Bókun Flokks fólksins undir liðnum: Lagt fram bréf umhverfis- og skipulagssviðs, dags. 12. september 2024, sbr. samþykkt umhverfis- og skipulagsráðs frá 11. september 2024 á auglýsingu á tillögu um breytingu á deiliskipulagi Kvosarinnar vegna lóðarinnar nr. 15 við Tryggvagötu, ásamt fylgiskjölum.
Fulltrúi Flokks fólksins myndi vilja ræða um kostnaðartölur á þessu stigi. Vinningstillagan er mjög kostnaðarsöm og kannski varla verjandi. Grófarhús er skemmtileg hugmynd vissulega en sannarlega ekkert brýnt verkefni. Útfærsla hússins er úr takti við ákveðinn raunveruleika. Umbylta á húsinu, breyta útliti á veggflötum hússins til að líkjast upprunalegu útliti. Rífa á niður hæðir innanhúss til að opna milli hæða, breyta þakformi með tveimur glerjuðum þakhæðum í stað núverandi þakhæðar og hækka á hæðarkóta þaks sem nemur um hálfum metra. Til dæmis eru framkvæmdir á borð við að gera framtíðartengingu við starfsemi Listasafns Reykjavíkur við Tryggvagötu 17 með að hámarki tveimur göngubrúm. Það er eins og „við“ kunnum okkur ekkert hóf, séum sífellt að reyna að „toppa“ sem er auðvitað fáránlegt í ljósi ástandsins hér í húsnæðismálum og vaxandi ójafnaðar og fátæktar. Borgin þarf að geta stillt málum í hóf og hugsað meira á grunni hagsýni og skynsemi.
Bókun Flokks fólksins undir liðnum: Lagt fram bréf umhverfis- og skipulagssviðs, dags. 12. september 2024, sbr. samþykkt umhverfis- og skipulagsráðs frá 11. september 2024 á breytingu á deiliskipulagi Hlíðarenda vegna reits I við Haukahlíð, lóðar nr. 6.
Málið snýst um fjölgun íbúða frá fyrri áætlun úr 70 í 86. Þessu er mótmælt af mörgum sem þegar eru á svæðinu. Uppbygging með 85 íbúðum og 54 bílastæðum innan lóðar mætir tæplega kröfum um fjölda bílastæða fyrir íbúa en kannski svo lengi sem gert er ráð fyrir að gestastæði séu leyst í borgarlandi. Er ætlast til að gengið sé á önnur stæði í borgarlandinu? Hér er óneitanlega þrengt að þeim sem fyrir eru. Í þessu tilfelli virðist skorta að samráð sé nægilegt. Einnig er sagt að væntanlegir íbúar geti notast við deilibílakerfi. Það er hins vegar óþekkt hvernig það muni reynast. Um deilibílakerfi má segja að það sé enn á tilraunastigi.
Bókun Flokks fólksins undir liðnum: Lagt fram bréf borgarstjóra, dags. 16. september 2024, þar sem erindisbréf starfshóps um endurskoðun á skipulagi Menningarnætur og Reykjavíkurmaraþons er lagt fram til kynningar:
Full ástæða er til að endurskoða skipulagningu beggja viðburða í ljósi þeirra alvarlegu ofbeldistilvika sem átt hafa sér stað á Menningarnótt síðustu ár, nú síðast hnífaárásar sem leiddi til dauða ungrar stúlku. Það er mat margra án efa að Menningarnótt sé komin úr böndunum og er sannarlega komin langt frá því sem hún var hugsuð í upphafi sem var fyrst og síðast að vera fjölskylduhátíð. Þegar líða tekur á kvöldið á Menningarnótt er fátt sem minnir á fjölskylduhátíð. Eins og fulltrúi Flokks fólksins sagði í ræðu sinni í borgarstjórn í umræðu um ofbeldistilvik á Menningarnótt er kominn tími til að breyta skipulagi Menningarnætur. Fulltrúi Flokks fólksins nefndi í ræðu sinni að stytta þurfi dagskrá t.d. þannig að henni yrði lokið kl. 22 og þá verði hafist handa við að rýma bæinn. Það þýðir eðli málsins samkvæmt að engin verði flugeldasýningin. Flugeldasýning er þess utan umdeilt fyrirbæri þar sem mengun hlýst af slíkri sýningu. Það þykir því einhverjum ekki mikill missir af henni. Öryggi borgaranna þarf að vera í fyrirrúmi og áhersla á fyrirbyggjandi aðgerðir en ekki einungis að slökkva elda þegar skaðinn er skeður.
