Bókun Flokks fólksins undir liðnum: Lögð fram bréf umhverfis- og skipulagssviðs, dags. 7. og 13. mars 2024, sbr. samþykktir umhverfis- og skipulagsráðs frá 6. og 13. mars á tillögu að uppfærslu á reglum um bíla- og hjólastæði í Reykjavík:
Sjálfsagt er að skipuleggja hjóla- og bílastæði með eins skynsamlegum hætti og hægt er í borginni. Best fer á því að bílar séu sem mest í bílastæðahúsum en það hefur einfaldlega ekki tekist að laða fólk nægjanlega að bílastæðahúsum og hefur ástæðan verið margrædd. Mörgum finnst þau ekki nógu aðlaðandi, þröng og einhverjir treysta sér ekki í að nota greiðslukerfið þótt það hafi verið einfaldað. Bílum fjölgar enda almenningssamgöngur slakar. Gæta þarf þess að borgarbúar hafi gott aðgengi að miðbænum þangað sem þeir sækja þjónustu. Huga þarf betur að aðgengi fatlaðs fólks að miðbænum. Gjaldskyldusvæði hafa verið stækkuð og bílastæðagjöld snarhækkað sem hefur fælingarmátt. Stór hluti borgarbúa og aðrir forðast eins og heitan eldinn að koma í bæinn eins og kannanir hafa sýnt. Þetta hefur áhrif á verslun og þjónustu, sérstaklega þær verslanir sem versla með annað en vörur fyrir ferðamenn. Miðbærinn er nú fyrir ferðamenn en Reykvíkingar fara annað til að versla nema kannski ef þeir ætla að nýta veitingastaði og bari. Flokkur fólksins saknar þeirra tíma þegar fjölbreyttari hópur sótti miðbæinn. Flokkur fólksins hefur ekki trú á að deilibílamenning ryðji sér til rúms hér eins og erlendis og geta margar ástæður legið þar að baki.
Bókun Flokks fólksins undir liðnum: Lagt fram bréf skóla- og frístundasviðs, dags. 6. mars 2024, sbr. samþykkt skóla- og frístundaráðs frá 12. febrúar 2024 á tillögu um framhald á tilraunaverkefninu „fyrr á frístundaheimili“ fyrir börn sem eru að ljúka leikskóla og hefja grunnskólagöngu sumarið 2024:
Fulltrúi Flokks fólksins telur mikilvægt að halda áfram með verkefnið. Fleiri kostir og ávinningur eru af því en gallar og ókostir. Börn eru misjöfn eins og gengur og komin mislangt í þroska. Þess vegna þarf að stíga varlega til jarðar í þeim tilvikum sem talið er að ekki sé ávinningur fyrir barn að fara fyrr á frístundaheimili. Telja má víst að mörgum börnum þyki þetta afar spennandi og hlakki til að kynnast grunnskólanum sínum. Að kynnast frístundaheimilinu mildar upphaf skólagöngu og hjálpar þeim að vera öruggari í aðstæðunum þegar formlegt skólastarf hefst. Nokkuð mikið á þó eftir að útfæra í þessari tillögu. Taka þarf til skoðunar allar umsagnir og ábendingar, sérstaklega þeirra sem starfa á „gólfinu“ eins og það er orðað. Aðstæður eru ólíkar milli frístundaheimila og biðlistar og mönnunarvandi viðvarandi. Mannekluvandi er rótgróinn vandi sem ekki hefur tekist að vinna bug á. Gæta þarf þess að ofgera ekki starfsfólki og vill fulltrúi Flokks fólksins að þeirra raddir fái að heyrast vel.
Bókun Flokks fólksins undir liðnum: Lagt fram bréf velferðarsviðs, dags. 11. mars 2024, sbr. samþykkt velferðarráðs frá 6. mars 2024 á tillögu um hækkun tekju- og eignamarka í reglum Reykjavíkurborgar um sérstakan húsnæðisstuðning:
Fulltrúi Flokks fólksins telur rétt að miða uppfærslu tekjuviðmiða í reglum um sérstakan húsnæðisstuðning við þróun launa milli ára. Launavísitala hækkaði um 7% milli áranna 2023 og 2024 og þá hækkuðu lægstu laun um 66.000 kr. í þeirri kjarasamningslotu sem fór fram síðasta vetur og teygði sig fram á vorið. Þá má ekki gleyma því að vísitala neysluverðs hækkaði um 6,7% milli áranna 2023 og 2024. Hér stendur til að ganga skemur en sem nemur þróun launa og verðlags milli ára og hækka viðmiðin aðeins um 5,6%. Það þýðir í reynd að réttur fjölda fólks til sérstaks húsnæðisstuðnings rýrnar milli ára.
