Tillag borgarfulltrúa flokks fólksins um sálfræðiaðstoð til starfsfólks og foreldra vegna COVID-19 smita í leik- og grunnskólum.
Flokkur fólksins leggur til að Reykjavíkurborg bjóði foreldrum barna, sem hafa greinst með COVID-19, og starfsmönnum leik- og grunnskóla þar sem upp hefur komið COVID-19 hópsýking, sálfræðihjálp þeim að kostnaðarlausu. Einnig er lagt til að hugað verði sérstaklega að þeim börnum sem hafa smitast af COVID-19 og þeim veitt sálfræðiaðstoð telji foreldrar þörf á. Samkvæmt upplýsingum frá Landlæknisembættinu 27. apríl hafa 426 börn á aldrinum 0-17 ára, með lögheimili í Reykjavík, greinst með COVID-19 hér á landi frá upphafi faraldursins.
Þegar börnin eru annars vegar er öllum illa brugðið. Foreldrar barna sem smitast hafa af COVID-19 hafa án efa fengið áfall og fundið fyrir miklum ótta. Sama má ætla að gerist hjá starfsfólki. Það er brýnt að foreldrum og starfsfólki standi til boða áfallahjálp/sálfræðiaðstoð til að vinna úr þessari erfiðu reynslu. Starfsfólk leik- og grunnskóla hafa verið undir miklu álagi frá upphafi faraldursins. Full ástæða er einnig til að huga að börnunum sem hafa fengið COVID-19. Mörg þeirra hafa hvorki aldur né þroska til að vinna úr áföllum af þessu tagi. Í viðtali við fagaðila gefst þeim tækifæri til að tjá upplifun sína, líðan og hugsanir, hvernig það var að vera í einangrun og koma síðan aftur í skólann eða annað sem hvílir á þeim.
Greinargerð
Vikið er nú nánar að líðan barna sem fengið hafa COVID-19.
Mikið er lagt á börn um þessar mundir. Börn, sem komin eru með aldur og þroska til, hafa vissulega fylgst með heimsfaraldrinum. Börnin hafa fram til þessa mörg hver haft áhyggjur af foreldrum sínum og öfum og ömmum. Hvort sem það er með tilkomu breska afbrigðisins eða ekki þá hefur veiran smokrað sér meira inn í barnahópa svo nú bætast við áhyggjur af eigin heilsu. Ætla má að enn meiri ugg hafi sett að börnum samfara því og þá ekki síst hjá þeim börnum sem hafa fengið COVID-19. Eitt er að heyra fréttir af vágestinum en annað að vera sjálfur í þeim sporum að hafa smitast.
Almennt hefur líðan grunnskólabarna hér á landi farið versnandi og á það jafnt við fyrir faraldurinn og eftir að hann hófst. Þetta má sjá í niðurstöðum kannana sem birtar hafa verið hjá Landlæknisembættinu, Velferðarvaktinni og umboðsmanni barna. Frásögnum barna hefur verið safnað m.a. af umboðsmanni barna og hafa þær gefið sterkar vísbendingar um að áhyggjur hafi aukist. Áhyggjur í tengslum við veiruna eru líklegar til að auka enn meira á vanlíðan þeirra barna sem leið illa fyrir.
Vaxandi vanlíðan barna í Reykjavík og aukning á depurð, kvíða, sjálfsskaða og sjálfsvígshugsunum hefur verið áhyggjuefni lengi. Þau börn sem eru í þessari stöðu hafa ekki öll fengið þá aðstoð sem þau þurfa til að vinna bug á vanlíðan sinni. Þau sem hafa fengið einhverja aðstoð bíða jafnvel enn eftir frekari aðstoð. Það hefur ekki farið framhjá neinum að um 1000 börn bíða á biðlista eftir sálfræðiaðstoð skólaþjónustu og annarri hjálp hjá Skólaþjónustu Reykjavíkurborgar. Börn og ungmenni tala sjálf um skort á aðgengi að sálfræðingum, þjónustu og ýmsum bjargráðum þeim til aðstoðar og stuðnings.
Tillagan er felld með 12 atkvæðum borgarfulltrúa Samfylkingarinnar, Viðreisnar, Pírata og Vinstri grænna gegn 11 atkvæðum borgarfulltrúa Sjálfstæðisflokksins, Sósíalistaflokks Íslands, Miðflokksins og Flokks fólksins.