Bókun Flokks fólksins undir liðnum: Lagt fram bréf skóla- og frístundasviðs, dags. 10. september 2024, sbr. samþykkt skóla- og frístundaráðs frá 9. september 2024 á breytingum á reglum um leikskólaþjónustu:
Fulltrúa Flokks fólksins finnst sem hér sé verið að herða ýmis ákvæði. Eitt er hér dregið fram sem er býsna bratt: „Hafi leikskóla verið úthlutað án þess að lögheimili barnsins hafi verið flutt til Reykjavíkur verður lögheimilið að vera komið til Reykjavíkur eigi síðar en 7 dögum áður en leikskóladvöl hefst. Réttur til leikskólans fellur niður á fyrirhuguðum upphafsdegi vistunar og öðru barni boðið plássið ef skilyrðum er ekki fullnægt“. Þetta má teljast nokkuð knappt og er því velt upp hvort ekki sé einhver sveigjanleiki ef þetta næst ekki. Um breytingar á reglum um forgang vill fulltrúi Flokks fólksins hafa sérstakan forgang fyrir einstætt foreldri með fullt forræði þar sem hinu foreldrinu nýtur ekki við né nýti það fæðingarorlofsrétt sinn. Í þessum tilfellum þarf einstæða foreldrið að fara út á vinnumarkaðinn þremur mánuðum fyrr en ella, þ.e. þegar barnið er 6 mánaða. Ef forsjárlaust foreldri tekur ekki fæðingarorlof situr forsjárforeldrið ekki við sama borð og foreldrar sem deila með sér fæðingarorlofi. Annað sem er ósanngjarnt er að foreldrar sem neyðast til að fara með barn sitt á einkarekinn leikskóla þar sem ekki er pláss í borgarreknum skóla eigi að greiða sama gjald og það gerði ef barnið væri í borgarreknum leikskóla.
Lagst er jafnframt gegn þeirri breytingu að foreldrar þurfi nú sérstaklega að skrá börn sín til leikskóladvalar milli jóla og nýárs, í dymbilviku og alla virka daga öðru hvoru eða báðum megin við vetrarleyfi grunnskóla. Hafi börnin ekki verið skráð með ríflegum fyrirvara megi þau ekki mæta til leikskóla þessa daga. Nú þegar reynist íþyngjandi fyrir vinnandi foreldra að bregðast við lögbundnum frídögum, starfsdögum leik- og grunnskóla og sumarleyfum, enda frídagar barna töluvert fleiri en frídagar vinnandi fólks. Mikilvægt er að vinna betur með fjölskyldum í borginni að einfaldari hversdegi.
Bókun Flokks fólksins undir liðnum: Lögð fram að nýju fyrirspurn áheyrnarfulltrúa Flokks fólksins um styttingu vinnuvikunnar, sbr. 27. lið fundargerðar borgarráðs frá 28. september 2023. Einnig lagt fram svar mannauðs- og starfsumhverfissviðs, dags. 13. september 2024. MSS23090177
Það er fulltrúa Flokks fólksins vel minnisstætt að skilyrði fyrir að fara í verkefnið „stytting vinnuvikunnar“ var að það mátti ekki kosta krónu. Þetta var auðvitað fráleitt og útilokað eins og kom á daginn. Að stytta vinnuviku starfsmanna er aldrei ókeypis, ekki nema ætlast sé til að einhver annar bæti á sig aukaálagi eða að þjónusta verði skert. Ef horft er til leikskólanna og frístundaheimila þá gleymdist að reikna með að þar er rótgróinn mannekluvandi og ef dæmið átti að ganga upp varð í raun að yfirmanna. Allir vilja auðvitað stytta vinnuvikuna en með þennan drösul að draga að styttingin mætti ekkert kosta reyndist hún mörgum erfið og jafnvel ómöguleg. Ábyrgðin var sett í hendur starfsmanna og leit út eins og meirihlutinn fríaði sig ábyrgðinni. Síðan vinnutímastytting tók gildi í leikskólum hefur álag á starfsfólk aukist enn frekar. Vinnutímastyttingin bættist þá ofan á þá manneklu og langtímaveikindi sem lengi hafa hrjáð starfsemi leikskólanna. Í svari kemur fram að kostnaðarauki við verkefnið var síðan þegar upp var staðið rúmlega 6% en ólíkur eftir starfsemi og vaktafyrirkomulagi.
