Bókun Flokks fólksins undir liðnum (bókun er sameiginleg) : Fundargerðir Sorpu
Á undanförnum árum hefur verið unnið að nýju deiliskipulagi fyrir íbúðaruppbyggingu við Elliðaárvog, t.a.m. á þeirri lóð þar sem endurvinnslustöð SORPU stendur við Sævarhöfða. Þó því sé sýndur skilningur að flutningur endurvinnslustöðvarinnar við Dalveg geti tekið einhvern tíma að þá getur sú leit ekki orðið til þess að tefja lokun endurvinnslustöðvarinnar við Sævarhöfða og fyrirhugaða íbúðaruppbyggingu við Elliðaárvog.
Bókun Flokks fólksins undir liðnum: Vesturhöfn – Örfirisey:
Ekki er annað sjá en að margar athugasemdir séu gagnlegar fyrir verkefnið-skipulagið og vonandi verður tekið tillit til þeirra. Athugasemdir og ábendingar eru m.a. að göngutenging þarf að vera tryggð bæði á framkvæmdatíma og eftir að framkvæmdum lýkur og að það vantar hjólatengingu frá nýgerðum hjólastíg að versluninni. Nauðsynlegt að setja ríkar kvaðir um aðgengi fyrir gangandi og hjólandi á lóðinni. Bent er á að það væri frábært að breikka göngustíg og nýjan hjólastíg. Það vantar betri aðgengi að hjólastæðum á lóðinni, þegar bíl er lagt í stæði fyrir hreyfihamlaða, er erfitt að komast að stæðunum þar sem það er eini staðurinn þar sem gangstéttarbrúnin er lækkuð. Heilbrigðiseftirlitið hefur áhyggjur af öryggismálum á umferðarþungri verslunar og þjónustulóð.
Bókun Flokks fólksins undir liðnum: Kjalarnes, Hrafnhólar:
Í sjálfu sér ætti borgin ekki að amast við því að jörðin, Kjalarnes, Hrafnhólar sér nýtt með arðbærum hætti en gæta má nokkurra þversagna í meðfylgjandi gögnum. Í skýrslunni frá Fornleifastofnun er lýst að jörðin hentar ekki til búskapar sbr. segir:
”Fornleifar í túni teljast í hættu vegna þess umróts sem fylgir ábúð og búskap og minjastaðir sem eru á svæði þar sem framtíðar landnotkun er óráðin. Í stórhættu teljast minjastaðir þar sem miklar líkur teljast á að stöðum kunni að verða raskað vegna áætlaðs eða fyrirsjáanlegs umróts”.Einnig kemur fram að jörðin sem slík henti illa til hefðbundins búskapar. Í núgildandi aðalskipulagi Reykjavíkur er land Hrafnhóla skilgreint sem landbúnaðarsvæði L1, opin svæði, OP 28. Þar segir meðal annars: “Jafnframt er það markmið aðalskipulagsins að skapa fjölbreytta búsetukosti á landbúnaðarsvæðunum án þess þó að það leiði til þéttbýlisþróunar. Á landbúnaðarsvæðum skal fyrst og fremst gera ráð fyrir íbúðarbyggingum sem tengjast búrekstri á viðkomandi.“
Fulltrúi Flokks fólksins telur að þarna sé því þversögn því að ætlunin sé að styrkja búrekstur þrátt fyrir að ábúð og búskapur raskar mögulega fornleifum í túni.
Bókun Flokks fólksins undir liðnum: Svar við fyrirspurn Flokks fólksins um stöðu á færanlegum leikskólaeiningum, Ævintýraborga:
Samkvæmt svari er framkvæmd Ævintýraborga við Eggertsgötu lokið og við Nauthólsveg á lokafrágangur lóðar að klárast í haust 2024. Ekki kemur fram í svari hvort það næst en haustið er handan við hornið. Í svari segir að Ævintýraborg við Vörðuskóla eigi einnig að klárast í haust en munu þær áætlanir standast? Staðan á þessum málum hefur almennt verið erfið ekki síst vegna þess að börn hefur þurft að færa til vegna myglu og skemmda á húsnæði nokkurra leikskóla í borginni. Þegar sagt er að eitthvað eigi að vera búið að gera í haust er langt frá að borgarbúar viti hvort þeir geti treyst á það. Fyrirspurninni er í raun enn ósvarað. Um er að ræða nýja gámabyggð á bílaplaninu við Vörðuskóla sem getur tekið við allt að 75 börnum frá 12 mánaða aldri. Mörgum spurningum er í raun ósvarað í þessum málaflokki. Ekki er ljóst hvenær viðgerðum verður lokið á þeim leikskólum hafa verið ónothæfir vegna myglu og raka og nú hefur Brákarborg bæst við lista leikskóla sem þarfnast mikilla viðgerðar og endurbyggingar.