Borgarfulltrúi Flokks fólksins leggur fram svohljóðandi bókun:
Fulltrúi Flokks fólksins lagði fram tillögu um sálfræðiaðstoð til starfsfólks og foreldra barna sem smitast hafa af COVID-19 sem eru á 5. hundrað barna í Reykjavík. Einnig var lagt til að hugað verði sérstaklega að þeim börnum sem hafa smitast af COVID-19 og þeim veitt sálfræðiaðstoð telji foreldrar þörf á. Tillagan er felld af meirihlutanum með þeim rökum að tillagan bæti engu við þá aðstoð sem nú stendur foreldrum þessara barna og starfsmönnum til boða. Sagt er að hringt hafi verið í þessa foreldra en það er ekki rétt. En hvað með starfsfólkið? Sagt er að samhæfingarteymi hafi verið kallað saman. Hér er farið með rangt mál. Þessu máli er ekki sýnt lágmarksvirðing heldur er notað tækifæri til að hnýta í flutningsmann tillögunnar fyrir að hafa gagnrýnt stjórnun og fjármálasýslu þjónustu- og nýsköpunarsviðs, mál sem tengist þessari tillögu akkúrat ekki neitt. Þessi tillaga varðar foreldra barna sem hafa smitast af COVID-19 og starfsfólk á leik- og grunnskólum þar sem smit hafa komist upp en ekki stjórnunarhætti og fjármálasýslu þjónustu- og nýsköpunarsviðs sem hefur til umráða 10 milljarða í stafræna umbreytingu. Gott væri að fá ca. einn milljarð þar af til að ráða sálfræðinga fyrir foreldra barna sem fengið hafa COVID-19.
Ársreikningurinn
Bókun Flokks fólksins við fyrri umræðu samantekinn ársreikningur Reykjavíkurborgar fyrir árið 2020 (A- og B-hluti):
Samþykkt að vísa ársreikningi Reykjavíkurborgar fyrir árið 2020 ásamt endurskoðunarskýrslum til síðari umræðu sem fer fram á aukafundi borgarstjórnar 11. maí nk.
Árið í fyrra var erfitt ár m.a. vegna COVID. Fjárhagsstaða borgarinnar hefur versnað til muna. Sjá má að veltufé frá rekstri er of lítið. Veltufé frá rekstri er nú 5 ma.kr. en var 12,4 á árinu 2019, og hefur þannig lækkað um meira en helming. Afborganir langtíma skulda og afborganir leiguskulda eru samtals 2,8 ma.kr. Það er s.s. búið að ráðstafa tæpum 3 ma.kr. af veltufé af rekstri og eru þá aðeins eftir 2 ma.kr til að standa undir framkvæmdum, sem þýðir að ef halda á áfram á þessari braut þarf að taka ný lán. Í stað þess að draga seglin saman þegar vind lægir og endurskoða forgangsröðun er haldið áfram að taka lán. Biðlistar eru í sögulegu hámarki og mikið fjármagn sett í annars konar verkefni sem mættu bíða eða hætta við. Tekjustofninn er nú þegar fullnýttur. Langtímaskuldir A-hluta borgarsjóðs eru 64 ma.kr. og hafa hækkað á einu ári um 15%. Verðbólgan er komin í 4,6%. Það var einmitt við svona aðstæður sem margir fóru illa út úr hruninu, þá helst þeir sem voru búnir að þenja lánabogann í botn.
SORPA, Strætó og Félagsbústaðir hafa verið að taka lán með ábyrgð borgarráðs sem þýðir að lendi þau í vandræðum þá verður sótt í A-hluta borgarinnar.
Bókun Flokks fólksins við tillögu að hámarkshraðaáætlun Reykjavíkurborgar sbr. 20. lið fundargerðar borgarráðs frá 29. apríl 2021.
Mikilvægt er að hafa 30 km/klst. hámarkshraða á svæðum þar sem börn fara um, s.s. í nágrenni við skóla. Víða hefur hraði í íbúðagötum verið lækkaður og er það mjög af hinu góða. Þegar horft er til hraðalækkunar og hraðahindrana almennt séð togast á tveir þættir sem stundum er erfitt að samræma, annars vegar að því minni hraði því færri óhöpp en hins vegar að því hægar sem er ekið því minni er afkastageta gatnakerfisins og meiri umferðartafir og svifryksmyndun. Umferðartafir og teppur í borginni er stórt vandamál sem ekki hefur tekist að leysa þrátt fyrir margar nothæfar tillögur. Það dugar því skammt að segja að þeir sem benda á að lækkun hraða þýði verra umferðarflæði og skapi tafir sé byggt á einhverjum misskilningi. Enginn er að halda því fram að hærri hraði leiði alltaf til meiri afkastagetu götu. Margt annað í aðstæðum hverju sinni þarf að taka inn í myndina. Hér þarf því að finna einhvern milliveg og reyna að mæta þörfum sem flestra til að komast sem öruggast og best á milli staða í borginni. Þetta þarf að rýna betur en nú hefur verið gert. Öfgar, í hvora áttina sem er, eru sjaldan af hinu góða.
