Bókun Flokks fólksins undir liðnum: Að lokinni grenndarkynningu er lögð fram að nýju umsókn Sigríðar S. Sigþórsdóttur, dags. 4. janúar 2024, um breytingu á deiliskipulagi Nýlendureits vegna lóðarinnar nr. 42 við Vesturgötu:
Breytingin á Nýlendureit felur í sér að einni hæð verður bætt ofan á húsið nr. 42 á Vesturgötu. Skuggavarp verður of mikið og mun breytingin hafa umtalsverð áhrif á umhverfið. Einnig er sótt um að stækka byggingarreit vegna byggingu lyftuhúss á austurhlið, bæta við svölum á vesturhlið hússins á 2. og 3. hæð og koma fyrir leik- og dvalarsvæði fyrir íbúa á lóð. Það er aðallega hæðin sem byggja á ofan á húsið, sem er frekar hátt fyrir sem er bratt að mati fulltrúa Flokks fólksins. Hér er verið að hækka hús í gróinni byggð og þar með auka á skugga á lóðum nágranna með tilheyrandi neikvæðum afleiðingum s.s. á gróður og margt fleira. Skuggar af byggingum eru einn af mörgum þáttum sem hefur áhrif á andlega líðan fólks.
Bókun Flokks fólksins undir liðnum: Lögð fram fundargerð SORPU bs. nr. 501 dags. 14. ágúst 2024, ásamt fylgigögnum. USK23010167. Áheyrnarfulltrúi Flokks fólksins leggur fram svohljóðandi bókun við 3. og 4. lið fundargerðar:
Liður 3 – Ekki er nýtt að hagnaður SORPU sé undir áætlun en hagnaður fyrri hluta árs er 22% undir áætlun. Framkvæmdastjóri gerir grein fyrir fyrirhuguðum breytingum á skipulagi SORPU. Með breytingunum er stefnt að því að bæta og samþætta þjónustu SORPU við almenning og stuðla að samræmi í þjónustuveitingu. Markmið með breytingunum er auk þess að valdefla starfsfólk, aukið öryggi og vellíðan í starfi. Fulltrúi Flokks fólksins hefði viljað vita nánar hvers lags skipulagsbreytingar þetta eru.
Liður 4 – Áformað er að fara með fríðu föruneyti til að skoða hátækni sorpbrennslur í ferð til Finnlands. Áhugi er á að stjórn SORPU og framkvæmdastjórar sveitarfélaga á höfuðborgarsvæðinu taki þátt í ferðinni. Flokkur fólksins fagnar hverju skrefi sem tekið er til að nýta þá orku og hráefni sem eru í sorpinu. Á því sviði eru nágrannar okkar langt á undan okkur og flytja þarf þekkingu þeirra hingað út. Hins vegar er það spurning hvort allir í stjórn SORPU þurfi að fara í ferð af þessu tagi? Hér er vel í lagt. Þekkingu er einnig hægt að miðla milli manna innanlands.
Lögð fram að nýju tillaga áheyrnarfulltrúa Flokks fólksins um möguleg svæði í borgarlandinu fyrir hjólhýsabúa sbr. 13. liður fundargerðar umhverfis- og skipulagssviðs, dags. 21. ágúst 2024.
Vísað til umsagnar umhverfis- og skipulagssviðs, skrifstofu stjórnsýslu og gæða. USK24080115
Drög að bókun þegar málinu er vísað frá:
Fulltrúi Flokks fólksins lagði til á fundi umhverfis- og skipulagsráðs að eftirfarandi svæði í borgarlandinu verði skoðuð sem hentug svæði fyrir hjólhýsabúa (hjólabúa).
Tillögunni er hafnað.