Bókun Flokks fólksins undir liðnum: Svar við fyrirspurn Flokks fólksins um stöðu viðgera og viðhalds á leik- og grunnskólahúsnæði Reykjavíkurborgar:
Fulltrúi Flokks fólksins spurði um stöðu viðgerða og viðhalds í leik- og grunnskóla húsnæði Reykjavíkurborgar. Í svari er bent á að finna megi upplýsingar um þetta á vefnum https://reykjavik.is/framkvaemdir
Fulltrúi Flokks fólksins leit á þennan vef og fær þær upplýsingar að engri framkvæmd er lokið 2024 en í framkvæmdarferli eru 11 skólabyggingar og ef smellt er á hvað er framundan má sjá 9 niðurstöður. Af þeim 9 eru 8 byggingar þær sömu sem eru á listanum “skólahúsnæði í framkvæmd”. Uppfærsla upplýsinganna var í flestum tilfellum í júlí. Fulltrúa Flokks fólksins finnst mikilvægt að upplýsingar um verkefni á vegum borgarinnar séu aðgengilegar borgarbúum og lagði þess vegna fram þessa fyrirspurn. Ekki er gott að átta sig á hversu nákvæmar þessar upplýsingar eru sem finna má á umræddum vef.
Mygla og raki hafa fundist í tugum leik- og grunnskóla og hefur gert vonda stöðu enn verri. Í fyrra voru yfir 1.200 grunn- og leikskólabörn í húsnæði utan skólalóðar heimaskóla vegna mygluvandamála, 860 grunnskólabörn og 350 leikskólabörn. Síðan þá hafa líklega bæst við tugi barna ef ekki hundruð.
Bókun Flokks fólksins undir liðnum:
Flokkur fólksins lagði til í upphafi sumars að farið yrðu í nokkrar minniháttar en þó nauðsynlegar viðbætur og lagfæringar en einnig var lagt til að lögð yrðu drög að stærri verkefnum til að tryggja öryggi í umferðinni. Lagt var til að lýsingar við skóla og leikskóla yrðu yfirfarnar og að bæta við sleppistæðum við leikskólann Sunnuás. Tillögunni er vísað frá með þeim rökum að tillögurnar hafi verið of margar og of efnismiklar og nú sé tíminn hvort eð er liðinn sem ætlaður var til vinnslu þeirra eins og segir í bókun meirihlutans. Fulltrúi Flokks fólksins mun leggja aftur fram tillögurnar, hverja í sínu lagi en vill á sama tíma lýsa áhyggjum sínum, nú þegar haust og vetur er handan við hornið og skólar að byrja, hversu slæm lýsing er víða við skóla og leikskóla og minnir á hættur sem myndast fyrir utan þá leikskóla sem ekki hafa næg sleppistæði. Margir kvíða vetri og erfiðri umferð vegna tafa við gönguljós, þar sem betur væri komið að hafa göngubrýr. Lýsingu er einnig ábótavant víða á zebrabrautum á helstu gönguleiðum. Sárlega þarf að koma upp snjallljósum og snjallgangbrautum við skólaleiðir sem og radarskilti og myndavélum til að stjórna hraða í stað hraðahindrana. Margar hraðahindranir passa ekki inn í staðla og alþjóðlegar reglur auk þess sem þeim fylgir mengun og tafir.
