Bókun Flokks fólksins undir liðnum: Sundin (leiðrétt bókun meirihlutans), Dyngjuvegur 18, Sunnuás
Eitt og annað í þessu máli Sunnuásar fer fyrir brjóstið á fólki og má nefna hvort ekki hefði átt að leggja fyrst fram frumdrög að teikningum svo nágrannar geti betur tekið afstöðu til deiliskipulagsbreytingarinnar? Eins og staðan er í dag, þá eru engin stæði ekki einu sinni sleppistæði við innganginn að leikskólanum við Laugarásveg. Þess vegna myndast alltaf umferðarteppur þegar foreldrar reyna að leggja annað hvort á Laugarásvegi sjálfum eða hálf uppi á gangstéttinni við Laugarásveg. Mikilvægt er að staðið verði að uppbyggingu við Dyngjuveg 18, með þeim hætti að það valdi íbúum í nágrenninu sem minnstu ónæði. Þá er nauðsynlegt að bæta við fleiri bílastæðum á í tengslum við breytingarnar en nú er áformað. Nú þegar eru of fá bílastæði á svæðinu miðað við þá starfsemi sem þar er og ríkir vandræðaástand af þeim sökum. Mörgum öðrum spurningum er ósvarað. Er t.d. áætlað að rífa aðeins Laugarásveg 77 eða á einnig að rífa Dyngjuveg 18 áður en uppbygging hefst? Mun uppbyggingin ekki auka bílastæðaþörf á svæðinu enn frekar? Þetta ætti að kanna nánar áður en endanlegt fyrirkomulag bílastæða er ákveðið. Eða stendur til að breyta Sunnutorgi í bílastæði fyrir leikskólann ef fyrirætlanir um endurbyggingu Sunnutorgs renna út í sandinn? Áhyggjur eru af því að leikskólinn verði „sprunginn“ um leið og endurbótum lýkur? Það virðist ekki vera nein leið til að uppfylla bílastæðaþörfina (31 stæði) án þess að fjarlægja tímabundnu færanlegu einingarnar þegar framkvæmdum lýkur. Ekki gengur að bílastæðaþörfin sé uppfyllt með því að nota bílastæði íbúa í götunum til frambúðar, þótt það sé þolanlegt á meðan endurbótum stendur.
Bókun Flokks fólksins undir liðnum: Lögð fram að nýju fyrirspurn áheyrnarfulltrúa Flokks fólksins um niðurtekin plaköt, sbr. 20. liður fundargerðar umhverfis- og skipulagsráðs, dags. 9. október 2024. Einnig er lagt fram svar umhverfis- og skipulagssviðs, dags. 6. nóvember 2024. USK24100107
Flokkur fólksins óskaði upplýsinga um hvar Sundabraut á nákvæmlega að liggja og einnig hvort talið er að lagning Sundabrautar í einhverri mynd verði hafin innan 8-10 ára, fyrr en það eða seinna. Spurt er í ljósi þess að stýrihópur er að störfum sem ekkert heyrist frá og óttast er að þeir sem skipa hann séu einfaldlega ekki einu sinni sammála um hvort leggja eigi Sundabraut. Ekki er gott að í slíkum hópi séu mögulega einhverjir sem vilja spyrna fótum við framkvæmdinni. Staðfest er að endanleg og nákvæm lega Sundabrautar er ekki enn ákvörðuð. Þar með stendur margt annað fast. Það liggur á þessari ákvörðun til að hægt sé að teikna upp önnur framkvæmdarsvæði í nágrenni brautarinnar. Sundabraut og tenging hennar við framtíðarbyggð á Geldinganesi þarf líka að skoða og ákvarða hvernig verði. Þar þyrftu t.d. sennilega að vera mislæg gatnamót. Hvernig væri að spýta í lófana. Sundabraut hefur verið í umræðunni í um 40 ár og sú tímalína sem nú liggur fyrir er að hún muni ekki sjá dagsins ljós fyrr en eftir 2030.
Bókun Flokks fólksins undir liðnum: 21. Lögð fram að nýju fyrirspurn áheyrnarfulltrúa Flokks fólksins sbr. 30. liður fundargerðar umhverfis- og skipulagsráðs 7. febrúar 2024 um Gufunes. Einnig er lagt fram svar skipulagsfulltrúa dags. 7. nóvember 2024. USK24020066
Flokkur fólksins óskaði upplýsinga um m.a. hvernig standi á því að Reykjavíkurborg hafi ítrekað frestað kynningum á 2. áfanga Gufuness og hvort það sé rétt að stækka eigi kvikmyndaþorp á kostnað 400 íbúðauppbyggingu? Ekki er öllum spurningum svarað t.d. hvort ákveðið sé að víkja frá verðlaunatillögu vegna Gufuness og af hverju ekki var rætt við aðila áður en farið var í að grafa upp rafmagnsstrengi? Steininn tekur úr þegar sagt er að skipulagsyfirvöld hafi ekkert vitað um rafmagnsleysi. Tilkynning kom aðeins þremur klukkutímum áður en hús voru gerð rafmagnslaus í Gufunesi. Loftkastalinn, var skilinn eftir rafmagnslaus í 19 tíma, einmitt þegar 15 nemendur í meistaranámi í kvikmyndagerð í Listaháskóla íslands voru í upptöku. Ekkert í svarinu gefur til kynna að samráð sé haft og upplýsingaflæði er lítið ef nokkuð. Segir í svari að skipulagsvinna fyrir 2. áfanga Gufuness standi yfir en hún sé flókin. Það skortir greiningu á þörfum framleiðslufyrirtækja í kvikmyndagerð og tímaáætlanir ekki nefndar. Talað er um að bráðbirgðaaðkomuvegur að starfsemi í Gufunesi eigi að bæta aðgengi að allri starfsemi á svæðinu sem er auðvitað fráleitt. Þarna er á ferð all mikil ringulreið, óvissa og tengslaleysi við íbúa á svæðinu. Í svarinu birtist augljós vandræðagangur.