Hjólhýsabúar eru staðsettir nánast á sorphaug við Sævarhöfða sem stendur. Samtök hjólabúa hafa farið þess á leit við Reykjavíkurborg að farið verði nú þegar í að finna varanlega staðsetningu fyrir langtímastæði hjólhýsa, húsbíla og annarra slíkra tækja í samstarfi við hjólabúa. Óvissa hefur árum saman ríkt um málefni hópsins sem hefur mátt þola að vita aldrei hversu lengi þeir fá að vera á hjólasvæðum. Þau svæði sem vel má skoða í þessu sambandi er svæði meðfram Hamrahverfinu að norðaverðu, fyrir vestan gamla Gufunesbæinn; svæði í Gufunesi; þrjú svæði verði skoðuð við Rauðavatn s.s. Rauðavatnssvæði austan við Rauðavatn, Almannadalur. Þarna er rafmagn og göngustígur, þyrfti að búa til lítinn veg. Þarna er stutt í þjónustu. Einnig mætti skoða rjóður innan við Veituhúsið upp á Hólmsheiði, fyrir sunnan þjóðvegi 1 við Rauðhóla. Fulltrúi Flokks fólksins trúir ekki að skilja eigi þennan hóp eftir út í kuldanum af hræðslu við að borgin sitji uppi með risastóran “trailer park” sem borgarstjóra finnst svo óaðlaðandi og hræðileg hugmynd sbr. málflutning hans í fréttum.
Lögð fram að nýju tillaga áheyrnarfulltrúa Flokks fólksins um hólma í ofanvatnstjörn norðan við Breiðholtsbraut, sbr. 31. liður fundargerðar umhverfis- og skipulagsráðs 25. september 2024.
Vísað til umsagnar umhverfis- og skipulagssviðs, skrifstofu umhverfisgæða. USK24090314
Drög að bókun þegar málinu er vísað frá:
Fulltrúi Flokks fólksins lagði til að í þeirri ofanvatnstjörn sem koma á fyrir norðan við Breiðholtsbraut verði gerður hólmi í þeim tilgangi að búa fuglum öruggt griðland. Tillaga er felld, ekki vitað af hverju.
Fulltrúi Flokks fólksins vill huga að fuglum og að sem flestir ungar komist á legg. Í Reykjavík eru margar tjarnir, flestar manngerðar.Sumar tjarnir eru til að jafna streymi leysingavatns, eða hindra að leysingavatn af götum fari beint t.d. út í Elliðaár, (settjarnir) en aðrar til að fegra umhverfið. Tjarnir þurfa umhirðu og þrif í kringum þær og mikilvægt er að gerður verði hólmi í tjarnir til að mynda friðland fyrir fugla. Hólmar eru í raun einn af fáum stöðum þar sem þeir eru í vari t.d. fyrir köttum. Gerð hólma í tjarnir ætti örugglega ekki að setja borgarsjóð á hausinn. Það kostar ekki mikið í viðbót að skella upp hólma þegar vinnuvélar eru hvort eð er að grafa fyrir tjörn. Uppgröft má nota og svo gera einhverja grjóthleðslu á bökkum hólmans.
Lögð fram að nýju fyrirspurn áheyrnarfulltrúa Flokks fólksins um hraðamælingar, sbr. 32. liður fundargerðar umhverfis- og skipulagsráðs 25. september 2024.
Vísað til umsagnar umhverfis- og skipulagssviðs, skrifstofu samgangna og borgarhönnunar. USK24090315
Ný mál
Tillaga um göngubrú yfir Sæbraut
Í ljósi hörmulegs banaslyss sem varð við Sæbraut fyrir skemmstu leggur fulltrúi Flokks fólksins til að hefjast skuli handa strax við að byggja bráðabirgða göngubrú yfir Sæbraut við gatnamót við Skeiðarvog/Kleppsmýrarveg og einnig að komið verði nú þegar upp snjallstýrðum gangbrautarljósum sem les umferðarflæði, aðstæður og hreyfingar vegfarenda.
Greinargerð
Snjallstýrð ljósastýringarkerfi og gangbrautir eru við lýði í þeim löndum sem við berum okkur saman og því mikilvægt að koma þeim upp hið fyrsta á þessu svæði og víðar í Reykjavík þar sem umferðin er mikil og umferðaröryggi lítið. Vogabyggð er orðin fjölmenn byggð, en þannig er málum háttað að börnin í hverfinu þurfa daglega að fara yfir Sæbrautina til að sækja skóla, frístundir og fleira. Því miður virðist oft þurfa alvarlegan atburð til að farið er í alvöru úrbætur. Íbúar hafa lengi verið að kalla eftir úrbótum og hefur Flokkur fólksins ítrekað óskað eftir betrumbótum og að hraða máli vegna hættunnar þarna. Síðasta bókun Flokks fólksins var í janúar á þessu ári til að ítreka þetta mál. Segir í henni að Flokkur fólksins hafi margsinnis talað um og bókað um hversu hættulegt þetta svæði er gangandi vegfarendum og fagnar þess vegna tímabundinni göngu- og hjólabrú yfir Sæbraut. Sífellt er talað um “tímabundna” brú en þarna þarf auðvitað að tala um varanlega lausn og snjallstýrð gangbrautarljós. Flokkur fólksins lagði fram tillögu í júní 2022 um að strax yrði hafist handa við að byggja bráðabirgða göngubrú yfir Sæbraut við gatnamót við Skeiðarvog/Kleppsmýrarveg. Vogabyggð er orðin fjölmenn byggð. En í dag bólar ennþá ekkert á þessari framkvæmd. Íbúar Vogabyggðar hafa þurft að takast á við ótta um öryggi barna sinna allt of lengi og gangandi vegfarendur eru í stöðugri hættu.