Einu máli frestað:
Umsögn um tillögu áheyrnarfulltrúa Flokks fólksins um fjölgun bílastæða við Dalslaug
Bókun sem ekki fór í fundargerð
Flokkur fólksins lagði til að bílastæðum við Dalslaug yrði fjölgað. Tillagan er felld. Í umsögn kemur fram að borgaryfirvöld ákváðu að hafa svona fá bílastæði í upphafi og ætla fólki að koma gangandi. Það er sjálfsagt mál fyrir þá sem búa í göngufjarlægð frá lauginni. En þetta er vinsæl laug og laðar fólk að alls staðar frá sem hvergi finnur síðan bílastæði til að leggja og hefur neyðst til að leggja fyrir utan nærliggjandi íbúðarhús og jafnvel langt frá lauginni. Segir í umsögn að samnýta átti bílastæði við skóla og íþróttahús. Það er auðvitað alger firra. Einnig kemur fram að gera þurfi breytingu á deiliskipulagi til að fjölga bílastæðum. Þegar svona afdrifarík mistök hafa verið gerð í skipulagi er nauðsynlega að gera breytingar og mun Flokkur fólksins leggja til að farið verði þess á leit við lóðarhafa að fjölga bílastæðum við Dalslaug. Á meðan almenningssamgöngur eru eins slæmar og raun ber vitni eru borgarbúar enn háðari einkabílnum. Vonandi hefur verið dreginn lærdómur af þessum mistökum og þess gætt þegar skipuleggja á umhverfi í kringum þjónustu- og afþreyingar mannvirki eins og sundlaug eða íþróttavelli að hafa næg bílasatæði.
Ný mál
Fyrirspurn um mat áhrifa aukinnar umferðar á samgöngumannvirki:
Fulltrúi Flokks fólksins spyr hvort að búið sé að meta áhrif aukinnar umferðar á samgöngumannvirki borgarinnar eins og Ártúnsbrekku og Vesturlandsveg ekki síst í ljósi fyrirhugaðrar uppbygging byggðar í Ártúnshöfða og Keldnalandi sem fjölgar íbúum þar um líklega 30.000 plús. Einnig er spurt hvort að búið sé að reikna út umferðarálag í Reykjavík vegna nýs skipulags? Loks er spurt um aðgerðir Reykjavíkurborgar til að mæta þessum aukna umferðarþunga en ef miðað er við núverandi akstur per íbúa má ætla að samhliða þessari uppbyggingu gæti fjölda bílferða aukast um allt að 30.000 * 3,2 ferðir eða um allt að 100.000 á dag. USK24080120
Fulltrúi Flokks fólksins lagði til á fundi umhverfis- og skipulagsráðs að eftirfarandi svæði í borgarlandinu verði skoðuð sem hentug svæði fyrir hjólhýsabúa (hjólabúa)
- Lagt er til að svæði meðfram Hamrahverfinu að norðaverðu, fyrir vestan gamla Gufunesbæinn.
- Lagt er til að svæði í Gufunesi verði skoðað sem möguleiki fyrir hjólhýsabúa. Þarna er skemmtigarður og auðvelt að koma upp aðstöðu fyrir hjólhýsabúa. Þetta svæði hefur ekki verið deiliskipulagt en þarna er engu að síður kúluhús (hótel á súlum) og skemmtigarður. Þarna er bæði rafmagn og vatn.
- Lagt er til að þrjú svæði verði skoðuð við Rauðavatn.
- Rauðavatn neðan við Hádegismóa, norðan megin við Rauðavatn. Þarna er stutt í ýmsa þjónustu
- Rauðavatnssvæði, fyrir ofan veg, þar er rjóður sem nær langleiðina upp að golfvelli.
- Rauðavatnssvæði austan við Rauðavatn, Almannadalur. Þarna er rafmagn og göngustígur, þyrfti að búa til lítinn veg. Þarna er stutt í þjónustu
Einnig mætti skoða rjóður innan við Veituhúsið upp á Hólmsheiði, fyrir sunnan þjóðvegi 1 við Rauðhóla
Hjólahýsabúar eru staðsettir nánast á sorphaug við Sævarhöfða sem stendur. Samtök hjólabúa hafa fairð þess á leit við Reykjavíkurborg að farið verði nú þegar í að finna varanlega staðsetningu fyrir langtímastæði hjólhýsa, húsbíla og annarra slíkra tækja í samstarfi við hjólabúa. Óvissa hefur árum saman ríkt um málefni hópsins sem hefur mátt þola að vita aldrei hversu lengi þeir fá að vera á hjólasvæðum.
Tillaga um að setja upp snjalljós á umferðarmestu gatnamótin í borginni.
