Borgarráð 25. janúar 2024 - Kolbrún Baldursdóttir

Bókun Flokks fólksins undir liðnum: Lagt fram bréf umhverfis- og skipulagssviðs, dags. 11. janúar 2024, sbr. samþykkt umhverfis- og skipulagsráðs frá 10. janúar 2024 á tillögu að breytingu á hverfisskipulagi, Breiðholts, hverfi 6.2 Seljahverfi, vegna lóðarinnar nr. 17 við Öldusel, Ölduselsskóli:

Fulltrúi Flokks fólksins vill ítreka mikilvægi þess að vinna með fólkinu i borginni og að þessu sinni íbúum Seljahverfis. Eins og fram kemur í gögnum þykir mörgum að verið sé að ganga á græn svæði í hjarta Seljahverfis og heppilegra hefði verið að velja annan stað fyrir ævintýraborgina. Flokkur fólksins sér að hér er um mikilvægt útivistarsvæði íbúa að ræða og er hluti af Seljadalnum. Á svæðinu eru leiktæki, m.a. aparóla sem er mikið notuð og einnig er svæðið hluti af frisbígolfvelli sem er mjög vinsæll. Allmargar athugasemdir snúa einmitt um þetta atriði. Fulltrúi Flokks fólksins vill þakka fulltrúa foreldrafélagsins í íbúaráði Breiðholts fyrir ábendingar um málefnið. Það skiptir miklu máli að íbúar tjái sig og auðvitað að meirihlutinn hlusti og taki til greina ábendingar fólksins eins og mögulegt er. Oftast ætti að vera hægt að finna lendingu á máli sem langflestir geta sætt sig við.

Bókun Flokks fólksins undir liðnum: Lagt fram bréf umhverfis- og skipulagssviðs, dags. 17. janúar 2024, sbr. samþykkt umhverfis- og skipulagsráðs frá 17. janúar 2024 á tillögu að breytingu á deiliskipulagi Skúlagötusvæðis fyrir tímabundna skiptistöð Strætó:

Skipulagsyfirvöld leggja til tímabundna endastöð Strætó við Skúlagötu vegna flutnings frá Hlemmi. Legið hefur fyrir að finna þurfi nýjan stað fyrir endastöð strætisvagna í staðinn fyrir núverandi endastöð og skiptistöð við Hlemm. Fyrirliggjandi staðsetning við Skúlagötu er ekki ákjósanleg og mun hafa ónæði í för með sér fyrir nærliggjandi íbúa. Óheppilegt er að mikil óvissa ríki um hversu lengi umrædd endastöð muni vera við Skúlagötu þrátt fyrir að einungis sé um staðsetningu til bráðabirgða að ræða. Fjöldi athugasemda hefur borist, einna helst er bent á óæskilega staðsetningu fyrir strætóstöð í íbúðahverfi og nálægð við svefnherbergi íbúa. Mikil umferð strætisvagna með hljóð og loftmengun hlýtur að teljast ógn við heilsu og friðhelgi íbúa. Bílastæðið sé einnig fullnýtt alla daga. Æskilegra væri að finna annan stað fjær íbúðabyggð, til dæmis vestasta hluta Miðbakkans. Flokkur fólksins tekur undir þetta. Mótvægisaðgerðir mega sín lítils því erfitt er t.d. að koma upp frekari hljóðvörnum umfram þær sem eru í dag án þess að ganga á útsýni íbúa til norðurs. Fulltrúa Flokks fólksins finnst ekki duga að hafa samráð aðeins með því að auglýsa tillöguna heldur væri nær að hafa íbúafund og hlusta á það sem fólkið segir.

Bókun Flokks fólksins undir liðnum: Lagt fram bréf umhverfis- og skipulagssviðs, dags. 24. janúar 2024, sbr. samþykkt umhverfis- og skipulagsráðs frá 24. janúar 2024 um framlengingu tímabundinna heimilda til að víkja frá reglum um íbúakort:

Flokkur fólksins tekur heilshugar undir tillögu um framlengingu á heimildum um frávik á reglum um íbúakort til handa Grindvíkingum. Frá því að tillagan var samþykkt í nóvember á síðasta ári hafa verið gefin út 30 íbúakort til 23 heimila Grindvíkinga með tímabundna búsetu innan íbúakortasvæða í 20 íbúðum. Það er því augljós þörf fyrir þessi íbúakort fyrir Grindvíkinga. Framlengingin á að gilda til 30. apríl 2024. Fulltrúi Flokks fólksins hefði viljað sjá þessa framlengingu ná fram á mitt sumar í ljósi nýjustu viðburða í Grindavík.

