Bókun Flokks fólksins undir liðnum: Lögð fram skýrsla fjármála- og áhættustýringarsviðs, dags. 13. apríl 2023, um framkvæmd styrkjareglna:
Það kemur á óvart að sjá hversu mikill munur er á styrkjaveitingum til sviða 2022. Menningar- og ferðamál taka stærsta hlutann af kökunni en mannréttindaskrifstofa og skóla- og frístundasvið minnst. Af hverju er kökunni svona misskipt? Flokkur fólksins er með margar vangaveltur um styrkveitingar yfir höfuð. Í því árferði sem nú ríkir er spurning hvort draga ætti úr styrkjum. Alla vega þarf ávallt að vera á vaktinni með að skipting sé sanngjörn. Drífa þarf að ljúka við drög að nýjum samræmdum reglum, sem eru í vinnslu. Af hverju hefur sú vinna tafist svo mikið er ekki ljóst en undirbúningur undir nýjan miðlægan styrkumsóknarvef er í höndum þjónustu- og nýsköpunarsviðs eins og fram kemur í gögnum.
Bókun Flokks fólksins undir liðnum: Lagt er til að borgarráð samþykki tillögur sem fram koma í meðfylgjandi minnisblaði til að bæta öryggi enn frekar í sundlaugum Reykjavíkurborgar. Menningar- og íþróttasviði verði falið að gera aðgerðaáætlun í nafni Guðna Péturs Guðnasonar og fylgja eftir í samráði við hlutaðeigandi aðila:
Bæta á öryggi sundlauga Reykjavíkurborgar. Menningar- og íþróttasviði er falið að gera aðgerðaáætlun. Uppfæra þarf verklagsreglur m.a. vegna óvirkni myndavélakerfa, mönnunar og ýmissa annarra þátta sem geta haft áhrif á öryggi. Einnig að endurskoða tímalengd námskeiða og próftaka viðhöfð til staðfestingar á skilningi efnis. Flokki fólksins líst vel á þessar hugmyndir og eru þær í góðu samræmi við öryggisstefnu Reykjavíkurborgar sem samþykkt var í apríl 2022. Þessi aðgerðaáætlun er gerð í nafni Guðna Péturs Guðnasonar sem lést í Sundhöll Reykjavíkur 21. janúar 2021. Nafn Guðna Péturs á að verða tengt árlegri vitundarvakningu um öryggismál í sundlaugum borgarinnar sem verði 21. janúar ár hvert. Flokki fólksins finnst það sérlega fallegt að minnast þessa unga manns á þennan hátt. Flokkur fólksins vill hafa öryggi allra í fyrirrúmi og hugsar oft til allra þeirra t.d. innflytjenda sem ekki hafa fengið neina sundkennslu um ævina og einnig til allra þeirra sem ekki kunna að synda. Að kunna að synda er dýrmætara en margir átta sig á. Reykjavíkurborg gæti beitt sér af krafti til að stuðla að sundkennslu og að öll börn sem koma til landsins til lengri dvalar læri að synda.
Bókun Flokks fólksins undir liðnum: Lagt er til að borgarráð samþykki hjálögð drög að viljayfirlýsingu þar sem Reykjavíkurborg, Háskóli Íslands og Vísindagarðar Háskóla Íslands eru sammála um að greiða götu þess að nýsköpunar- og frumkvöðlasetur rísi á lóðum B og E á svæði Vísindagarða Háskóla Íslandsbyggt á fyrirmynd og hugmyndafræði Grósku hugmyndahúss.