Fulltrúi Flokks fólksins leggur til að skipulagsyfirvöld setji upp snjallljós við þau gatnamót sem mest á mæðir í Reykjavíkurborg í stað fjögurra stillinga klukkuprógrams sem ekki telst til snjalltækja. Sá vírsegull sem nú er við gatnamót mælir hvorki hraða né umferðarflæði. Vírsegullinn gerir ekki greinarmun á bíl, strætó eða hjóli og getur því ekki talist til snjallljósakerfis.
Greinargerð
Ástandið á gatnamótum víða í Reykjavík er bagalegt. Umferðarteppur myndast vegna tafa sem er vegna úreltrar ljósastýringar. Miklubraut og Kringlumýrarbraut eru þær götur sem eru með mesta umferðarflæði í Reykjavík. Snjallljósastýringarkerfi sem les umferðina og bregst við samkvæmt aðstæðum má finna í öllum borgum í Evrópu. Með snjallljósstýrikerfi er umferðarflæði betra og eyðsla, mengun og skemmdir á malbiki minni. Ef tafir eru miklar eru bílar sífellt að hægja á sér, nema staðar og taka af stað auk þess sem þeir sitja fastir á rauðu ljósi jafnvel þegar enginn ástæða er til. Meginstaða ljósa hlýtur að vera þannig að græni logar á aðalbraut nema annars sé krafist.
Umferðarflæði er slakt á kafla þessar mestu umferðar gatna í Reykjavík. Afköst eru slök, á meðan flæði er kannski öðru megin eru engir bílar hinum megin. Strætó hefur sérrein sem í raun er varla nauðsynlegt. Það klukkuprógramm sem er við lýði með fjórum stillingum er ekki snjallkerfi og eru bílar á rauðu þegar engin ástæða er til. Það veldur miklum töfum og afkastageta mestu umferðargötu borgarinnar er í mesta lagi 50%. Í raun má segja að öll umferðarljós í Reykjavík séu barn síns tíma. Skipta þarf um þau öll, setja í þau nema sem varpa fram upplýsingum um vegi, ástand þeirra og umhverfi. Þetta ætti ekki að taka langan tíma og kostnaður, rúmur milljarður, myndi fljótlega borga sig upp.
Tillaga um að fjarlægja hægri beygjuljós þar sem þeirra er ekki þörf
Flokkur fólksins leggur til að skipulagsyfirvöld skoði hvar hægt er að fjarlægja hægri beygjuljós í borgarlandinu með tilliti til slysasögu. Lagt er til að fjarlægja hægri beygjuljós á gatnamótum Miklubrautar og Kringlumýrarbrautar og gatnamót Borgartúns og Kringlumýrarbrautar sem og gatnamót Sæbrautar og Karfavogur en á þessum gatnamótum hafa engin slys orðið samkvæmt slysavef samgöngustofu. Einnig er lagt til að fjarlægja hægri beygjuljós á frá Holtavegi inn á Sæbraut þar sem þau gera fátt annað en að skapa óþarfa bið.
Greinargerð
Finna má víða hægri beygjuljós þar sem ökumenn eru látnir bíða eftir grænu ljósi án ástæðu. Nægir að mati fulltrúa Flokks fólksins að hafa biðskyldumerki og alvöru gangbrautir (sebrabrautir og gangbrautarmerki eins og umferðarlög kveða á um), í stað gönguþveranir eins og Reykjavíkurborg notar þar sem engar merkingar eru hvorki skilti né málaðar merkingar á götunni. Bláa gangbrautarskiltið skiptir öllu máli enda skýr skilaboð til ökumanna og gangandi vegfarenda um að þarna sé gangbraut. Hægri beygjuljós þar sem ekki er þörf gera fátt annað en að tefja umferð, auka mengun og eyðslu.
Tillaga um að hefja snjallljósavæðingu með nýjustu tækni á Höfðabakka
Flokkur fólksins leggur til að snjallljós með innrauðum búnaði (nemum) sem lesa umferðina, aðstæður, taka myndir og greina lifandi verur, verði settir upp við Höfðabakka en þessi ljós hafa nú þegar verið keypt í þessum tilgangi og eru komin til landsins. Mikilvægt er að ljósin verði sett upp fyrir haustið til að auka afkastagetu umferðarflæðis. Einnig er lagt til að snjallljósum af nýjustu gerð verði komið upp á helstu umferðargötum borgarinnar til að auka umferðaröryggi. Samskonar tæknibúnaður er komin í helstu borgir sem við berum okkur saman við.
