Umræða um aukið álag á starfsfólk leikskóla eftir að stytting vinnuvikunnar kom til framkvæmdar (að beiðni borgarfulltrúa Flokks fólksins)
Greinargerð með umræðunni:
Árið 2021 var ákveðið að fara í styttingu vinnuvikunnar. Tvennum sögum fer af því hvernig framkvæmdin hefur gengið og hvort hún hafi leitt til góðs fyrir alla. Aðgerðinni var eðlilega fagnað, hver vill ekki stytta vinnuvikuna? Enginn vill sleppa vinnutímastyttingunni. Með því að stytta vinnutíma eykst almenn starfsánægja og fullvíst má telja að tíðni veikinda lækkar. Ekki liggur fyrir hvort útfærslu sé ólokið á einhverri stofnun.
Því miður hefur nú komið á daginn að aðgerðin hefur valdið auknu álagi á sumar stéttir og jafnvel vanlíðan. Hér er sérstaklega rætt um starfsfólk á leikskólum.
Síðan vinnutímastytting tók gildi í leikskólum hefur álag á starfsfólk aukist sem þó var mikið fyrir. Strax í innleiðingarferlinu hjá leikskólum varð ljóst að stytting vinnuvikunnar yrði krefjandi verkefni líkt og hjá öðrum starfsstöðvum þar sem unnið er með fólk. Vinnutímastyttingin bættist þá ofan á þá manneklu og langtímaveikindi sem lengi hefur hrjáð starfsemi leikskólanna í Reykjavík. Dæmi eru einnig um að á sömu starfsstöð sé tvenns konar útfærsla á vinnutímastyttingu í gangi, annars vegar hjá faglærðum leikskólakennurum og öðrum félagsmönnum Félags leikskólakennara og hins vegar hjá ófaglærðu starfsfólki. Heyrst hefur einnig að starfsfólk sé beðið um að taka af styttingunni sinni ef það þarf að skreppa frá, t.d. fara til læknis.
Meirihlutinn í Borgarstjórn Reykjavíkur ítrekaði strax í upphafi ferilsins að stytting vinnuvikunnar mætti ekki kosta borgarsjóð neitt. Ljóst var frá byrjun að það var með öllu óraunhæft. Útilokað var að stytta vinnuviku án kostnaðar t.d. hjá þeim sem vinna vaktavinnu en einnig hjá þeim sem eru í dagvinnu. Aðgerðin var flókin enda þurfti ekki aðeins að breyta vaktaplaninu heldur einnig forritum sem halda utan um launamál. Fulltrúi Flokks fólksins hefur óskað upplýsinga um hvað aðgerðin kostaði þegar upp var staðið, hjá dagvinnufólki annars vegar og hjá vaktavinnufólki hins vegar. Ekki hefur borist svar frá mannauðs- og starfsumhverfissviði við fyrirspurn um kostnað við styttingu vinnuvikunnar í dagvinnu t.d. kostnað við að bæta í mönnunargöt í dagvinnu.
Borgarfulltrúi Flokks fólksins óskar eftir umræðu um málið í borgarstjórn og sérstaklega þann hluta að styttingin sé mögulega að valda sumu starfsfólki enn meira álagi en það var undir fyrir styttingu vinnuvikunnar.
Bókun Flokks fólksins undir liðnum: Umræða um aukið álag á starfsfólk leikskóla eftir að stytting vinnuvikunnar kom til framkvæmdar (að beiðni borgarfulltrúa Flokks fólksins):
Árið 2021 var ákveðið að fara í styttingu vinnuvikunnar. Framkvæmdin hefur ekki verið til góðs fyrir alla. Aðgerðinni var eðlilega fagnað því með styttingu vinnutíma eykst almenn starfsánægja. Því miður hefur stytting vinnutímans valdið auknu álagi á sumar stéttir. Síðan hún tók gildi í leikskólum hefur álag á starfsfólk aukist sem þó var mikið fyrir. Vinnutímastyttingin bættist ofan á þá manneklu og langtímaveikindi sem lengi hefur hrjáð starfsemi leikskólanna í Reykjavík. Mikið ósamræmi er milli leikskóla hvernig styttingin er útfærð sem skapað hefur óöryggi og jafnvel úlfúð. Sums staðar eru um tvenns konar útfærslu að ræða á vinnutímastyttingu á sama leikskóla, annars vegar hjá faglærðum leikskólakennurum og hins vegar hjá ófaglærðu starfsfólki. Á sumum vinnustöðum þarf starfsfólk að taka af styttingunni sinni ef það þarf t.d. að fara til læknis. Það veldur óánægju þegar það gilda ekki sömu reglur fyrir alla á vinnustaðnum. Finna þarf leiðir til að auka samræmingu. Meirihlutinn ítrekaði strax í upphafi að stytting vinnuvikunnar mætti ekki kosta borgarsjóð neitt. Það var auðvitað fráleitt og fullkomlega óraunhæft eins og komið hefur á daginn. Fulltrúi Flokks fólksins hefur óskað upplýsinga um kostnað en ekki fengið svör frá mannauðs- og starfsumhverfissviði um kostnað við að bæta í mönnunargöt í dagvinnu.