Bókun Flokks fólksins við tillögu tillaga borgarfulltrúa Sjálfstæðisflokksins um að selja Malbikunarstöðina Höfða:
Það eru þrjár aðrar malbikunarstöðvar virkar og með því að selja Malbikunarstöðina Höfða þarf að tryggja að þær sem fyrir eru kaupi ekki Höfða og komist þannig í einokunarstöðu. Þetta þarf að tryggja til að ekki verði fákeppni á markaði. Að öðru leyti er bæði skynsamlegt og rökrétt að borgin selji malbikunarstöðina. Reykjavíkurborg ætti ekkert frekar að eiga malbikunarstöð en trésmíðaverkstæði.
Bókun Flokks fólksins við umræðu um byggingarstefnu Reykjavíkurborgar. R21050077
Miðbærinn stefnir hratt í að verða aðeins ríkra manna hverfi. Staðan er í dag sú að það skortir mjög íbúðir á hagkvæmu verði. Um 30% fasteignakaupenda eru fyrstu kaupendur en barist er um hverja eign. Í sölu eru nú um 200 íbúðir en þyrftu að vera 900 til að tryggja eðlilegt flæði. Þetta stendur til bóta en það er inni í framtíðinni. Það sem gerist í framtíðinni er ekki að hjálpa þeim sem vantar húsnæði í dag og langar að kaupa íbúð á hagkvæmu verði. Sagt er að húsnæðisstefna snúist um að tryggja öllum húsnæði en það er bara ekki raunin, ekki alla vega í dag.
Bókun Flokks fólksins við fundargerð borgarráðs frá 29. apríl. R21010001. Borgarfulltrúi Flokks fólksins leggur fram svohljóðandi bókun undir 19. lið fundargerðarinnar:
Hér er verið að framlengja göngugötur fram að því að nýtt deiliskipulag sem gerir þennan kafla Laugavegar að varanlegri göngugötu tekur gildi. Þessu fagna ekki allir. Fulltrúi Flokks fólksins hefði viljað sjá meirihlutann í skipulagsmálum bera gæfu til að breyta um taktík í ljósi óánægju með þessar ákvarðanir, ekki síst aðferðafræðina sem beitt hefur verið á fólkið. Samráðsleysið í þessu máli er frægt orðið. Að afgreiða þetta nú með þessum hætti er olía á stórt bál. Það hefði verið bráðupplagt að opna fyrir umferð nú þótt ekki væri nema til að sjá hvort það myndi hjálpa til með mannlífið á Laugavegi og þá ekki síst viðskipti við fleiri hagaðila. Nú er tillagan lögð fram breytt þannig að hún eigi að gilda út þetta ár án þess að samráð hafi verið haft við rekstraraðila um slíka ákvörðun.
Bókun Flokks fólksins við undir 5. og 6. lið fundargerðar skóla- og frístundaráðs:
Fulltrúi Flokks fólksins lagði fram tvær tillögur sem nú hafa báðar verið felldar í skóla- og frístundaráði. Sú fyrri, „að unnið verði markvisst að fækkun nemenda í bekkjum þar sem þess er þörf vegna þess að það hefur sýnt sig í rannsóknum að bekkjarstærð skiptir miklu máli fyrir flesta nemendur.“ Síðari tillagan var „að í stærri bekkjum séu ávallt tveir, kennari og aðstoðarmaður.“ Öll vitum við að nemendur í of stórum bekkjum ná ekki sama námsárangri og aðrir nemendur. Þá hefur bekkjarstærð einnig mikil áhrif á kennara og einnig á börnin. Mikið álag er á mörgum kennurum sem kenna stórum bekkjum þar sem margir nemendur þurfa e.t.v. sértæka aðstoð. Í slíkum bekk er auðvelt fyrir barn sem hefur sig ekki í frammi að „týnast“. Í tilfellum þar sem ekki er ráðið við að fækka nemendum í bekk þar sem þess er þörf skiptir sköpum að kennari hafi aðstoðarmann. Staðan er án efa misjöfn eftir skólum og væri vert að skóla- og frístundasvið myndi kanna með markvissum hætti hvar hún er verst. Það kallar á að rætt verði við skólastjórnendur hvers skóla og kennara og þreifað á því hvort þörf er að grípa til aðgerða s.s. að fækka í ákveðnum bekk/bekkjum eða bæta við aðstoð inn í bekk.