Bókun Flokks fólksins undir liðnum: Lagðar fram tillögur borgarstjóra, dags. 11. nóvember 2024, að viðaukum við fjárhagsáætlun 2024:
Fulltrúi Flokks fólksins gerir athugasemd við einn lið í þessum viðauka og hann snýr að Jafnlaunastofu. Lagt er til að fjárheimildir mannauðs- og starfsumhverfissviðs hækki um 3.000 þ.kr. vegna vanáætlunar í launa- og rekstrarkostnaði. Kostnaðaraukinn verði fjármagnaður. Segir í gögnum að við gerð fjárhagsáætlunar Jafnlaunastofu fyrir árið 2024 væri launagrunnur rangur og er því óskað eftir að hann verði leiðréttur, en hann er vanfjármagnaður um 2 milljónir. Flokkur fólksins hefur áður bókað um að leggja ætti niður Jafnlaunastofu en um er að ræða dýra einingu miðað við stærð. Jafnlaunastofa var ein af þeim einingum sem spratt upp á síðasta kjörtímabili með tilheyrandi kostnaði. Þar er einn starfsmaður á vegum borgarinnar en Jafnlaunastofa er sameignarfélag í eigu Sambands íslenskra sveitarfélaga og Reykjavíkurborgar. Réttast væri að fella þess einingu undir t.d. félagsþjónustu Reykjavíkurborgar. Slík breyting myndi leiða til sparnaðar.
Bókun Flokks fólksins undir liðnum: Lagt fram bréf velferðarsviðs, dags. 7. október 2024, sbr. samþykkt velferðarráðs frá 2. október 2024 á framkvæmdaáætlun Reykjavíkurborgar í barnavernd 2024-2027, ásamt fylgiskjölum.
Framkvæmdaáætlun Reykjavíkurborgar í barnavernd 2024-2027 er mjög falleg áætlun og þar er framtíðarsýnin mikil og sóknaráætlun er jákvæð. Flokkur fólksins er sannarlega sammála því að Barnavernd Reykjavíkur vinnur gott og farsælt starf í barnaverndarmálum. Fulltrúi Flokks fólksins saknar hins vegar að bent sé á þær áskoranir sem Barnavernd Reykjavíkur stendur frammi fyrir eins og hvernig mætti bæta þjónustuna og hvort fjölga eigi meðferðarúrræðum sem er mikil þörf fyrir. Í framkvæmdaáætluninni er ekkert minnst á aukinn fjölda tilkynninga til Barnaverndar og að það sárvantar stuðnings- og fósturfjölskyldur. Það er gott að heyra að lausn sé í sjónmáli á nýju húsnæði fyrir Mánaberg og að um þessar áskoranir verði fjallað í ársskýrslu Barnaverndar Reykjavíkur.
Bókun Flokks fólksins undir liðnum: Lagt fram bréf velferðarsviðs, dags. 11. nóvember 2024, sbr. samþykkt velferðarráðs frá 8. nóvember 2024 á hækkun grunnfjárhæða fjárhagsaðstoðar til framfærslu.
Meirihlutinn hefur lagt til að fjárhæðir fjárhagsaðstoðar verði hækkaðar um 3,2%. Grunnfjárhæð fyrir einstakling sem rekur eigið heimili hækkar úr 239.895 kr. í 247.572 kr. á mánuði. Flokkur fólksins telur þetta vera smánarlega litla hækkun sérstaklega í ljósi mikillar dýrtíðar og hefur matarkarfan hækkað gríðarlega. Fulltrúi Flokks fólksins telur að við ákvörðun um árlega uppfærslu fjárhagsaðstoðar verði að hafa í huga að þeir sem þurfa á fjárhagsaðstoð að halda lifa við fátækt og jafnvel sárafátækt. Því miður hefur fátækt aukist í Reykjavík og einnig almennur ójöfnuður. Við fjárhagsáætlun fyrir árið 2024 lagði Flokkur fólksins til hækkun á grunnfjárhæð fjárhagsaðstoðar og ætti hækkunin að miða við prósentuhækkun matarkörfunnar. Þá lagði Flokkur fólksins til að grunnfjárhæð fyrir einstakling hækki úr 228.689 kr. á mánuði í 257.046 kr. Það sorglega er að grunnfjárhæðin sem nú er lögð til er langt undir þeirri fjárhæð. Þá vill fulltrúi Flokks fólksins vekja athygli á því að upphæð fjárhagsaðstoðar í Reykjavík á árinu 2024 samanborið við önnur sveitarfélög á höfuðborgarsvæðinu var sú næst lægsta, eingöngu Mosfellsbær var með lægri upphæð.