Flokkur fólksins fagnar þessari viljayfirlýsingu sem er um að greiða götu fólks til að þróa hugmyndir sínar. Skoða þarf að hafa leigu þannig að þeir sem hafa minna milli handana fái einnig tækifæri til að fá vinnuaðstöðu, hvor sem það eru einyrkjar eða hópar
Bókun Flokks fólksins undir liðnum: Tillaga um yfirfærslu styrkjaverkefnis frá FAS til ÞON:
Nú er lagt til að færa eigendahlutverki styrkjaverkefnis Reykjavíkurborgar frá FAS til ÞON og er lagt til að samþykkt verði 50% stöðugildi sem fylgi verkefninu en kostnaðaráætlun er um 7,5 m.kr. á ársgrundvelli. Ekkert lát er á að ÞON taki við verkefnum og fari sem horfir mun sviðið bráðum verða hæst ráðandi í borginni. Nú þegar er sviðið orðið að einu völundarhúsi og útstreymi verkefna/afurða sviðsins líklegar til að tefjast enn frekar. Hlaðan skjalastjórnunarkerfi sem loksins leit dagsins ljós 2022, hluti hennar í það minnsta, hefur valdið mörgum höfuðverk. Í ljós kom að Hlaðan er ekki hönnuð fyrir öll þau verkefni sem henni var ætlað. Þetta hefur valdið ama og pirringi hjá mörgu starfsfólki. Styrkjakerfið er flókið og ekki líklegt að í höndum ÞON takist að halda utan um það ef horft er til þess hversu sviðinu hefur gengið illa að koma frá sér stafrænum lausnum og setja þær í fulla virkni. Fulltrúi Flokks fólksins sér ekki að verkefninu sé betur borgið hjá ÞON sem stendur vart undir sinni eigin ábyrgð. Athuga skal að heilt ráð var sett á laggirnar til að reyna að hafa stjórn stafrænum málunum ásamt mörgum öðrum verkefnum.
Bókun Flokks fólksins undir liðnum: Lögð fram umsögn rýnihóps borgarráðs, dags. 11. apríl 2023, um erindi Ljósleiðarans ehf. um hlutafjáraukningu, dags. 24. október 2022.
Slæm staða Ljósleiðarans hefur legið fyrir hjá Orkuveitu Reykjavíkur frá 2019 og jafnvel enn fyrr. Félagið er í dag skuldsett og er eiginfjárhlutfall orðið hættulega lágt. Eigendur, sem að stærstum hluta til er Reykjavíkurborg, voru ekki upplýstir um slæma stöðu fyrirtækisins þegar hún lá fyrir. Fulltrúa Flokks fólksins var boðið að sitja í þverpólitískum rýnihópi sem hafði það hlutverk að leggja mat á umsögn borgarlögmanns og fjármálastjóra um heimild til hækkunar hlutafjár félagsins. Í rýnihópnum hafa ýmsar sviðsmyndir verið skoðaðar en engin þeirra er án óvissu og allar krefjast einhverrar frekari skuldsetningar félagsins, þó mismikillar. Erfitt er að spá fyrir um fjölmargar áhrifabreytur til lengri tíma, s.s. markaðsvirði, þjónustustig og samkeppni. Allan þann tíma sem rýnihópurinn hefur fundað hefur ríkt leynd yfir gögnum. Flokkur fólksins ætlar ekki að taka ábyrgð á málum sem fóru úrskeiðis á vakt hvorki síðasta né þessa meirihluta og tekur því ekki afstöðu um „heimild til hækkunar hlutafjár félagsins“ eins og lagt er til í umsögn borgarlögmanns og fjármálastjóra. Framtíð og framtíðarhorfur Ljósleiðarans eru alfarið á ábyrgð meirihlutans. Það er hans hlutverk að finna út hvað best er að gera í þeirri slæmu stöðu sem Ljósleiðarinn er í og undir öllum kringumstæðum að standa vörð um hagsmuni borgarsjóðs og borgarbúa.
Bókun Flokks fólksins undir liðnum: Lagt fram svar fjármála- og áhættustýringarsviðs, dags. 5. apríl 2023, við fyrirspurn áheyrnarfulltrúa Flokks fólksins um viðskipti borgarinnar við ráðgjafafyrirtæki, sbr. 39. lið fundargerðar borgarráðs frá 9. mars 2023.