Tillaga Flokks fólksins um að Strætó bs taki upp forgangsapp sambærilegt því sem sumar aðrar borgir hafa gert.
Lagt er til að Strætó bs. taki upp þar til gert forgangsapp eins og aðrar borgir hafa gert, sambærilegt “Bláa punktinum” Danmörku og Oyster í London. Um er að ræða “app” sem virkar á öll almenningssamgöngukerfi. Appið er ekki aðeins með talningu heldur kortleggur einnig ferðamáta fólks og ferðaáætlanir milli staða. Appið er líka innheimtuapp og telur ekki aðeins innstig heldur ferðir fólks milli kerfa. Með þessu er hægt að fylgjast með flæði ferða og sjá hvar álagið er mest og hvar forgangsakstur er nauðsynlegur til að aðrir geti brugðist við. Nýlega endaði forgangsakstur í slysi við ljósin Kringlumýrarbraut/Miklabraut vegna þess að í Reykjavík er ekki komin nýjasta tækni í umferðarmálum.
Fyrirspurnir um lagningu hraðahindrunar þar sem hennar er sýnilega ekki þörf
Fulltrúi Flokks fólksins óskar upplýsinga um af hverju meirihlutinn og skipulagsyfirvöld hafa sett hraðahindranir rétt þegar komið er að þverun þar sem hringtorg er í beinu framhaldi þar sem það segir sig sjálft að ekki er hægt annað en að hægja á sér til að komast inn í hringtorgið og hraðahindrun því óþörf? Fulltrúi Flokks fólksins óskar upplýsinga um af hverju skipulagsyfirvöld hafa sett hraðahindranir strax í kjölfar gönguþverunar á nokkrum stöðum í borginni þar sem það hlýtur að liggja í augum uppi að sú hraðahindrun er með öllu tilgangslaus (sbsr. á Borgarvegi og á Sundlaugavegi og á Ánanaustum? Fulltrúi Flokks fólksins óskar upplýsinga um af hverju skipulagsyfirvöld hafa sett hraðahindranir (nokkrar) á Strandveg en þar eru engin skráð slys og í raun ekkert sem kallar á hraðahindranir enda liggur þessi 50 km gata í sveigjum sem veldur því óhjákvæmilega að ökumenn verða að draga úr hraða. Hraðahindranir sem ekki hafa sýnileg hlutverk gera fátt annað en að skapa mengun og auka eyðslu. Þarna hefur aldrei verið keyrt á gangandi mann.
Tillaga um að fjölga bílastæðum í Þorpinu Gufunesi.
Flokkur fólksins leggur til að komin verði upp fleiri bílastæðum í Þorpinu í Gufunesi. Það stóð til að fólk lifði bíllausum lífsstíl í Þorpinu en það er með öllu útilokað vegna fjarlægðar frá þjónustu og engar almenningssamgöngur eru á staðnum þrátt fyrir tillögur þar um. Flestir hafa nú þegar neyðst til að kaupa sér bíl en í Þorpinu er skortur á bílastæðum og neyðast bíleigendur til að leggja bíl sínum á svæði sem ekki eru merkt sem bílastæði.
Greinargerð
Nýlegar fréttir bárust af því að verið væri að sekta fólk fyrir ólöglega lagningu bíla í Þorpinu. Það er eðli málsins samkvæmt afar ósanngjarn þar sem mikill skortur er á bilastæðum og almenningssamgöngur engar. Byggingarframkvæmdir eru auk þess í gangi á staðnum. Finna þarf svæði í Þorpinu þar sem hægt er að koma fyrir nægum bílastæðum svo fólk þurfi ekki að leggja ólöglega. Ekki er hægt að búa í Þorpinu án þess að eiga bíl eins og sakir standa vegna skorts á almenningssamgöngum auk þess sem talsverð fjarlægð er í alla almenningsþjónustu. Sú eina lausn sem stendur fólki til boða núna er í formi pöntunarþjónustu. Skal farþegi láta vita með minnst hálf tíma fyrirvara fyrir áætlaða brottför og stilla sér upp við merkta biðstöð hjá Gufunesþorpi og bíða þar eftir leigubíl sem kemur þeim á næstu skiptistöð Strætó.
