Færslur

Tillaga borgarfulltrúa Flokks fólksins um endurskoðun ákvörðunar um niðurlagningu Borgarskjalasafns 

Borgarstjórn samþykkir að endurskoða ákvörðun sína frá 7. mars 2023 um að leggja niður Borgarskjalasafn í núverandi mynd og að starfsemi safnsins verði tryggð til framtíðar.

Greinargerð
Um þessar mundir liggja fyrir drög að frumvarpi til laga um breytingu á lögum um opinber skjalasöfn. Þar segir að ef standi til að hætta starfsemi héraðsskjalasafna skuli Þjóðskjalasafni afhent safngögnin á kostnað þess sveitarfélags sem að því stendur. Í 2. gr. b-liðar er kveðið á um „að þegar skjöl sveitarfélags séu afhent Þjóðskjalasafni Íslands skal greiða fyrir móttöku þeirra, vörslu, ráðgjöf um skjalahald og eftirlit samkvæmt gjaldskrá.“ Með þessu má ætla að ef frumvarpið nær fram að ganga þá eru forsendur meirihlutans fyrir lokun Borgarskjalasafns brostnar þar sem ljóst má telja að flutningur Borgarskjalasafns eða gagna safnsins yfir í Þjóðskjalasafn á eftir að vera kostnaðarsamt.
Eins flestum er í fersku minni kom ákvörðun um niðurlagningu Borgarskjalasafns eins og reiðarslag, nánast úr launsátri. Samráði um frumvarpið lauk fyrir skemmstu og hafa margar athugasemdir borist. Í umsögnum er m.a. lögð áhersla á, þ.m.t. frá vísindasamfélaginu, að ákvörðun um að leggja niður Borgarskjalasafn verði snúið við. Einnig að mikilvægt sé að tryggja örugga skjalavörslu og að lögfesta skyldu sveitarfélaga til að vera aðili að héraðskjalasafni.

Bókun Flokks fólksins undir liðnum: Lögð fram svohljóðandi tillaga borgarfulltrúa Flokks fólksins: Borgarstjórn samþykkir að endurskoða ákvörðun sína frá 7. mars 2023 um að leggja niður Borgarskjalasafn í núverandi mynd og að starfsemi safnsins verði tryggð til framtíðar.

Tillaga Flokks fólksins um að endurskoða ákvörðun um niðurlagningu Borgarskjalasafns hefur verið felld. Ástæða niðurlagningar átti að vera sparnaður. Þær forsendur eru brostnar verði frumvarp til laga um breytingu á lögum um opinber skjalasöfn samþykkt. Þá mun þurfa að greiða gjald fyrir sérhvert skjal, móttöku, vörslu og eftirlit. Tilkynning um niðurlagningu safnsins kom sem reiðarslag og vakti reiðiöldu meðal fræðimanna og borgara. Þjónustu- og nýsköpunarsvið réð KPMG til að gera úttektarskýrslu með niðurstöðu sem Flokkur fólksins segir að sé pöntuð. Skýrslan er á köflum bæði ófagleg og ótrúverðug enda liggur fyrir að þessa aðila skortir fagþekkingu á starfsemi héraðsskjalasafna. Sérstaklega er vegið að borgarskjalaverði. Svo virðist sem meirihlutinn sé áfjáður í að losa sig við borgarskjalavörð sem féll í ónáð þegar hún réðst í að gera frumkvæðisathugun í hinu svokallaða braggamáli þar sem fram kom að farið hafði verið á svig við lög. Fleiri hafa bent á tengsl málefna braggans og niðurlagningar Borgarskjalasafns, svosem í pistli Björns Bjarnasonar fyrrum menntamálaráðherra frá 18. febrúar 2023 með yfirskriftinni „Braggi lokar Borgarskjalasafni“. Flutningur gagna safnsins yfir í Þjóðskjalasafn á eftir að verða kostnaðarsamur. Réttast væri að hætta við að leggja niður Borgarskjalasafn og biðja alla þá sem orðið hafa fyrir skaða vegna þeirrar ákvörðunar afsökunar.