Upphæðir fjárhagsaðstoðar þurfa að duga til að lifa mannsæmandi lífi. Líkt og kemur fram í reglum um fjárhagsaðstoð Reykjavíkurborgar er skylt að veita fjárhagsaðstoð til framfærslu einstaklinga og fjölskyldna sem ekki geta séð sér og sínum farborða án aðstoðar. Grunnupphæð fjárhagsaðstoðar miðast nú við 247.572 krónur á mánuði fyrir skatt frá og með 1. janúar 2025 fyrir manneskju sem rekur eigið heimili og getur sýnt fram á það t.a.m. með því að leggja fram þinglýstan húsaleigusamning. Upphæðirnar eru breytilegar t.a.m. út frá húsnæðisstöðu og sambúðarformi. Augljóst er að um er að ræða mjög lága upphæð og ekki er hægt að sjá hvernig ætlast er til þess að fólk komist í gegnum dagana á þessum lágu upphæðum. Flokkur fólksins hefur margsinnis lagt fram tillögur um hækkun fjárhagsaðstoðar og þær tillögur hafa ekki náð fram að ganga.
Bókun Flokks fólksins undir liðnum: Lagt fram bréf fjármála- og áhættustýringarsviðs, dags. 11. nóvember 2024, þar sem óskað er eftir að borgarráð samþykki húsaleigusamning um húsnæði að Haðalandi 26, við Fossvogsskóla:
Hér er verið að taka á leigu 637 fermetra af húsaeiningum og greiða fyrir það 3.455.385 krónur á mánuði. Leigutakinn greiðir öll gjöld. Þetta hlýtur að teljast há leiga og myndi maður halda að borgin væri í stöðu til að ná hagstæðari samningum.
Bókun Flokks fólksins undir liðnum: Lagt fram bréf skrifstofu borgarstjóra og borgarritara, dags. 11. nóvember 2024, þar sem óskað er eftir að borgarráð samþykki úthlutun lóðar og sölu byggingarréttar við Grjótháls 2:
Á sínum tíma úthlutaði borgin lóðum til olíufélaga fyrir eldsneytissölu. Þegar sú starfsemi minnkaði, á síðustu árum, gátu þessi félög selt byggingarrétt á þessum lóðum fyrir háar upphæðir og það með samþykki borgarinnar. Vonandi verður girt fyrir slíkt í núverandi og framtíðar úthlutunum. Svo virðist sem eitthvað sé tekið á þessu í þessum samningi. sbr. það sem segir í gögnum: „Ef samþykkt verður breyting á deiliskipulagi að ósk lóðarhafa, sem felur í sér aukinn byggingarrétt á lóð eða breytta húsagerð (t.d. úr atvinnuhúsnæði í íbúðarhúsnæði), áskilur Reykjavíkurborg sér rétt til að endurskoða söluverð byggingarréttar á viðkomandi lóð, og/eða að innheimta greiðslu fyrir aukinn byggingarrétt á grundvelli útboðsverðs, eða með hliðsjón af söluverði sambærilegs byggingarréttar á nálægum lóðum“. Samkvæmt þessu hefur meirihlutinn mögulega eitthvað lært af fyrri mistökum.
Bókun Flokks fólksins undir liðnum: Lagt fram svar mannauðs- og starfsumhverfissviðs, dags. 17. október 2024, við fyrirspurn áheyrnarfulltrúa Flokks fólksins um hljóðvist á vinnustöðum Reykjavíkurborgar, sbr. 22. lið fundargerðar borgarráðs frá 19. september 2024.
