.

 

Bókun Flokks fólksins undir liðnum: Lögð fram að nýju tillaga áheyrnarfulltrúa Flokks fólksins um að samin verði reglugerð um sektir og/eða önnur viðurlög vegna skotæfingasvæðisins á Álfsnesi, sbr. 14. liður fundargerðar umhverfis- og skipulagsráðs dags. 17. janúar 2024. Einnig er lögð fram umsögn umhverfis- og skipulagssviðs skrifstofu stjórnsýslu og gæða, dags. 27. mars 2024. Tillögunni er vísað frá með fjórum atkvæðum fulltrúa Samfylkingarinnar, Framsóknar, Pírata og Viðreisnar. Fulltrúar Sjálfstæðisflokksins sitja hjá við afgreiðslu málsins. USK24010168

Tillaga Flokks fólksins gekk út að samin verði reglugerð um sektir og eða önnur viðurlög ef settum reglum á skotæfingasvæðinu er ekki framfylgt. Í umsögn um málið er ekki tekið undir þessa tillögu og lagt er til að henni verði vísað frá. Talað er nokkuð eins og að engum dytti í hug að brjóta þessar reglur og því engin þörf sé á viðurlögum. Vísað er til rekstraraðila og að honum sé skylt að fylgja ákvæðum starfsleyfisskilyrða. Fram kemur að brot á leyfilegum opnunartíma geti varðað við starfsleyfissviptingu en hvað með brot á reglum um hávaðamengun og banni við blýhöglum. Hver á að fylgjast með því? Staðfest er að andfuglar á svæðinu eru með blýhögl í sér svo einhverjir eru að brjóta þessar reglur. Halda á íbúafund 10. apríl. Fulltrúi Flokks fólksins upplifir að íbúum sé nóg boðið og þeir löngu uppgefnir á þessu stríði við Reykjavíkurborg. Þær breytingar sem hér eru lagðar til, að skapa skilyrði fyrir skotæfingar, bera merki um hversu kappsamur meirihlutinn er að þjóna þessum hópi fólks sem vill skjóta. Aðstaða á svæðinu hefur verið byggð upp og kostuð af Reykjavíkurborg. Allt þetta ferli er borginni til skammar.

 

Bókun Flokks fólksins undir liðnum:  Lögð fram að nýju svohljóðandi tillaga áheyrnarfulltrúa Flokks fólksins um að skíðagöngubraut verði meðfram vegi en ekki við garða íbúa í efra Breiðholti, sbr. 45. liður fundargerðar umhverfis- og skipulagsráðs, dags. 28. júní 2023. Einnig lögð fram umsögn skrifstofu samgangna og borgarhönnunar dags. 3. apríl 2024.

Tillögunni er vísað frá með fjórum atkvæðum fulltrúa Samfylkingarinnar, Framsóknar, Pírata og Viðreisnar. Fulltrúar Sjálfstæðisflokksins sitja hjá við afgreiðslu málsins.

Jákvætt er að hugmyndir að gönguskíðabraut yfir gróið svæði nálægt íbúabyggð í Seljahverfi séu ekki bindandi. Nú þegar hefur gríðarlegt rask orðið af framkvæmdunum við Arnarnesveg á hæðinni með tilheyrandi eyðileggingu á náttúru.Það er mikilvægt að vernda það sem eftir er af þessu dýrmæta græna svæði. Ef gera á gönguskíðabraut þá er eðlilegast að sú braut liggi inn á svæði Vetrargarðsins, eða þá við göngustíga. Íbúar vilja sjá teikningar sem fyrst sem útskýra hvernig þetta ótrúlega mikla magn af jarðvegi sem hefur verið safnað í fyrrverandi skíðabrekkuna, mun vera nýtt í nýjan Vetrargarð. Sandrok hefur verið á vindasömum dögum vegna þessa nýja fjalls, sem hefur valdið íbúum ónæði.