Fulltrúi Flokks fólksins leggur til að teknar verða saman upplýsingar um bílastæðahús og bílastæðakjallara í Reykjavík, hver þeirra eru rekið af borginni og hver eru einkarekin.
Einnig er lagt til að Bílastæðasjóður taki aftur upp að leggja sektarmiða undir rúðuþurrku í stað þess að senda rukkun beint í heimabanka, sem fer framhjá mörgum en með þessu fyrirkomulagi eru miklar líkur á því að sektin hafi hækkað þegar fólk áttar sig á að hafa fengið hana.
Greinargerð
Hér er um algeran frumskóg að ræða og er upplýsingaóreiða mikil. Það koma skýrt í ljós á Menningardag en þá taldi fólk vera frítt í stæði í Reykjavík. Í ljós kom að þeir sem ólánuðust við að leggja í “einkastæði” eins og Guðrúnartúni fengu háa reikninga eftir daginn. Reikningar koma þá samstundis einn á einkabanka viðkomandi. Þeir sem aka á P merktum bílum og leggja í P merkt stæði þurfa að greiða í þessi stæði (einkarekin) sem hlýtur að stríða gegn lögum.
Það vantar alla umgjörð um rekstur bílastæða og menn virðast fá að hafa sína hentisemi á sektargreiðslum. Borgin hætti að rukka P-korthafa, sem hafa rétt til þess að leggja án greiðslu í P-stæði og gjaldskyld almenn bílastæði skv. umferðarlögum og er staðfest af ráðherra (sjá: 2164/154 svar: gjaldheimta af handhöfum stæðiskorta fyrir hreyfihamlaða | Þingtíðindi | Alþingi (alþingi.is)), að því tilskyldu að þeir láti vita af sér fyrirfram (sem er líka gagnrýnivert fyrirkomulag), en einkaaðilar neita að láta af rukkunum. Það vantar stórlega yfirsýn yfir hvaða stæði og hús eru rekin af borginni og hver af einkaaðilum og þá hverjum. Þess utan er álagning sennilega frjáls og er hægt að okra eins og enginn sé morgundagurinn.
Fyrirspurn um fækkun bílastæða fyrir fatlað fólk.
Fulltrúi Flokks fólksins vill leggja fram eftirfarandi fyrirspurnir:
Hver er ástæða þess að stæðum fyrir fatlaða hefur fækkað svo mjög í miðborginni?
Er hugsunin sú að halda þessu áfram og loka alveg á fatlaða?
Eða er þetta tímabundið og við munum sjá fjölgun aftur?
Fulltrúi Flokks fólksins óskar eftir að úttekt verði gerð á hver fækkunin hefur verið og hvaða áform eru um áframhaldandi fækkun almennra og P-merktra stæða?
Greinargerð
Fatlað fólk er líka fólk og þau langar að komast um borginna án stórfelldra vandræða. Stæðum hefur fækkað tilfinnanlega og stæðiskorthafar finna mikið fyrir því. Það er eitt að búa til hvata fyrir ófatlað fólk að nota aðra samgöngu möguleika en hreyfihamlað fólk þarf á einkabílnum að halda og það þarf að geta gengið að bílastæðum vísum. Fatlað fólk hefur ekki mætt miklum skilningi hjá borginni þegar þeir hafa mótmælt þessari þróun. Það er mikil þörf á að stæðiskorthafar geti tengst stafrænu korti þar sem P-stæði í borgarlandinu eru merkt inn, svipað og rafbílaeigendur geta tengst til að sjá næstu hleðslustöðvar.