Bókun Flokks fólksins undir liðnum: Lögð fram að nýju fyrirspurn áheyrnarfulltrúa Flokks fólksins um fundi aðgengisfulltrúa, sbr. 43. lið fundargerðar borgarráðs frá 2. maí 2024. Einnig lagt fram svar mannréttinda- og lýðræðisskrifstofu, dags. 16. september 2024:
Flokkur fólksins óskaði eftir upplýsingum um hvort haldinn hafi verið fundur með aðgengisfulltrúa vegna aðgengis blindra og sjónskerta að nýju snertilausu skápakerfi í sundlaugum og hverjar niðurstöður þess fundar voru, hafi hann átt sér stað. Fram kemur að aðgengisfulltrúi hefur verið í samskiptum við menningar- og íþróttasvið Reykjavíkur og forstöðumenn allra sundlauga um ýmis aðgengismál í sundlaugum borgarinnar. Málið er því ljóslega í skoðun og hugmyndir að lausnum í farvatninu. Fulltrúa Flokks fólksins finnst mikilvægt að nota einfaldar lausnir og varla er hægt að hafa það einfaldara en að útbúa sérstakar leiðbeiningar vegna notkunar á læsingum fataskápa sem er á hendi menningar- og íþróttasviðs. Einnig er hægt að kaupa armband til eignar sem læsir/aflæsir skápum sem viðkomandi kýs að nota í búningsklefanum. Ástæða þess að fyrirspurnin var lögð fram í upphafi var forvitni fulltrúa Flokks fólksins um hvað kom út úr fundi með aðgengisfulltrúa um málið en til stóð að funda í apríl síðastliðnum.
Bókun Flokks fólksins undir liðnum: Lögð fram fundargerð fjölmenningarráðs frá 10. september 2024. Áheyrnarfulltrúi Flokks fólksins leggur fram svohljóðandi bókun undir 6. lið fundargerðarinnar:
Lögð fram skýrsla OECD, Efnahags- og framfarastofnunar, Skills and Labour Market Integration of Immigrants and their Children in Iceland 2024. Flokkur fólksins telur að skýrsla OECD um stöðu innflytjenda á Íslandi sé mjög mikilvæg og gefur skýrslan greinargóða lýsingu á stöðu mála í þessum málaflokki. Það sem var hvað mest sláandi í skýrslunni var að hlutfall þeirra sem segjast hafa góða kunnáttu í tungumálinu er lægst hér á landi á meðal svarenda í OECD-ríkjum eða 18% samanborið við 60% að meðaltali innan Evrópska efnahagssvæðisins. Það er einnig bent á að námsárangur barna sem fædd eru á Íslandi en eiga foreldra með erlendan bakgrunn sé áhyggjuefni. Meira en helmingi þessara barna gangi illa í PISA-könnuninni sem þýðir að þau eiga erfitt með verkefni á borð við að skilja og túlka einfalda texta. Það er augljóst að við sem samfélag þurfum að gera betur í þessum málaflokki. Flokkur fólksin telur að það þurfi þjóðarátak í þessum málaflokki. Ábyrgðin er okkar. Hvernig mætum við innflytjendum sem ekki tala íslensku og hvernig hvatningu sendum við til þeirra um að það sé mikilvægt að læra íslensku og síðast en ekki síst hvernig leiðbeinum við þeim í þeirri vegferð? Við verðum að senda skýr skilaboð til innflytjenda um að íslenskan sé lykillinn að samfélaginu.