Fulltrúi Flokks fólksins óskaði upplýsinga um stöðu hljóðvistar á vinnustöðum Reykjavíkurborgar. Hvernig er eftirliti háttað, hversu oft eru þessi mál skoðuð og hvernig? Hvernig er dregið úr hávaða á hávaðasömum vinnustöðum eins og í skrifstofurýmum og skólum? Hefur verið gerð úttekt á hljóðvist eftir að opin rými komu til sögunnar? Í svari er margt sagt sem gert er til að draga úr hávaða og segir að það sé á ábyrgð hvers og eins starfsstaðar að meta hljóðvist hjá sér og ráðast í úrbætur ef þurfa þykir. En það er kannski ekki alltaf starfsstaðurinn sem tekur ákvörðun um stærð og uppbyggingu rýma. Opin rými eru mun erfiðari viðfangs en minni og lokaðri rými. Margir sem vinna í opnum rýmum finna vel fyrir miklum hávaða, en kannski er lítið við því að gera því rýmið er stórt og mannmargt. Þegar litið er yfir kvartanir sem borist hafa má leiða líkum að því að opin rými í þeirri mynd sem þau eru voru ekki sniðug hugmynd.
Bókun Flokks fólksins undir liðnum: Lögð fram fundargerð íbúaráðs Breiðholts frá 6. nóvember 2024.
Tekið er undir bókun íbúaráðs um hættulega þrengingu til móts við Jaðarsel við framkvæmdasvæði Arnarnesvegar og á brúnni við Höfðabakka yfir Elliðaárnar milli Neðra-Breiðholts og Árbæjar. Þrengingarnar eru illa merktar og við þrengingu á Breiðholtsbraut er ekki einu sinn merkt hvoru megin við strjálar vegstikur á að aka. Þrengingarnar eru líka of miklar, þarna er hættulega þröngt fyrir bíla að mætast mitt í öllu byggingarkraðakinu beggja vegna.
Bókun Flokks fólksins undir liðnum: Lögð fram fundargerð íbúaráðs Grafarvogs frá 4. nóvember 2024. Áheyrnarfulltrúi Flokks fólksins leggur fram svohljóðandi bókun undir 2. lið fundargerðarinnar:
Víðtæk mótmæli og óánægja er með þær hugmyndir sem borgarstjóri hefur kynnt um uppbyggingu í Grafarvogi. Það mátti sjá á íbúafundi sem haldinn var í Rimaskóla 12. nóvember sl. Annar eins fjöldi fólks hefur varla sést áður á fundi af þessu tagi. Fulltrúi Flokks fólksins hefur sagt að ekki gengur að fara fram með offorsi í svona máli. Byrja þarf með autt blað, byrja á að kalla eftir hugmyndum frá fólkinu í hverfinu, hvar það sér að vænlegt sé að þétta. Vinna þarf í kringum hugmyndir fólksins, þá sem þekkja hverfið en ekki ana af stað með einhverjar tillögur. Við allar breytingar á skipulagi Grafarvogs þarf að taka ríkt tillit til staðaranda hverfisins og með hagsmuni íbúa að leiðarljósi. Grænu svæðin, sem mörg hver eru rótgróin, eru ein helsta ástæða þess að fólk hefur valið hverfið til búsetu. Ljóst er að margir þeir þéttingarreitir sem borgarstjóri hefur kynnt að sé til skoðunar í Grafarvogi að byggja á ganga gegn þessum sjónarmiðum og koma því ekki til greina eins og segir í bókun sem fram kemur í fundargerð íbúaráðs. Mörg hundruð athugasemdir hafa borist borgaryfirvöldum vegna fyrirhugaðra breytinga á grænum svæðum í hverfinu og á fjórða þúsund hafa skrifað undir mótmælalista við áformin.