Frá 2018 hefur KPMG fengið um 100 milljónir fyrir ýmis verkefni. Hæsta upphæðin er 2022 tæpar 42 milljónir. Önnur fyrirtæki eru ekki á spena hjá borginni í sama mæli og KPMG samkvæmt svari. Fulltrúi Flokks fólksins er djúpt hugsi yfir þessum viðskiptum sérstaklega í ljósi nýlegrar skýrslu um niðurlagningu Borgarskjalasafns þar sem hluti skýrslunnar fór í að níða skóinn af borgarskjalaverði sem hefur á löngum ferli sínum sýnt framúrskarandi fagmennsku í starfi. Borgarskjalavörður hafði m.a. kjark og þor að gera frumkvæðisathugun á braggamálinu í óþökk meirihlutans þar sem fram kom í niðurstöðum að farið hafði verið á svig við lög. Flokkur fólksins telur að niðurstaðan um að leggja niður Borgarskjalasafn hafi verið „pöntuð“ eins og stundum er sagt. Það er þekkt fyrirbæri sem er ekki aðeins ófaglegt heldur einnig ómerkilegt. Fyrirtækinu eru gefnar ákveðna forsendur til að vinna út frá, sem leiða á leynt og ljóst að ákveðinni niðurstöðu og fær fyrir ríflega summu og auðvitað áframhaldandi verkbeiðnir. Umrædd skýrsla sem kallast „Ráðgjöf vegna skjalastjórnunar“ kostaði 8.495.547 kr. (2022) plús 1.741.110 kr. (2023) Alls 10.236.657 kr.. Sem sé, rúmar tíu milljónir fyrir að leggja til að saga Reykjavíkur verði falin.
Bókun Flokks fólksins undir liðnum; Lögð fram fundargerð umhverfis- og skipulagsráðs frá 12. apríl 2023:
Liður 3
Nýi Skerjafjörður, breyting á deiliskipulagi:
Vera kann að búið sé að bregðast við ýmsum athugasemdum um Nýja Skerjafjörðinn. Þótt hér sé verið að fjalla um 1. áfanga þar sem fjaran kemur ekki við sögu, kemur fram í gögnum að ekki sé frekari þörf á að bregðast við athugasemdum frá Náttúrufræðistofnun. En var ekki þar eitt af meginathugasemdum að ekki yrði gengið á fjöruna? Þegar flugvöllurinn fer, hvenær sem það verður, þá fyrst er ástæða til að skipuleggja nýja byggð á svæðinu og þá þarf ekki að fara í landfyllingar. Margar athugasemdir bárust vegna mengunar í jarðvegi. Fjarlægja þarf og hreinsa mengun úr jarðvegi áður en uppbygging hefst. Gerðar voru athugasemdir um að ekki var athugað hvort hættulegt efni (PFAS) efni sem m.a. koma frá slökkvifroðu séu í jarðveginum. Allt þetta er reifað í löngu máli í gögnum. Eftir stendur hvort þessi framkvæmd sé tímabær. Innviðaráðuneytið telur að svo sé ekki án þess að fullkannað sé hvort búið sé að tryggja að ný byggð hafi ekki neikvæð áhrif á rekstraröryggi flugvallarins í Vatnsmýri. Fresta hefði átt áformum um úthlutun lóða og byggingarréttar og hefja ekki framkvæmdir á umræddu svæði þar til niðurstaða flugfræðilegrar rannsóknar liggur fyrir eins og segir í bréfi frá ráðuneytinu dags. 16. júní 2022.