Bókun Flokks fólksins undir liðnum: Lögð fram fundargerð íbúaráðs Breiðholts frá 11. september 2024. Áheyrnarfulltrúi Flokks fólksins leggur fram svohljóðandi bókun undir 1. lið fundargerðarinnar:
Því er fagnað að verið sé að kynna og ræða viðbrögð og fyrirbyggjandi aðgerðir vegna ofbeldis. Gott væri að fá lista yfir hvaða viðbrögð þetta eru og hvaða fyrirbyggjandi aðgerðir eru í gangi hverju sinni. Umfram allt skiptir máli að byrgja brunninn áður en barnið dettur í hann. Mest um vert er að fagfólk/sérfræðingar skólaþjónustu grípi strax inn þegar vandi sýnir sig eða þegar grunur leikur á erfiðleikum. Hvað varðar stefnumótandi áherslur er verkefnið að styrkja fjölskyldur. Mörg nýleg alvarleg dæmi sem og þróun síðustu missera á auknum vopnaburði ungmenna kallar á alveg sérstaka endurskoðun á aðstoð velferðar- og skólayfirvalda til foreldra. Hlusta þarf á börn og foreldra þeirra og svara ákalli þeirra um aðstoð strax en ekki eftir nokkra mánuði. Fræðsla er grunnþáttur, t.d. fræðsla í uppeldistækni. Fræðsla sem miðast að því að styðja foreldra í foreldrahlutverkinu og fræðsla um hvernig foreldrar geta stutt börn sín í daglegu lífi. Fræðsla um mikilvægi tengslamyndunar foreldra og barna er mikilvæg nú á dögum tölvu, síma og samfélagsmiðla. Samvinna og samstillt átak er gulls ígíldi og það þarf að efla.
Bókun Flokks fólksins undir liðnum: Lögð fram fundargerð íbúaráðs Kjalarness frá 12. september 2024. Áheyrnarfulltrúi Flokks fólksins leggur fram svohljóðandi bókun undir 17. lið fundargerðarinnar:
Það er í raun átakanlegt að sjá alla þá vinnu sem búið er að leggja í þetta mál svo ekki sé talað um kostnað. Tugir athugasemda hafa borist frá íbúum sem hafa mótmælt hástöfum. Að búa næst skotsvæði er martröð. Truflun er af völdum hávaða og mengunarhætta og hávaði oft yfir hávaðamörkum sama hvað hver segir. Engin klár tímamörk eru í skipulagstillögunni og svæðið gæti þess vegna vera komið til að vera næstu hundrað árin. Þegar vel viðrar og skotæfingar eru í gangi er ekki hægt að vera utandyra. Í glænýrri athugasemd kemur fram að opnunartímar séu ekki virtir og reglur um blýskot ekki heldur. Er ekki verið að níðast gróflega á mönnum, dýrum og lífríki? Það er óskiljanlegt af hverju ekki er hægt að finna þessu sporti viðeigandi svæði fjarri lífi. Hvaða sérhagsmunir réttlæta allar þessar kostnaðarsömu aðgerðir? Íbúar upp til hópa hafna breytingu á Aðalskipulagi 2040. Íbúar reyna að selja eignir sínar og flýja, allt vegna tilkomu skotsvæðanna. Lesa má áhyggjur úr umsögnum Náttúrufræðistofnunar, Skipulagsstofnunar og Heilbrigðiseftirlits Reykjavíkur. Fulltrúi Flokks fólksins er eiginlega miður sín eftir yfirferð athugasemda. Ekki er annað hægt en að fyllast sorg yfir þessu máli. Hvað þarf eiginlega til, til að fá hlustun og skilning í þessu máli?