Meirihlutinn samþykkti að hækka fjárheimildir til strætósamgangna um 14,6 milljónir króna til að auka almenningssamgöngur í Gufunesi á fundi sínum þann 7. desember 2022 og er þetta útkoman. Fulltrúa Flokks fólksins finnast það varla geta verið að þetta fyrirkomulag sé hugsað til framtíðar. Hér kann að vera um millibilsástand að ræða sem er reyndar orðið alltof langt. Varla munu íbúar sætta sig við þetta mikið lengur. Lítið sem ekkert hefur verið gert í þessu máli þrátt fyrir að tæp tvö ár séu liðin frá því að borgin gaf vilyrði fyrir lóðum undir Gufuneshverfið.
Tillaga Flokks fólksins um að Strætó bs skipuleggi strætóferðir inn í Þorpið
Flokkur fólksins leggur til að strætó aki inn í Þorpið í Gufunesi, að Þorpið verði einfaldlega hluti af almenningssamgangnakerfinu. Engar almenningssamgöngur eru í vistþorpinu utan þess að hægt er að hringja á leigubíl.
Greinargerð
Fólk sem fjárfesti í íbúð í Þorpinu var lofað að hægt væri að lifa þar bíllausum lífsstíl en hefur orðið að kaupa sér bíl þar sem engar almenningssamgöngur standa þessu fólki til boða. Bílastæði eru fá sem bæta þarf úr hið snarasta. Fólk hefur neyðst til að leggja ólöglega og nú er bílastæðasjóður farin að sekta bíleigendur sem hvergi geta lagt bílnum sínum. Það er ámælisvert að meirihlutinn geti ekki tryggt aðgang að almenningssamgöngum í íbúðahverfi í Gufunesi sem hefur verið kynnt sem vistþorp. Án almenningssamgangna kemst fólk ekki spönn frá rassi enda all langt í almenningsþjónustu. Í grein sem íbúi skrifaði í des. 2021 á visi.is segir:
“Næsta strætóstoppistöð er í 20-25 mínútna göngufjarlægð, en þá leið getur manneskja einungis farið ef hún er fullfær og ófötluð enda liggur sú leið upp brattan, ólýstan slóða í gegnum móa (einungis er um slóða að ræða, enga formlega leið eða gangstétt). Og ef manneskja ætlar að taka strætó með barnavagn þá þarf hún að ganga um 45 mínútna leið – og úti á miðjum Gufunesveginum, því engin gangstétt er þar meðfram heldur,“
Einnig eru alvarlegar athugasemdir gerðar við að skortur sé á göngustígum sem liggja að hverfinu. Almenningssamgöngur í Gufunesið snúast ekki bara um íbúana sjálfa heldur einnig fjölskyldur og vini þeirra sem vilja koma í heimsókn.
Flokkur fólksins kallar eftir að fá upplýsingar um hvar Sundabraut á nákvæmlega að liggja?
Einnig er kallað eftir hvort talið sé að lagning Sundabrautar í einhverri mynd verði hafin innan 8-10 ára, fyrr en það eða seinna?
Greinargerð
Nú er hópur að störfum sem ekki virðist hafa hafið neina alvöru vinnu. Brýnt er að hann spýti í lófana og auðvitað að í þeim hópi séu allir sammála um að leggja þurfi Sundabraut. Eins og hún er teiknuð nú, kemur hún ofan í Þorpið og smáhýsin í Gufunesi. Hvort brú (hábrú eða lágbrú) eða göng er vissulega stór höfuðverkur.
Fyrirspurnir vegna mistaka á endurgerð Kleppsveg 150-152, Brákaborg
Fulltrúi Flokks fólksins óskar skýringa á mistökum sem gerð voru á þaki leikskólans Brákaborgar en þar var lagt torfþak sem reyndist þyngra en reiknað var með og tilgreint var á teikningum og leiddi til þess að torfþakið varð eiginlega að mýri. Fulltrúi Flokks fólksins óskar upplýsinga um hver sé heildarkostnaður verkefnisins frá upphafi: niðurrif, byggingarframkvæmdir og til enda viðgerðar vegna mistakanna og hversu langt kostnaðurinn fór fram úr áætlun?
Hvernig var eftirliti háttað, úttekt á framkvæmdum og hvenær í ferlinu varð þessi vandi ljós?