Bókun Flokks fólksins undir liðnum: Fram fer umræða um stefnumótun í málefnum innflytjenda og úttekt OECD.
Borgarfulltrúa Flokks fólksins finnst skýrsla OECD um stöðu innflytjenda á Íslandi gefa skýra mynd af stöðu mála í þessum málaflokki. Það er sláandi að hlutfall þeirra sem segjast hafa góða kunnáttu í tungumálinu er lægst hér á landi á meðal svarenda í OECD-ríkjum eða 18% samanborið við 60% að meðaltali innan Evrópska efnahagssvæðisins. Námsárangur barna sem fædd eru á Íslandi en eiga foreldra með erlendan bakgrunn er áhyggjuefni. Meira en helmingi þessara barna gengur illa í PISA-könnuninni sem þýðir að þau eiga erfitt með verkefni á borð við að skilja og túlka einfalda texta. Umræða um íslensku, íslenskukennslu og þjálfun fólks af erlendum uppruna hefur verið tekin í borgarstjórn að frumkvæði borgarfulltrúa Flokks fólksins. Umræðan hefur m.a. snúist um hver sé ábyrgð Reykjavíkurborgar og hvað er hægt að gera betur. Móttaka barna og fullorðinna af erlendum uppruna er eitt stærsta verkefnið sem blasir við íslensku samfélagi. Innflytjendum hefur fjölgað mikið undanfarið í Reykjavík og eru nú rúmlega 20% af íbúum. Þörf er á að aðstoða þá sem ætla að búa hér við að skilja og tala íslensku svo þeir geti aðlagast sem best íslensku samfélagi. Íslenskukunnátta fólks af erlendum uppruna er lykillinn að farsæld og framgangi þeirra í þjóðfélaginu.
Bókun Flokks fólksins undir liðnum: Borgarstjórn Reykjavíkur samþykkir að leggja til við svæðisskipulagsnefnd Samtaka sveitarfélaga á höfuðborgarsvæðinu að hefja viðræður um endurskoðun vaxtarmarka þéttbýlis á höfuðborgarsvæðinu til að unnt verði að auka framboð lóða til íbúðauppbyggingar í Reykjavíkurborg.
Flokkur fólksins telur nauðsynlegt að brjóta nýtt land undir byggð. Það hefur verið hangið of stíft í þéttingarstefnunni til að geta sett sem flesta í kringum framtíðarborgarlínu. Þétting byggðar var vissulega nauðsynleg og enn má þétta t.d. í Grafarvogi. Sú uppbygging sem væntanleg er í Grafarvogi og Úlfarsárdal hefði mátt hefjast fyrir löngu en vandinn er að uppbyggingin þar er aðeins dropi í hafið. Slík er stærðargráða húsnæðisvandans. Reykjavíkurborg hefur aldrei haldið í við þörfina eftir íbúðarhúsnæði og lengi var hrein og klár stöðnun. Þetta hefur leitt til mikils óstöðugleika þar sem hærra húsnæðisverð veldur verðbólgu og leiðir til hærra vaxtastigs. Borgin hefur legið á lóðum til einstaklinga og smærri hópa sem vilja byggja sjálfir yfir sig og sína. Hræðslan við að borgin verði dreifðari hefur haldið öllu niðri. Skapa þarf betri skilyrði til uppbyggingar, einfalda regluverk og stjórnsýslu og bæta starfsskilyrði byggingariðnaðar. Nú eru vísbendingar um samdrátt í verkefnum meðal arkitekta og verkfræðinga sem þýðir minna framboð á íbúðarhúsnæði sem eykur vandann. Hvernig sem á þetta mál er litið, hvort sem byggja á íbúðir til kaups eða leigu, þá hefur lóðaskortur heft íbúðauppbyggingu. Vaxtarmörk svæðisskipulags höfuðborgarsvæðisins hafa ekki tekið mið af fólksfjölgun í Reykjavík.