Bókun Flokks fólksins undir liðnum: Lagðar fram fundargerðir stjórnar Orkuveitu Reykjavíkur frá 26. ágúst og 30. september 2024. MSS24010029
Eftir því er tekið að bjóða eigi viðskiptavinum Orkuveitunnar hleðsluáskrift hvar sem er á landinu. Hér virðist vera um útþenslustefnu að ræða á markaði sem hlýtur að vera af hinu góða. Annað sem tekið er eftir er að óskað er eftir upplýsingum um stöðu rannsóknar- og þróunarvinnu innan Orkuveitu Reykjavíkur á virkjunarmöguleikum sjávarfalla á Íslandi. Óska á eftir hver staðan sé á kortlagningu virkjanakosta og hvaða kostir komi helst til greina. Fulltrúi Flokks fólksins veltir því fyrir sér hvort Orkuveita Reykjavíkur eigi að verja fjármunum í þetta. Orkuveita Reykjavíkur hefur sérfræðiþekkingu á orkuöflun úr jarðhitakerfum en sjávarföll eru varla á sérsviði Orkuveitu Reykjavíkur. Hér er um rándýrar grunnrannsóknir að ræða sem Orkuveita Reykjavíkur gæti komið að á seinni stigum.
Bókun Flokks fólksins undir liðnum: Lögð fram fundargerð umhverfis- og skipulagsráðs frá 13. nóvember 2024. Áheyrnarfulltrúi Flokks fólksins leggur fram svohljóðandi bókun undir 19., 20. og 21. lið fundargerðarinnar:
- liður: Fulltrúa Flokks fólksins bárust athugasemdir eftir íbúafund í Grafarvogi 7. október sl. þar sem kynnt voru byggingaráform í Grafarvogi. Sýning á byggingaráformum sem sett var upp á staðnum var rifin niður án nokkurs samráðs við íbúa daginn eftir fundinn. Sumir áttu eftir að kynna sér efni hennar. Þetta er óásættanleg framkoma af hálfu borgarinnar. Sjálfsagt er að upplýsa íbúa um svona lagað, það er hluti af því sem kallað er samráð og almenn samskipti – kurteisi.20. liður, Flokkur fólksins óskaði upplýsinga um hvar Sundabraut á nákvæmlega að liggja. Stýrihópur er að störfum sem ekkert heyrist frá. Á meðan lega er ekki ákvörðuð situr margt annað fast.
Liður 21, Flokkur fólksins spurði af hverju kynningum á 2. áfanga Gufuness er frestað. Afsakanir eru á þá leið að skipulagsvinna standi yfir en hún sé flókin m.a. vegna þess að það skortir greiningu á þörfum framleiðslufyrirtækja í kvikmyndagerð. Þarna er á ferðinni óvissa og tengslaleysi við íbúa á svæðinu. Samráð er hunsað. Einnig var spurt um bráðbirgðaaðkomuveg sem virðist einhver einkavegur en því er svarað til að vegurinn eigi að bæta aðgengi að allri starfsemi á svæðinu sem er auðvitað fráleitt.
Ný mál:
Fyrirspurn um bráðabirgðarveg í Gufunesi sem var rifinn
Fulltrúi Flokks fólksins óskar upplýsingar um kostnað við bráðabirgðaveg sem var gerður 2018, en horfinn 2021. Af hverju var þessi vegur gerður? Hver bað um það og samþykkti að eyða skattfé í hann og af hverju var hann fjarlægður ? . Hvað kostaði að gera hann og hvað kostaði að fjarlægja hann? Hvað á að gera í framhaldinu? Þarna á að vera vegur skv. skipulagi. Af hverju var hann ekki bara gerður strax?
Fyrirspurn um bílastæðamál í Gufunesi
Fulltrúi Flokks fólksins óskar upplýsinga um kostnað við gerð bráðabirgða bílastæða við Smáhýsin í Gufunesi. Hver er almennt kostnaðurinn við að bæta fyrir mistökin í Gufunesi að hafa ekki strax frá byrjun næg bílastæði þar? Hvað kostar að breyta blómabeðum í bílastæði? Almenningssamgöngur eru engar í Gufunesi og vonlaust fyrir fólk að lifa þar bíllausum lífsstíl.
Fyrirspurn um hávaðamál vegna skautasvellsins á Ingólfstorgi
Fulltrúi Flokks fólksins óskar upplýsinga um hvort haft hafi verið samráð við íbúa í nærumhverfi Skautasvells Nova þegar gildistíminn var ákveðinn en hann nær frá 14.nóvember 2024 til 5. janúar 2025? Í þessu sambandi er minnt á loforð meirihlutans um að hafa samráð við íbúa þegar um er að ræða mál sem hefur mikil áhrif á lífsgæði íbúa í hverfinu, heimilislíf og líðan.