Ný mál
Lögð fram svohljóðandi tillaga áheyrnarfulltrúa Flokks fólksins að leita til eftirlitsnefndar með fjármálum sveitarfélaga:
Flokkur fólksins leggur til að Reykjavík óski leiðsagnar frá eftirlitsnefnd með fjármálum sveitarfélaga um hvernig Reykjavíkur getur hagrætt í rekstri og náð þannig undirtökum í rekstri borgarinnar. Reykjavík er komin yfir þau skuldaviðmið sem sveitarfélögum eru sett. Samkvæmt sveitarstjórnarlögum skulu heildarskuldir og skuldbindingar A- og B-hluta í reikningsskilum skv. 60. gr. ekki vera hærri en sem nemur 150% af reglulegum tekjum. Á árinu 2021 var veltufé frá rekstri A-hluta borgarsjóðs 0,3%, í útkomuspá fyrir árið 2022 var það -2,3% og í fjárhagsáætlun fyrir árið 2023 er það áætlað 2,3%. Allar líkur benda til að A-hluti Reykjavíkurborgar hafi á þessu þriggja ára tímabili ekki getað greitt af eigin rekstrartekjum, neitt sem skiptir máli, upp í afborganir lána og til fjárfestinga. Þessi staða hefur þýtt aukna lántöku sem aftur á móti leiðir af sér að þungi afborgana lána vex stöðugt og fjárhagslegt svigrúm borgarsjóðs minnkar að sama skapi. Í vaxandi verðbólgu verða áhrif þessarar þróunar enn meiri. Það segir sig sjálft að slík vegferð tekur enda fyrr en síðar. Nú þegar eru farin að blikka sterk aðvörunarljós á vegarenda sem birtast meðal annars í áhugaleysi markaðarins á skuldabréfaútgáfu Reykjavíkurborgar.
Greinargerð
Fjármálareglur sveitarstjórnarlaga munu að öllum líkindum færast í fyrra horf eigi síðar árið 2026. Samkvæmt 77. gr. sveitarstjórnarlaga ber sveitarstjórn skylda til að gera eftirlitsnefnd með fjármálum sveitarfélaga viðvart komist sveitarfélag í fjárþröng eða sveitarstjórn telji að fjármál sveitarfélags stefni í óefni. Því er nauðsynlegt er að hefja undirbúning þess eigi síðar en strax að A-hluti Reykjavíkurborgar standist fjármálareglur sveitarstjórnarlaga, þegar þær taka gildi á nýjan leik. Á þeim forsendum er þessi tillaga borin fram.
Vísað til umsagnar fjármála- og áhættustýringarsviðs. MSS23040048
Tillaga áheyrnarfulltrúa Flokks fólksins lögð fram um að hætt verði að skipta við KPMG:
Flokkur fólksins leggur til að hætt verði að skipta við KPMG og látið verði reyna á útboð eða farið í verðkönnun, sé talið nauðsynlegt að kaupa vinnu af þessu tagi. Af yfirliti yfir viðskipti við KPMG að dæma er nokkuð ljóst að aðkeypt þjónusta frá þessu fyrirtæki er komin úr böndunum. Á síðasta ári fékk fyrirtækið 41,5 milljón fyrir greiningarskýrslur/verkefni án þess að skýringar liggi fyrir um nauðsyn þeirra. Frá 2018 hefur KPMG fengið um 100 milljónir frá Reykjavíkurborg fyrir skýrslur sem sjá má í yfirliti sem fulltrúi Flokks fólksins fékk sem svar við fyrirspurn sinni um viðskipti borgarinnar við ráðgjafarfyrirtæki. Fulltrúa Flokks fólksins er ofboðið, ekki aðeins bruðlið sem hér á sér stað heldur einnig vegna dæma um að að greiningaskýrslur frá KPMG séu ekki taldar trúverðugar. Vísað er m.a. í skýrsluna Ráðgjöf vegna skjalastjórnunar (niðurlagning Borgarskjalasafns). Sú skýrsla er talin innihalda rangfærslur og dylgjur í garð borgarskjalavarðar sem dregur úr trúverðugleika hennar að mati margra sem tjáð sig hafa um gagnið. Héraðsskjalavörður í Kópavogi hefur lýst svipaðri skoðun á úttekt sem KPMG hefur gert fyrir bæjarstjórnina á menningarstofnunum bæjarins og segir að hann „vænti þess að bæjarfulltrúar í Kópavogi hafi til að bera skynsemi og ábyrgðartilfinningu til að stíga engin óheillaspor á grundvelli þessarar skýrslu.“ MSS23040050
Frestað.