Bókun Flokks fólksins undir liðnum: Fram fer umræða um úrbætur á vetrarþjónustu Reykjavíkur:

Vetrarþjónusta hefur stórbatnað en auðvitað má alltaf gera betur. Fulltrúi Flokks fólksins sat í stýrihópi um bætta vetrarþjónustu og gekk starf hópsins vel. Áhersla Flokks fólksins var m.a. að tryggja betri þjónustu í húsagötum og bæta viðbragðsflýti. Lögð var áhersla á að reyna að forðast að ryðja snjó og krapa upp á gangstéttir, göngustíga eða fyrir innkeyrslur/innganga híbýla. Ljóst er að betri vetrarþjónusta hefur í för með sér aukinn kostnað. Einn hæsti kostnaðarliðurinn, 50 milljónir, er „eftirlit með vetrarþjónustu“ sem lagt er til að verði stórefld. Ráðnir hafa verið starfsmenn til að sinna eftirlitinu, t.d. fylgjast með verklagi og framgangi og tryggja að þjónustan skili fullnægjandi árangri. Fulltrúi Flokks fólksins styður gott eftirlit enda er það eina leiðin til að sannreyna að framkvæmd og aðferðir séu í samræmi við ákvarðanir. Þó mætti kannski halda að eftir ákveðinn reynslutíma á framkvæmd tillagna vetrarþjónustuhópsins ætti vinnan að ganga eins og smurð vél og samhliða væri hægt að draga úr ströngu eftirliti. En klárt er að þessi mál verða að vera í lagi.

Bókun Flokks fólksins undir liðnum: Samþykkt að taka á dagskrá umræðu um rekstur Félagsbústaða:

Flokkur fólksins telur sjálfsagt að endurskoða rekstrargrundvöll Félagsbústaða. Það getur ekki gengið að fátækasta fólkið í borginni eigi að bera aðalábyrgð á fjárhagslegri sjálfbærni Félagsbústaða. Í stefnu Félagsbústaða er gert ráð fyrir fjárhagslegri sjálfbærni, m.ö.o. á fyrirtækið að standa undir sér. Nýlega hefur verið samþykkt að halda hækkunum á gjaldskrám innan við 3,5% og sérstaklega á að horfa til barnafjölskyldna. Barnafjölskyldur sem leigja hjá Félagsbústöðum eru verst settu fjölskyldurnar og þess vegna er hækkun leigu í mótsögn við loforð Reykjavíkurborgar um að halda gjaldskrárhækkunum í skefjum. Í nýlegri könnun um biðlista og leigjendur Félagsbústaða má sjá að stærsti hlutinn eru öryrkjar eða óvinnufærir einstaklingar sem einfaldlega eiga ekki þetta fjármagn. Með hækkandi leigu munu fleiri lenda í vanskilum og mál þeirra send í lögfræðiinnheimtu sem eykur jafnvel kostnaðinn enn frekar. Annað þarf að koma til, s.s. að Reykjavíkurborg komi með bein framlög til Félagsbústaða til þess að halda leiguverði stöðugu. Það er einfaldari aðgerð en að hanna bótakerfi fyrir þennan stóra leigjendahóp sem fyrirfram er vitað að ræður ekki við þessar miklu hækkanir. Það er líka sjálfsagt að fjármála- og áhættustýringarsvið skoði möguleikann á lengingu í lánum til að lækka greiðslubyrði.

Bókun Flokks fólksins undir liðnum: Lögð fram svohljóðandi tillaga borgarfulltrúa Sjálfstæðisflokksins  að borgarstjórn samþykki að fela umhverfis- og skipulagssviði að hefja vinnu við endurskoðun á Aðalskipulagi Reykjavíkur með það að markmiði að skipuleggja blandaða byggð í Geldinganesi með áherslu á íbúðauppbyggingu.

Borgarfulltrúi Flokks fólksins styður þessa tillögu. Ekki er seinna vænna að hefjast handa við skipulagningu framtíðaríbúðasvæðis í Geldinganesi, með hliðsjón af skipulagsvinnu Sundabrautar. Öll uppbygging hefur gengið hægt. Kerfið er svifaseint og hafa fjölmargir verktakar farið annað. Rafrænir ferlar eru ekki tiltækir að fullu þegar sótt er um byggingarleyfi. Núverandi meirihluti er pikkfastur í þéttingu byggðar. Aðrir kostir eru vart ræddir. Flokkur fólksins styður þéttingu byggðar upp að skynsamlegu marki en ekki þegar hún er farin að taka á sig mynd trúarlegrar sannfæringar. Það dugar skammt að karpa um hvort byggt sé mikið eða lítið. Vandinn er að það er ekki byggt nóg. Það er skortur á hagkvæmum íbúðum fyrir fyrstu kaupendur, fyrir efnaminna fólk og fyrir venjulegt fólk. Flokkur fólksins vill þétta byggð þar sem innviðir þola þéttingu og brjóta nýtt land undir byggð fyrir hagkvæmar íbúðir t.d. í suðurhlíðum Úlfarsfells og svæðinu austur af Úlfarsárdal. Kjalarnes kemst í alfaraleið með Sundabraut sem og Geldinganes.