Greinargerð
Fulltrúi Flokks fólksins lýsti yfir áhyggjum sínum á þeim tíma sem hönnunartillagan var kynnt, áhyggjur sem lutu að gerð torfþaks. Flokkur fólksins lagði þá fram viðvörunarbókun. Halda mætti að sérfræðingar á skipulags, hönnur- og arkitektasviði viti að vatn er þungt. Gera má ráð fyrir að að 10 mm úrkoma sem er ósköp venjuleg í Reykjavík séu 10 lítrar eða 10-kg á fermetra. Losna þarf fljótt við það vatn ef það er á þaki. Það gerist ekki á flötu þaki því að vatnið má ekki renna niður í bygginguna. Því má segja að með torfþakinu hafi verið mynduð mýri. Torfþök fyrr á öldum voru brött. Þá skildu menn að vatnið þyrfti að renna brott. Sú þekking kann að hafa glatast meðal hönnuða? Í ofanálag er það stór skrýtið að svona hönnun hafi verið verðlaunuð. Hér er um alvarleg mistök að ræða sem kostar gríðarlegt fjármagn og mun koma illa við borgarsjóð og borgarbúa. Óþægindin koma einnig illa við börnin á Brákarborg og foreldra þeirra. Flytja þarf leikskólann í húsnæði í Ármúla. Málið er allt hið vandræðalegasta.
Fyrirspurn um gæði undirlags malbiks
Flokkur fólksins óskar upplýsinga um hvaða kröfur Reykjavíkurborg geri til gæða undirlags malbiks í ljósi þess að nagladekkjum er kennt um flestar skemmdir í malbiki og einnig að vera helstu orsakir svifryks?
Greinargerð
Ekki er hægt að kenna nagladekkjum um allt þegar kemur að malbikunarskemmdum. Iðulega má kenna um mistök í malbikunarferlinu. Dæmi eru um að undirlag sé of þunnt sem er þá ekki hannað til að bera þá þyngd sem vegurinn á að bera, umferð bíla og strætó. Dæmi hafa einnig verið um að malbikið sé of þunnt en þegar bæði undirlag og malbik eru of þunn þá skríður malbikið hreinlega undan þunganum og verður eins og vax. Þetta má vel sjá á sérreinum strætó og ekki eru strætisvagnar á nagladekkjum. Hættulegar holur myndast sem sjá má glöggt á sérreinum strætó. Þetta er sambærilegt því að byggja 15 hæða hús á undirlagi/grunn ætlað 5 hæða húsi.
Fyrirspurn um hlutfall svifryks sem rekja má til umferðartafa
Fyrirspurn um hvort gerðar hafi verið mælingar á hversu mikið hlutfall svifryks má rekja til umferðartafa með öðrum orðum hversu stór orsakavaldur slakt flæði umferðar er á svifryksmengun?
Greinargerð
Gera má ráð fyrir að svifryk sé stór orsakavaldur þess hversu flæði umferðar er víða slakt í borginni. Flæði umferðar er víða slakt í borginni og gera má ráð fyrir því að það auki á svifryksmengun. Á mestu umferðargötum eru ljósastýringar slakar og eru bílar að hægja á sér, nema staðar, bíða í gangi og taka af stað allan daginn með tilheyrandi eyðslu, mengun og malbiksskemmdum. Ef snjallljósastýringar væru í gangi myndu ljósin nema þörfina og flæði umferðar yrði í samræmi við traffík og aðstæður. Annað sem veldur skemmdum eru hraðahindranir sem sumstaðar virðist hafa verið dreift bara hipsumhaps, t.d. rétt áður en komið er inn í hringtorg eða á eftir þverun en í þeim tilfellum segir það sig sjálft að hraðahindrunar ekki ekki þörf. Hraðahindrunum er dreift á götur og hafa meira að segja verið lagðar á vegi milli hverfa þar sem bílar ættu að geta farið um án tafa.
Flokkur fólksins óskar upplýsinga um hvar annars staðar er verið að leggja torf á þök í borgarlandinu?
Óskað er upplýsinga um hvar, ef einhvers staðar er verið að leggja torfþök á hús á vegum borgarinnar? Eru einhverjar sérstakar ástæður fyrir því að skipulagsyfirvöld hafa talið torfþök eftirsóknarverð? verið svo ánægð með það val að setja torf á þök? Er tilgangur með torfþaki að seinka frárennslinu?