Bókun Flokks fólksins undir liðnum: Lagt fram bréf Sambands íslenskra sveitarfélaga, dags. 8. mars 2024, varðandi áskorun til sveitarfélaga vegna yfirlýsingar ríkisstjórnarinnar og Sambands íslenskra sveitarfélaga vegna kjarasamninga 2024, ásamt fylgiskjölum:
Á síðasta fundi sameinaðist borgarráð að mestu um ályktun um að Reykjavíkurborg vilji greiða fyrir gerð kjarasamninga til fjögurra ára m.a. með því að halda aftur af hækkun gjaldskráa sem snúa að börnum og barnafjölskyldum. Fulltrúi Flokks fólksins studdi þessa tillögu en bókaði um að rétt hefði verið að skilgreina nánar hversu mikið ætti að „halda aftur af gjaldskrárhækkunum“ eins og það er orðað. Nú er því beint að sveitarstjórnum að miða skuli við að hækkun þessa árs verði ekki umfram 3,5 %. Fulltrúa Flokks fólksins finnst að þessi prósenta mætti vera töluvert lægri, jafnvel fara niður í 1% á samningstímanum. Í rauninni getur Reykjavíkurborg gert hvað sem er í þessum efnum. Hér er einungis um tilmæli að ræða og er því ekkert að vanbúnaði að lækka þessa prósentutölu. Hvert prósentustig skiptir máli fyrir hinn almenna borgara. Flokkur fólksins hefur mótmælt harðlega gjaldskrárhækkunum síðustu ár sem verst hafa komið niður á bágstöddum. Gjaldskrárhækkanir hafa auk þess farið út í verðlagið og ekki hjálpað til að ná stöðugleika í fjármálum.
Bókun Flokks fólksins undir liðnum: Lögð fram fundargerð aðgengis- og samráðsnefndar í málefnum fatlaðs fólks frá 7. mars 2024: Áheyrnarfulltrúi Flokks fólksins leggur fram svohljóðandi bókun undir 2. lið fundargerðarinnar:
Kynning á mínum síðum. Skiljanlega fagna margir núna að þetta verkefni sé nú loksins komið á koppinn í Reykjavík enda löngu tímabært. Fulltrúi Flokks fólksins man eftir umræðu um þetta verkefni fyrir löngu. Eftir því sem sérfræðingar segja er þetta víst virkilega lítið mál, því þetta er bara virkni hjá island.is. Hér er ekki um neina fjárfestingu að ræða eins og kemur fram í kynningunni heldur einfalda aðlögun sem hefði getað verið komin fyrr. Hér er borgin virkilega á eftir. Flestir bankar og stofnanir ríkisins hafa um árabil notað rafræna auðkenningu þegar fólk hefur samband í gegnum síma eða vefspjall, og þá er send auðkenningarbeiðni á kennitölu fólks og staðfest að réttur aðili sé í símanum. Reykjavíkurborg hefur ekkert slíkt og gæti því verið að senda upplýsingar á ranga aðila.
Bókun Flokks fólksins undir liðnum: Lögð fram fundargerð íbúaráðs Grafarvogs frá 4. mars 2024. MSS24010012. Áheyrnarfulltrúi Flokks fólksins leggur fram svohljóðandi bókun undir 4. lið fundargerðarinnar:
Íbúaráðið lagði fram fyrirspurn um hvar málið uppsetning á öryggis- og eftirlitsmyndavélum í Grafarvogi er statt innan borgarinnar í dag. Í svari frá borgarritara kom þá fram að Reykjavíkurborg væri að huga að stefnumörkun til framtíðar um eftirlitsmyndavélar í borginni. Íbúaráðið vill eðlilega vita hvort enn sé verið að vinna að stefnumörkun og ef svo er hvort eitthvað liggi fyrir um lok þeirrar vinnu. Fleiri hverfi eru án efa áfjáð að fá þessar sömu upplýsingar. Í nýju svari segir nú að borgarráð samþykkti tillögu borgarstjóra á fundi sínum 19. október 2023 um að fela þjónustu- og nýsköpunarsviði ábyrgð á utanumhaldi og eftirliti með rafrænni vöktun öryggismyndavéla sem settar eru upp á vegum Reykjavíkurborgar. Fulltrúi Flokks fólksins hefur áhyggjur af því að þetta eigi eftir að taka nokkur ár eins og mörg önnur stafræn verkefni hafa tekið. Öryggismyndavélakerfi í heilu hverfin er ekki neitt smá mál. Hvorki er til stefna né heildstæðar verklagsreglur innan Reykjavíkurborgar um hvernig standa skuli að ákvörðun um uppsetningu og rekstur öryggismyndavéla eins og segir í svari borgarritara um málið.