Greinargerð
Hér er um töluverða framlengingu á þeim tíma sem hingað til hefur verið leyfður. Í leyfisbréfinu kemur hvergi fram við hvaða hávaðamörk í hátalarakerfum er miðað. Hingað til hefur ekki verið nóg að benda á reglugerð um hávaða til að borgin sýni tillit og má segja að hér hafi verið valtað yfir íbúa. Nauðsynlegt er því að hávaðamörk komi skýrt fram í leyfisbréfi.
Í gangi hefur verið svokallaður spretthópur, sem reyndar hefur ekki haldið fund í meira en ár. Fulltrúi Flokks fólksins átti sæti í hópnum og minnist þess að ítrekað var rætt um mikilvægi þess að HER setji upp hljóðmæla við Ingólfstorg. Ingólfssvell er handan við hornið, þar sem jólatónlist er leikin utandyra, 10 til 12 tíma daglega, í heilan mánuð. Skautasvellið er góðra gjalda vert, en tónlistarspilun sem fer yfir viðmiðunarmörk Heilbrigðiseftirlitsins (55 dB), brýtur Lögreglusamþykkt, Reglugerð um hávaða, og ákvæði Stjórnarskrár um friðhelgi einkalífs og heimilis.
Íbúar á þessu svæði eru illa brenndir af tónlistarhávaða sem berst frá hátölurum götunnar sem truflar heimilisfrið. Tryggja þarf með skýrum hætti að Nova, Reykjavíkurborg og HER upplýsi og undirbúi þau sem stýra jólatónlistarkeyrslu Ingólfssvells og sjái til þess að hljóðstyrkur, sérstaklega bassastilling verði í algjöru lágmarki. Þess utan er ekki hægt að bjóða fólki upp á hávaðasama viðburði við svellið, sem er alls ekki innifalið í rekstrarleyfi Nova við Ingólfssvell, og brýtur í bága við lýðheilsustefnu Reykjavíkurborgar.
Tillaga um gagnabanka skapandi leiða og nálgana
Fulltrúi Flokks fólksins leggur til að kallað verði frá skólum eftir upplýsingum til að safna í Gagnabanka, upplýsingum um leiðir, nálganir sem eru styrkleikamiðaðar og sem eru til þess fallnar til að hvetja börn til þátttöku og gera þau virk í verkefnum. Gagnabanki sem þessi getur síðan verið aðgengilegur öllum á miðlægum grunni.
Greinargerð
Hér er átt við leiðir eða nálganir skóla sem þeir nota til að virkja nemendur, gera þá meira að þátttakendum en áhorfendum í mismunandi verkefnum.
Gagnabanki sem þessi getur nýst öllum sem starfa með börnum. Þær nálganir sem hér er verið að kalla eftir að safnað sé í banka eiga það sameiginlegt að vekja áhuga og kveikja í krökkum löngun til að spreyta sig og nýta sína eigin getu og færni. Dæmi um vel heppnað verkefni í þessu sambandi er Skrekkur og aðrar sviðslistir þar sem krakkar nýta styrkleika sína og færni sem þátttakendur en ekki aðeins áhorfendur. Nýjar niðurstöður Æskulýðsrannsókna sýna að ákveðinn hópur barna er ekki með nein áhugamál eða stundar tómstundir að eigin vali. Þessu þarf að breyta með hvatningu.
Hér er verið að tala um gildi skapandi kennsluaðferða sem örva sköpunargleði nemenda. Huga þarf að fjölbreytni, ímyndunarafli, og þátttöku. Um er að ræða að tengja eigið efni við vinnslu og framkvæmd. Ekki bara gera meira af því sama heldur fara nýjar leiðir, hafa opna skóla þar sem hægt er að virkja alla. Hafa líka sérsniðnar lausnir í bland við þær hefðbundnu.
Fyrirspurn um störf verktaka hjá þjónustu og nýsköpunarsviði.
Fulltrúi Flokks fólksins óskar upplýsinga um eftirfarandi:
Hversu margir verktakar hafa verið ráðnir undanfarin 2 ár til þess að sinna daglegum störfum og eru með tölvupóstfang á vegum Reykjavíkurborgar?