Lögð fram svohljóðandi fyrirspurn áheyrnarfulltrúa Flokks fólksins um hvort Reykjavíkurborg er á leið í þrot?
Fyrirspurn frá Flokki fólksins um hversu alvarlegur fjárhagsvandi Reykjavíkurborgar er. Er Reykjavíkurborg á leið í þrot? Eftirlitsnefnd með fjármálum sveitarfélaga (EFS) sendi Reykjavíkurborg bréf í lok febrúar sl. þar sem athugasemdir eru gerðar við að borgin uppfylli ekki öll lágmarskviðmið fyrir A-hluta rekstra. Flest bendir til að fjárhagsstaða Reykjavíkur sé verri en áður eru dæmi um. Sveitarfélagið virðist engan veginn vera rekstrarlega sjálfbært. Hætt var við skuldabréfaútboð sem átti að vera þann 12. apríl. Það kemur í kjölfar þess að Reykjavíkurborg hætti einnig við skuldabréfaútboð sem átti að fara fram þann 8. mars sl. Það hlýtur að hafa verið niðurlægjandi fyrir Reykjavíkurborg, fjölmennasta sveitarfélag landsins, enda merki um ákveðið vantraust markaðarins á fjárhagsstöðu borgarinnar og greiðslugetu hennar. Niðurlægingin er þó ekki aðalatriðið heldur alvarleiki málsins alls. Þær skýringar sem gefnar hafa verið um að borgin þurfi ekki að fara í skuldabréfaútboð þar sem hún hefur aðra betri lánakosti (lánalínur) eru ekki trúverðugar. Borgin hefur á undanförnum misserum spennt bogann til hins ýtrasta hvað varðar rekstrarkostnað, fyrirhugaðar framkvæmdir og sívaxandi lántöku. Ekki er séð að sýna eigi nauðsynlegt aðhald með því að fresta fjárfrekum framkvæmdum sem ekki er brýn þörf á að ganga í.
Vísað til umsagnar fjármála- og áhættustýringarsviðs. MSS23040049
Lögð fram svohljóðandi fyrirspurn áheyrnarfulltrúa Flokks fólksins um gestakomu í Húsdýragarðinn:
Fulltrúi Flokks fólksins óskar upplýsinga um gestakomur í Húsdýragarðinn. Hver er fjöldi gesta sl. tvö ár? Óskað er sundurliðunar eftir árstíma, sumar vetur, vor og haust.
Vísað til meðferðar menningar-, íþrótta- og tómstundaráðs. MSS23040051
Lögð fram svohljóðandi fyrirspurn áheyrnarfulltrúa Flokks fólksins af hverju Reykjavíkurborg hefur ekki ráðið sérstakan aðgengisfulltrúa:
Reykjavíkurborg hefur ekki ráðið sérstakan aðgengisfulltrúa. Það er sérstakt meðan önnur og langtum minni sveitarfélög hafa gert það nú þegar. Fulltrúi Flokks fólksins óskar upplýsinga um hvenær slíkur fulltrúi verði skipaður. Ítrekað hefur verð spurt um þetta en engin svör hafa borist. Í samkomulagi er fjallað um nauðsyn þess að opinberir aðilar skipi aðgengisfulltrúa (sveitarfélögin þar með talið) og að hlutverk þeirra verði að sjá til þess að gerðar séu úttektir á aðgengi, þ.e. á þjónustu og starfsemi viðkomandi aðila í víðum skilningi. Leiði úttekt í ljós að úrbóta sé þörf hlutist aðgengisfulltrúi til um að gerðar séu tímasettar áætlanir um úrbætur. Um þetta er fjallað í aðgerð A.3 í framkvæmdaáætlun um málefni fatlaðra. Hvernig má það vera að 66.000.000 kr. styrkur frá Jöfnunarsjóði er ónotaður hjá borginni til að bæta aðgengi, þegar fyrir liggja næg verkefni í málaflokknum?
Vísað til umsagnar mannréttinda- og lýðræðisskrifstofu. MSS23040055