Bókun Flokks fólksins undir liðnum: Lögð fram fundargerð umhverfis- og skipulagsráðs frá 13. mars 2024. 4. liður fundargerðarinnar er staðfestur: Áheyrnarfulltrúi Flokks fólksins leggur fram svohljóðandi bókun undir 28. lið fundargerðarinnar:
Flokkur fólksins lagði inn fyrirspurn í nóvember sl. um slysahættu í kringum framkvæmdir á Arnarnesvegi. Í svari segir að Vegagerðin beri ábyrgð en borgin úthlutar afnotaleyfi og ber leyfishafi ábyrgð á að tryggja öryggi á svæðinu. Enn er því ósvarað hver hefur eftirlit með að öryggisvörnum sé fylgt í hvívetna. Hver fer á staðinn reglulega og kannar öryggismál? Borgin veitir afnotaleyfið og getur því varla fríað sig ábyrgð eða varpað henni alfarið á Vegagerðina. Mikið ónæði hefur annars verið af framkvæmdum og borið hefur á að reglum um mörk þegar framkvæmdir standa yfir hafi ekki verið fylgt í hvívetna. Hávaðinn er ærandi og nær yfir stórt svæði Seljahverfis. Sem dæmi má ekki hefja vinnu fyrir kl. 10 um helgar. Séu þessar reglur brotnar geta íbúar fátt annað gert en að hringja á lögreglu. Þessum framkvæmdum hefur verið mótmælt vegna þess að þær eru byggðar á 20 ára umhverfismati. Flokkur fólksins, Vinir Vatnsendahvarfs og Kópavogsbær hafa ítrekað beðið um að gert verði nýtt umhverfismat enda margt breyst á svæðinu á 20 árum en því hefur ávallt verið hafnað. Þessi framkvæmd er í raun skólabókardæmi um ofríki og kúgun stofnana, sveitarfélaga og ríkis gagnvart íbúum.
Lögð fram svohljóðandi fyrirspurn áheyrnarfulltrúa Flokks fólksins um framtíð Kolaportsins:
Hver er framtíð Kolaportsins næstu vikur og mánuði? Hefur verið haft samband við hagaðila, stjórnendur og sölufólk og það upplýst um væntanlegar breytingar til skemmri og lengri tíma? Tekin hefur verið ákvörðun um að Listaskólinn flytji inn í húsnæði Kolaportsins í Tryggvagötu. Hvenær og hvert mun Kolaportið þá flytja?
Greinargerð
Í borgarráði hefur verið rætt um almenningsmarkaði á breiðum grundvelli og ýmislegt reifað í því sambandi. Ekki liggur skýrt fyrir um hver afdrif Kolaportsins verða og skapar það óvissu fyrir bæði hagaðila, sölufólk og gesti/fastagesti. Nýlega var erindisbréf starfshóps dags. 5. mars 2024 samþykkt í borgarráði sem hefur það hlutverk “að gera þarfagreiningu á húsnæði undir flóamarkað, kortleggja möguleika og bestu staðsetningar í miðborginni, þ.m.t með því að kanna markaðinn þar sem auglýst verði eftir mögulegum valkostum” Enginn með reynslu af Kolaportinu, stjórnendur þess eða sölufólk á sæti í hópnum sem er forkastanlegt. Sá hópur er sem sé sniðgenginn af borgarstjóra og meirihlutanum og borið við að það sé gert vegna samkeppnissjónarmiða.
Saga Kolaportsins er löng og merkilega og á staðurinn sér sess í hjarta fjölda fólks. Segir í erindisbréfinu að nú hafi verið tekin ákvörðun um að breyta Tollhúsinu í nýjar höfuðstöðvar Listaháskóla Íslands og því ljóst að starfsemi þess mun leggjast af í núverandi mynd. Ekki er farið neinum orðum um hvað verður um Kolaportið næstu misseri? Fulltrúa Flokks fólksins finnst mikilvægt að standa vörð um Kolaportið og megi það fyrir enga muni leggjast af. Finna þarf hið bráðasta sambærilegan stað hvort sem hann er miðsvæðis eða á öðrum stað í borginni.