Bókun Flokks fólksins undir liðnum: Lögð fram fundargerð íbúaráðs Laugardals frá 9. september 2024:
Áheyrnarfulltrúi Flokks fólksins leggur fram svohljóðandi bókun undir 5. lið fundargerðarinnar:
Flokkur fólksins vill vekja athygli á samþykkt íbúaráðs Laugardals um umferðaröryggi við Dalbraut og Sæbraut. Kallað er eftir að umhverfis- og skipulagsráð bæti umferðaröryggi bíla með beygjuljósi þegar keyrt er upp Dalbraut að Sundagörðum og beygt til vinstri inn á Sæbraut. Þarna hefur fólk oft komist í hann krappan þegar stór ökutæki byrgja ökumönnum sýn á umferð úr gagnstæðri átt. Ökumenn sem keyra frá Sundagörðum til suðurs yfir gatnamótin og inn á Dalbraut hindra sýn á aðra sem koma samsíða og eru á leið beint yfir, stundum á töluverðum hraða sem gerir fyrrgreinda vinstri beygju hættulega eins og segir í samþykktinni.
Ný mál
Áheyrnarfulltrúi Flokks fólksins leggur fram svohljóðandi fyrirspurn um stöðu hljóðvistar á vinnustöðum borgarinnar:
Fulltrúi Flokks fólksins óskar upplýsinga um stöðu hljóðvistar á vinnustöðum Reykjavíkurborgar. Hvernig er eftirliti háttað, hversu oft eru þessi mál skoðuð og hvernig? Hvernig er dregið úr hávaða á hávaðasömum vinnustöðum eins og í skrifstofurýmum og skólum? Hefur verið gerð úttekt á hljóðvist eftir að opin rými komu til sögunnar? MSS24090104
Greinargerð
Hljóðvist á vinnustað skiptir miklu máli ef tryggja á vellíðan starfsmanna á vinnustaðnum. Mikilvægi þess fer stöðugt vaxandi með auknum kröfum nútímans um opin vinnusvæði. Tempraður hljómur og hljóðeinangrun fær aðra merkingu í rými þar sem starfa tugir manna. Á háværum vinnustöðum er mikilvægt að atvinnurekendur vinni markvisst að því að draga úr hávaða og skapa eins mikið næði fyrir starfsmenn og mögulegt er. Í slíkum tilvikum skal fylgja ákvæðum reglugerðar nr. 912/2006 um varnir gegn álagi vegna hávaða á vinnustöðum. Fari jafngildishávaði yfir 80 dB(A) fyrir 8 tíma vinnudag er það á ábyrgð vinnuveitanda að útvega vandaðar heyrnarhlífar fyrir starfsmenn og sjá til þess að þær séu notaðar. Heyrnin er í húfi. Í grunn- og leikskólum þarf hljóðeinangrun á milli kennslustofa að vera fullnægjandi. Matsalir skóla og reyndar vinnustaða líka eru víða of hljómmiklir. Þar hittast nemendur og starfsfólk mögulega í eina skiptið yfir daginn og óhindruð tjáskipti, þar sem margir tala í einu, því mikilvæg. Hljóðhönnun matsala þarf að tryggja þessi lífsgæði. Hér er aðeins nefnt brot af vinnustöðum sem Reykjavík þarf að huga hvað varðar hljóðvist en borgin er stærsti vinnustaður borgarinnar.
Áheyrnarfulltrúi Flokks fólksins leggur fram svohljóðandi fyrirspurn um samnýtingu skólalausna:
Vísað er til 4. liðar í fundargerð stafræns ráðs frá 11. september um fundargerð verkefnaráðs frá 18. apríl 2024 um samnýtingu skólalausna. Fulltrúi Flokks fólksins óskar upplýsinga um hvernig standi á því að Reykjavíkurborg sé að eyða bæði tíma og fjármagni í að þróa sérlausnir eins og Bjargey til innritunar í grunnskóla án þess að hafa talað við ríkið og önnur sveitarfélög með það að markmiði að vinna saman að innleiðingu slíks kerfis fyrir alla grunnskóla landsins. MSS24090105
Greinargerð
Fulltrúi Flokks fólksins hefur ítrekað undanfarin ár bent á að þjónustu og nýsköpunarsvið á að leita samstarfs við aðra opinbera aðila strax í stað þess að vera sífellt að eyða tíma og fjármagni í að þróa sínar eigin sérlausnir. Dæmi um það er Bjargey innritunarkerfið fyrir grunnskóla. Í upphafi átti verkefnið að snúast um uppbyggingu á sameiginlegum nemendagrunni og samnýtingu sveitarfélaga á Höfuðborgarsvæðinu á skólalausnum Reykjavíkurborgar. Nú hefur Miðstöð menntunar og skólaþjónustu (MMS) hafið vinnu við landlægan nemendagrunn og innritunarferli. Þess vegna virðist þetta einkaframtak Reykjavíkurborgar vera að detta um sjálft sig vegna einmitt skorts á heildarsýn hvað varðar stafræna umbreytingu og þróun. Stafræn framtíð hins opinbera á Íslandi og annarsstaðar byggir á samvinnu en ekki sundrungu varðandi opinberar stafrænar lausnir handa öllum íbúum.