Greinagerð
Þétting byggðar hefur eykur álag á frárennsliskerfi sem víða er ekki beisið í borginni og jafnvel sprungið. Fulltrúi Flokks fólksins spyr hvort verið sé með skipulögðum hætti að tefja rennsli vatns af þökum niður í frárennsliskerfi með því að setja torfþak á mannvirki. Er verið að kaupa sér tíma? Frárennslikerfi víða í borginni er gamalt og ekki hannað fyrir nema visst mikið byggingarmagn. Þegar verið er að þétta svo mikil byggð þá segir það sig sjálft að meira og betra frárennsli þarf og með þessu er verið að seinka frárennslinu.
Fyrirspurn um aðreinar sem hafa verið fjarlægðar
Flokkur óskar upplýsinga um hvers vegna hægri aðrein til vesturs á gatnamótum Háaleitisbrautar og Bústaðarvegar hafi verið fjarlægð. Einnig hvort fleiri aðreinar hafi verið fjarlægðar og hvort það sé á stefnuskránni að fjarlægja fleiri aðreinar í borgarlandinu?
Greinargerð
Á gatnamótum Háaleitisbrautar og Bústaðarvegar er mikil umferð og tefur það umferð mikið að þessi aðrein til vesturs hafi verið fjarlægð. Slíkar aðreinar hjálpa til við að halda flæði umferðar. Eins og flestir vita þá kvarta borgarbúar mjög yfir umferðartöfum og að fjarlægja aðreinar eykur á tafir. Vissulega getur verið um umferðaröryggismál að ræða en gott væri að fá upplýsingar um hver ástæðan er og hvort þær sé að rekja til slysa af einhverju tagi
Tillaga um að lengja götulýsingu vegna nýrrar LED tækni
Fulltrúi Flokks fólksins leggur til að lengja götulýsinguna í það sem var fyrir hrun í ljósi mikils sparnaðs með nýrri LED tækni sem búið er að setja upp.
Greinargerð
Nú dimmir óðum enda skammt í að haustið og veturinn skelli á og þarf að komast til framkvæmda áður en skólarnir byrja og auka þar með öryggi barna í umræðunni. Nágrannasveitarfélög eru mörg hver með lengri götulýsingar tíma. Þetta snýst um hálftíma til 40 mín.
Skiljanlega var leitað leiða til að draga úr kostnaði eftir hrun. Með því að stytta tíma götulýsinga spöruðust nokkrar milljónir. Eftir að LED-lýsing tók algerlega við sem er bæði orkunýtnari og endingarbetri er sjálfsagt að að þessi breyting gangi til baka.
Tillaga um að hvetja lóðarhafa til að fjölga bílastæðum við Dalslaug
Fulltrúi Flokks fólksins leggur til að farið verði þess á leit við lóðarhafa að fjölga bílastæðum við Dalslaug vegna skorts á bílastæðum við laugina. Ekki er raunhæft að ætla að hægt sé að samnýta bílastæði fyrir laugagesti, skóla og bókasafns sem og íþróttahallar.
Greinargerð
Dalslaug er gríðarvinsæl og fjöldi gesta á íþróttavöllinn er of einnig gríðarmikill. Þarna hafa verið gerð skipulagsmistök sem verður að leiðrétta. Gera það samgöngumat í samstarfi við fulltrúa umhverfis- og skipulagssviðs ef það þarf að vera fyrsta skrefið til að leiðrétta þessi mistök og í kjölfarið að fara í breytingu á deiliskipulagi þar sem fjöldi bílastæða kemur fram í samþykktu deiliskipulagi. Fjölga þarf bílastæðum umtalsvert. Um helgar og þegar viðburðir eru auk þess í íþróttahúsinu ríkir þarna algert kaos. Foreldrar þurfa að leggja inn í hverfi, oft fjarri lauginni og íþróttahúsinu og ganga langan spöl, sumir með stóran barnahóp og tilheyrandi sunddót og annað sem fylgir sundferðum. Nærliggjandi íbúar geta varla heldur verið ánægðir með að sundlauga- og íþróttahúsgestir þurfi að leggja í stæði ætluð íbúum hverfisins.