Bókun Flokks fólksins undir liðnum: Lagðar fram fundargerðir borgarráðs frá 19. og 26. september. Borgarfulltrúi Flokks fólksins leggur fram svohljóðandi bókun undir 6. lið fundargerðar borgarráðs frá 19. september:
Full ástæða er til að endurskoða skipulagningu beggja viðburða í ljósi þeirra alvarlegu ofbeldistilvika sem átt hafa sér stað á Menningarnótt síðustu ár, nú síðast hnífaárásar sem leiddi til dauða ungrar stúlku. Það er mat margra án efa að Menningarnótt sé komin úr böndunum og er sannarlega komin langt frá því sem hún var hugsuð í upphafi sem var fyrst og síðast að vera fjölskylduhátíð. Þegar líða tekur á kvöldið á Menningarnótt er fátt sem minnir á fjölskylduhátíð. Eins og fulltrúi Flokks fólksins sagði í ræðu sinni í borgarstjórn í umræðu um ofbeldistilvik á Menningarnótt er kominn tími til að breyta skipulagi Menningarnætur. Fulltrúi Flokks fólksins nefndi í ræðu sinni að stytta þyrfti dagskrá t.d. þannig að henni yrði lokið kl. 22 og þá verði hafist handa við að rýma bæinn. Það þýðir eðli málsins samkvæmt að engin verði flugeldasýningin. Flugeldasýning er þess utan umdeilt fyrirbæri þar sem mengun hlýst af slíkri sýningu. Það þykir því einhverjum ekki mikill missir af henni. Öryggi borgaranna þarf að vera í fyrirrúmi og áhersla á fyrirbyggjandi aðgerðir en ekki einungis að slökkva elda þegar skaðinn er skeður.
Bókun Flokks fólksins: Borgarfulltrúi Flokks fólksins leggur fram svohljóðandi bókun undir 6. og 7. lið fundargerðar stafræns ráðs frá 24. september:
Liður 6: Fulltrúi Flokks fólksins spurði um hvort skjölum hafi verið eytt hjá Borgarskjalasafni, frá 7. mars 2023. Fram kemur í svari að búið sé að eyða sýnishornum fylgiskjala fjárhagsbókhalds samkvæmt eldri reglum og finnst fulltrúa Flokks fólksins það einkennilegt. Fram kemur einnig að þann 31. janúar 2024 voru allmörg gögn grisjuð í samræmi við reglur en nokkuð er óljóst hvað felst í orðinu „grisjun“ í þessu sambandi. Ekki kemur fram hverjar reglur séu um grisjun skjala sem hafa verið til varðveislu á opinberu safni eins og Borgarskjalasafni.
Liður 7. Fulltrúi Flokks fólksins óskaði upplýsinga um hvort það sé rétt sem fullyrt hefur verið af heimildarmönnum að vínkælir sé til staðar á upplýsingatækniskrifstofu þjónustu- og nýsköpunarsviðs á 5. hæð í Borgartúni í rými sem var kallað Vínstofan, nú Bríetarstofa. Spurt er vegna gruns um spillingu á þjónustu- og nýsköpunarsviði síðustu ár. Segir í svari að nokkrir kælar séu á sviðinu og einn í fundarherbergi á 5. hæð þar sem geymdir eru drykkir sem keyptir hafa verið m.a. vegna fagnaða, starfsloka, sem eru æði tíð, og annarra viðburða. Sviðið átti viðskipti við Ölgerðina á níu mánaða tímabili árið 2023 sem fullyrt er að sé algengt á vinnustöðum. Fulltrúi Flokks fólksins dregur það stórlega í efa.