Vísað til meðferðar stafræns ráðs.
Áheyrnarfulltrúi Flokks fólksins leggur fram svohljóðandi fyrirspurn um af hverju ekki sé búið að innleiða greiðslugátt:
Fulltrúi Flokks fólksins óskar eftir að fá upplýsingar um hvers vegna ekki er búið að innleiða greiðslugátt og koma öllum plastkortum Reykjavíkurborgar rafrænt í síma. MSS24090106
Greinargerð
Flokkur fólksins hefur áður gagnrýnt þennan seinagang á innleiðingu rafrænna lausna í stað plastkorta sem eru enn í notkun hjá Reykjavíkurborg. Þetta verkefni hefur verið fjármagnað. Það er ekki heldur búið að innleiða rafræna greiðslugátt á síðum borgarinnar. Ekki er vitað betur en að slíkar greiðslugáttir séu nú þegar komnar í notkun hjá opinberum aðilum. Garðabær er sem dæmi löngu kominn með sundkort í síma.
Vísað til meðferðar stafræns ráðs.
Áheyrnarfulltrúi Flokks fólksins leggur fram svohljóðandi fyrirspurn um workplace:
Fulltrúi Flokks fólksins óskar eftir því að fá að vita af hverju þjónustu- og nýsköpunarsvið, eða forveri þess, skrifstofa þjónustu og reksturs, hafi ákveðið að innleiða Workplace frá Facebook sem samskiptamiðil í stað þess að nýta sér Yammer (Viva Engage í dag) sem borgin var þá þegar að greiða leyfi fyrir. Einnig er óskað upplýsinga um hvort vistun persónugagna Workplace utan Evrópusambandsins hafi verið brot á persónuverndarlögum. MSS24090107
Greinargerð
Á borgarstjórnarfundi þann 9. apríl 2024 gagnrýndi varaborgarfulltrúi Flokks fólksins það að þjónustu og nýsköpunarsvið væri að greiða háar fjárhæðir á hverju ári fyrir notkun á Workplace frá Facebook sem samskiptamiðils fyrir starfsfólk Reykjavíkurborgar. Einnig benti varaborgarfulltrúinn á þá staðreynd að öll þau ár sem þjónustu og nýsköpunarsvið hefur verið að greiða fyrir notkun á Workplace hafi það einnig verið að greiða miklar upphæðir í leyfisgjöld vegna Microsoft hugbúnaðar og inn í þeim leyfisgjöldum væri gjald fyrir samskiptamiðilinn Yammer (nú Viva Engage) frá Microsoft sem aldrei var notaður.
Fulltrúar meirihlutans vörðu þessi kaup á Workplace en stuttu eftir umræddan borgarstjórnarfund kom í ljós að Facebook ætlaði að leggja alfarið niður samskiptamiðilinn Workplace. Nú er þjónustu og nýsköpunarsvið því komið á byrjunarreit aftur eftir að hafa eytt tugum milljóna undanfarin ár í leyfisgjöld vegna Workplace – og er að því er virðist að fara að innleiða Viva Engage. Þarna er einn eitt dæmið um ranga ákvörðun sviðsins (eða forvera sviðsins Skrifstofu þjónustu og reksturs) – sem hefur kostað borgarbúa háar fjárhæðir.
Vísað til meðferðar stafræns ráðs.