Bókun Flokks fólksins undir liðnum: Lagðar fram fundargerðir borgarráðs frá 7. og 14. mars. Borgarfulltrúi Flokks flokksins leggur fram svohljóðandi bókun undir 21. og 22. lið fundargerðarinnar frá 14. mars:

Þjónustu- og nýsköpunarsvið sækir um heimild til að hefja verkefnið gagnaverkefni framtíðar og verkefnið uppbygging gagnalandslags. Þjónustu- og nýsköpunarsvið hefur yfirleitt fengið það fjármagn sem það óskar eftir þrátt fyrir ónógar upplýsingar varðandi verkáætlanir og eftirfylgni árangurs. Nú hefur Microsoft innleiðing borgarinnar kostað hátt í milljarð með öllu. Inni í þeim leyfa pakka eru öll Power BI gagnavinnslutól Microsoft. Ríkið hefur verið að nota þessi tól með góðum árangri í nokkur ár og eru grunntól Fjársýslunnar og fleiri stofnana. Af hverju er borgin að leita að öðrum tólum en þeim sem hún er nú þegar að greiða leyfi fyrir og flestir nota? Fyrir 415 milljónir væri hægt að byggja litla blokk. Skortur hefur verið á eftirfylgni og nútíma árangursstjórnun. Forvitnilegt væri að vita hvað hefur áunnist í gagnamálum borgarinnar frá því að skýrsla starfshóps um gagnastefnu og fyrirkomulag gagnamála var lögð fram í ágúst 2017 af forvera þjónustu- og nýsköpunarsviðs. Það virðist vera að stundum sé sviðið að óska eftir fjármagni í verkefni sem sótt hefur verið um áður. Fyrsta skrefið í bættu gagnalandslagi hlýtur því að vera yfirlit og eftirfylgni yfir öll þau verkefni sem þjónustu- og nýsköpunarsvið hefur óskað eftir fjármagni í undanfarin ár.

Borgarfulltrúar Samfylkingar, Framsóknar, Pírata og Viðreisnar leggja fram svohljóðandi gagnbókun:

Fulltrúar meirihlutans vísa þessari gagnrýni alfarið á bug. Öllum fyrirspurnum um stöðu verkefna, nýtingu fjármuna og framvindu hefur verið svarað, ítrekað. Farið hefur verið yfir framvindu stafrænnar umbreytingar margoft, bæði í borgarstjórn, borgarráði og á fundum stafræns ráðs og áður mannréttinda-, nýsköpunar- og lýðræðisráðs. Aldrei hefur reynst steinn yfir steini í þessum síítrekuðu dylgjum fulltrúa Flokks fólksins. Eins eru gögn um ársreikninga og ársskýrslur þjónustu- og nýsköpunarsviðs aðgengilegar. Það er óboðlegt að vegið sé að fagmennsku og starfsheiðri þeirra sem fást til að starfa við stafræna þjónustuumbreytingu hjá borginni og er þeim borgarfulltrúum sem tekið hafa þátt í þessum linnulausa rógburði ekki til sóma.

Bókun Flokks fólksins undir liðnum: Fundargerð borgarráðs frá 7. mars: Borgarfulltrúi Flokks fólksins leggur fram svohljóðandi bókun undir 3. lið fundargerðar skóla- og frístundaráðs frá 11. mars og 25. lið fundargerðar stafræns ráðs frá 13. mars:

3. liður fundargerðar skóla- og frístundaráðs: Flokkur fólksins lagði til að Reykjavíkurborg semdi við Hljóðbókasafnið fyrir hönd allra skólanna í Reykjavík svo það opnist aðgengi fyrir alla nemendur en ekki bara þá sem hafa fengið greiningu. Tillögunni var vísað til skóla- og frístundaráðs þar sem á henni var gerð breyting og þar með var tillagan orðin tillaga meirihlutans. Hvergi kemur fram í hinni breyttu tillögu að hún hafi átt uppruna sinn í Flokki fólksins. Þetta er gagnrýnivert.25. liður fundagerðar stafræns ráðs: Flokki fólksins finnst ályktunartillaga meirihlutans afar veikburða en þar kemur fram gagnrýni á Flokk fólksins vegna þess að flokkurinn leggur fram margar fyrirspurnir til þjónustu- og nýsköpunarsviðs. Þetta eru einmitt fyrirspurnir sem stafrænt ráð ætti að vera að leggja fram til að sinna hlutverki sínu. Stafrænt ráð á ekki að vera eins og gamaldags stimpilsskrifstofa sem stimplar áfram gagnrýnislaust alla pappíra sem frá þjónustu- og nýsköpunarsviði koma. Um svörin er það að segja að þau eru stuttaraleg og innihaldslaus. Of oft er sagt að upplýsingar liggi ekki fyrir. Er ekki vandinn einfaldlega sá að gagnavinnsla borgarinnar er ekki langt á veg komin þrátt fyrir alla þá milljarða sem sviðið er búið að fá undanfarin ár?