Hvernig eiga stjórnsýslulög við verktaka sem hafa fengið borgarpóstfang og umboð til þess að koma fram fyrir hönd Reykjavíkurborgar með störfum sínum sem verktakar innan sviðsins?
Á hvaða kostnaðarstaði og / eða kostnaðarlykla dreifast laun verktaka á vegum sviðsins?
Hefur verið kannað hvort launakjör og aðbúnaður þeirra erlendu verktaka sem starfa fyrir sviðið séu í samræmi við lög og kjarasamninga í viðkomandi landi?
Hafa verið gerðir persónuverndarsamningar við þá erlendu aðila sem hafa starfað fyrir sviðið?
Fyrirspurn vegna starfsauglýsinga og nýráðninga þjónustu og nýsköpunarsviðs.
Fulltrúi Flokks fólksins óskar upplýsinga um eftirfarandi:
Hversu mörg störf hafa verið auglýst á vegum þjónustu og nýsköpunarsviðs undanfarin 2 ár?
Hversu margt starfsfólk var ráðið til sviðsins í kjölfar starfsauglýsinga yfir sama tímabili
Hversu margt starfsfólk hefur verið ráðið inn til sviðins án auglýsinga?
Hversu mörgum hefur verið sagt upp störfum á sama tímabili?
Hvernig er launum starfsfólks skipt á milli mismunandi kostnaðarstaða og / eða kostnaðarlykla ef um slíkt er að ræða?
Greinargerð
Fulltrúi Flokks fólksins hefur verið bent á að þrátt fyrir að ekki hafi farið mikið fyrir starfsauglýsingum frá þjónustu og nýsköpunarsviði undanfarið, virðist sem að einhver fjöldi nýrra starfsmanna sé á sviðinu – hvort sem um er að ræða í hluta- eða fullu starfi. Einnig virðist það óljóst hvernig launagreiðslum er skipt upp með tilliti til kostnaðarstaða og / eða kostnaðarlykla.
Fyrirspurnir um efni niðurstaðna Æskulýðsrannsókna
Nú liggja fyrir nýjar niðurstöður Æskulýðsrannsókna. Ýmislegt markvert ber þar á góma og í framhaldi er spurt hvernig skóla- og frístundasvið hyggst bregðast við:
Að 36% barna upplifa kvíða
Einelti meðal drengja í 6. og 7. bekk hefur aukist
Stelpur hafa aukið neyslu nikótínpúða, kannabis og áfengis samkvæmt mælingum
Stelpur verja lengri tíma á samfélagsmiðlum og verða þar frekar fyrir neikvæðum áhrifum en drengir.
Hvernig hyggst skóla og frístundasvið beita sér til að aðstoða foreldra að hjálpa börnum sínum að draga úr skjánotkun í þeim tilfellum þar sem skjánotkun er komin úr böndum?
Hefur skóla- og frístundasvið í hyggju að fræða foreldra sérstaklega um hvernig þeir geta frætt börn sín um hættur á netinu í ljósi þess að rannsóknin sýnir að um og yfir helmingur nemenda á erfitt með að minnka notkun sína á samfélagsmiðlum? Um þriðjungur ungmenna í 10. bekk upplifir vanlíðan þegar þau hafa ekki aðgang að samfélagsmiðlum og stúlkur eru sérstaklega viðkvæmar fyrir þessum áhrifum.
Hefur skóla- og frístundasvið í hyggju að fræða foreldra sérstaklega um hvernig þeir geta frætt börn sín um hvernig þær skuli varast kynferðislega áreitni og ofbeldi í ljósi niðurstaðna um að tíu prósent 10. bekkinga segjast samkvæmt skýrslunni hafa verið snertir kynferðislega af einhverjum fullorðnum? Það eru 15 prósent stúlkna og fjögur prósent drengja.
54 prósent stúlkna í 10. bekk hafa fengið beiðni um að senda nektarmyndir, sem eru fimm prósentum færri en frá árinu áður. Á sama tíma hafa um 16 prósent stráka í 10. bekk fengið sambærilega beiðni. Hvernig hyggst skóla- og frístundasvið bregðast við þessum niðurstöðum?