Lögð fram að nýju fyrirspurn áheyrnarfulltrúa Flokks fólksins um verkefni borgarinnar í umhverfismálum sl. 4 ár, sbr. 36. liður fundargerðar umhverfis- og skipulagsráðs, dags. 6. nóvember 2024.
Vísað til umsagnar umhverfis- og skipulagssviðs, skrifstofu umhverfisgæða. USK24110057
Ný mál
Fulltrúi Flokks fólksins leggur til að farið verði í grundvallar endurskoðun á uppbyggingaráformum í Grafarvogi og það sé gert með íbúum hverfisins. Íbúar Grafarvogs eru mjög óánægðir með fyrirliggjandi drög hönnuðum af skipulagsyfirvöldum.
Greinargerð
Þétta á of mikið og þær hugmyndir sem liggja fyrir eru í engum takti við núverandi byggð og ekki heldur í samráði við íbúa. Allt of fá bílastæði verða ef þessar tillögur ná fram að ganga og lítið hugsað um innviði. Það skýtur auðvitað skökku við að borgarstjóri segi að það verði að byggja af því að það vantar land. Sami aðili og neitar að brjóta nýtt land undir byggð. Byggja mætti meira í Úlfarsárdal og á Kjalarnesi og hefja byggingu Geldinganess þegar lega Sundabrautar er ákvörðuð. Það gengur ekki að ganga á græn svæði í þegar byggðum hverfum og halda að Kirkjugarðurinn í Grafarvogi sé nóg “sem grænt svæði í hverfinu”.
Fyrirspurn Flokks fólksins um friðlýsingarmörk og uppbyggingar Keldnalandsins
Óskað er upplýsinga um hvers vegna meirihlutinn hafni því að samþykkja friðlýsingarmörk í Grafarvogi. Í meirihlutanum er flokkarl sem hafa lagt mikið upp úr því að vera umhverfisvænir. Þetta er gert jafnvel þótt ýmis samtök og stofnanir, má þar nefna Umhverfisstofnun, ALTA ráðgjafar o.fl. hafi sagt að Grafarvogur fyrir innan Gullinbrú sé ein af mestu náttúruperlum Reykjavíkur og fuglalíf þar og leirur einstakar. Umhverfisráðherra hefur lagt til að friðlýsing svæðisins verði færð frá fjöru og upp að göngustíg, auk þess sem leirur í austri upp Grafarlæk yrðu friðaðar.
Óskað er upplýsinga um af hverju meirihlutinn hefur ekki gert athugasemdir við tillögu FOJAB arkitekta að byggja eigi bryggju yfir leirur og gera göngustíg út í sjó þar sem á að vera útsýnispallur í miðju leirunnar. Slíkt getur ekki annað en haft neikvæð áhrif á fuglalíf staðarins. Spurt er, er þetta sú sýn sem að meirihlutinn hefur um uppbyggingu þessa svæðis?. Hér þarf að hugsa lengra en nef nær og gæta að eyðileggja ekki náttúru og lífríki. Lífríki Grafarvogs vildu flestar borgir í Evrópu leggja allt í sölurnar til að vernda.
Fyrirspurn frá Flokki Fólksins vegna uppbyggingar Grafarvogs
Nú hefur borgarstjóri sagt að það verði að þétta Grafarvog og byggja Keldnalandið vegna þess að það vanti byggingarland. Spurt er, ef það vantar svona mikið land til byggingar, af hverju neitar Reykjavíkurborg Kópavogi um að fara af stað með nýtt byggingarsvæði? Af hverju er dregið að byggja upp á Kjalarnesi þar sem að íbúar vilja meiri byggð til að byggja upp innviði? Afhverju er ekki byggt meira í Úlfarsárdal? Afhverju ekki að byggja Geldingarnesið? Flokkur fólksins hafnar því að það þurfi að ofurþétta Grafarvog á sama tíma og margir aðrir kostir eru í stöðunni til að auka byggingarmagn. Það er mat Flokks fólksins að gengið sé of langt í þessari þéttingu.