Bókun Flokks fólksins undir liðnum: Lagt fram bréf umhverfis- og skipulagssviðs, dags. 17. janúar 2024, sbr. samþykkt umhverfis- og skipulagsráðs frá 17. janúar 2024 á auglýsingu á tillögu að breytingu á aðalskipulagi 2040 fyrir skotæfingasvæði á Álfsnesi:

Þær breytingar sem hér eru lagðar til, að skapa skilyrði fyrir skotæfingar, bera merki um hversu kappsamur meirihlutinn er að þjóna þessum hópi fólks sem vill skjóta. Aðstaða á svæðinu hefur verið byggð upp og kostuð af Reykjavíkurborg. Miklu hefur verið til kostað vegna landmótunar og annarra mannvirkja til að réttlæta frekar að svæðið verði notað fyrir skotæfingar. Flokkur fólksins harmar að hunsa eigi alfarið áralanga baráttu íbúanna við að losna við skotæfingasvæði svo hlífa megi fólki og dýrum við mengun. Eftir því er tekið að hvergi í gögnum er minnst á viðurlög ef reglur eru brotnar. Umræða um að þetta sé þjóðarleikvöllur í skotfimi ætti að leiða til þess að fleiri en borgin greiði fyrir allar þessar breytingar. Hvernig getur skotæfingasvæði verið þjóðarleikvöllur þegar stór hópur er e.t.v. alfarið á móti þessu sporti? Þótt blýhögl séu bönnuð hafa þau fundist í fuglum sem ekki gera greinarmun á blýhöglum og sandkornum sem þeir éta til að auðvelda meltinguna. Ætlast er til að Reykjavíkurborg beri kostnað af rannsóknum á menguninni. Með öllu þessu tilstandi má ætla að þessi skotvöllur verði þarna um aldur og ævi.

Bókun Flokks fólksins undir liðnum: Fram fer kynning á ákvæðum aðalskipulags um skammtímagistingu:

Borginni er skipt upp í 3 svæði. Rauð svæði eru t.d. Stjórnarráðsreitur og Hlemmur og þar eru engar takmarkanir á gististöðum. Svæðið í kringum Hlemm er reyndar líka íbúðahverfi. Rauða svæðið við Skúlagötuna er nokkuð stórt og vill fulltrúi Flokks fólksins minnka það til að setja frekari hömlur á skammtímaleigu eða nota deiliskipulagsbreytingu til að þrengja að skammtímaleigusvæðum. Í einni mestu húsnæðiskreppu Íslandssögunnar eru sjö prósent íbúða borgarinnar með virka skráningu á Airbnb, eða 3.800 híbýli. Í helstu ferðamannaborgum Evrópu er hlutfallið að meðaltali tvö prósent. Takmarkanir á skammtímaleigu eru mikilvægar til að verja leigjendur, viðhalda hverfismenningu og sporna við of miklum ágangi ferðamanna. Skammtímaleigumarkaðurinn er farinn að auka þrýsting á fasteigna- og langtímaleigumarkaðinn með því að draga til sín íbúðir sem annars væru notaðar undir íbúðarhúsnæði. Fram kemur í gögnum að það sé mikilvægt að vakta og hafa eftirlit með þáttum sem geta leitt til skerðingar á framboði íbúðarhúsnæðis til búsetu og langtímadvalar. Ekki er verið að vakta rauð svæði sem eru reyndar mest atvinnusvæði en þó ekki eingöngu, sbr. Hlemmsvæðið. Önnur vöktun er í gegnum lögheimilisskráningu. Gera þarf á þessu úttekt til að fylgjast með að ekki sé verið að ryðja burt íbúðarhúsnæði fyrir húsnæði fyrir skammtímaleigu.

Bókun Flokks fólksins undir liðnum: Lagt fram bréf borgarstjóra, dags. 23. janúar 2024, þar sem drög að erindisbréfi samningateymis vegna skila á Elliðaárdal eru lögð fram til kynningar:

Þeir sem vilja stífluna burt rökstyðja mál sitt þannig að öðruvísi verði Elliðaárdalurinn ekki færður í fyrra form. Einnig er þetta spurning um hið „sjónræna“. Dalurinn verður þá ekki lengur tvískiptur. Lífríkisrannsóknir 2021-2023 sýna afgerandi jákvæða útkomu fyrir lífríkið eins og segir í kynningu um málið. „Rannsóknarniðurstöður 2022 vitna um mikla velgengni laxins í Árbæjarkvísl í kjölfar þess að sá einkennisfiskur Elliðaánna endurheimti gönguleið sína þar sem hrygningar- og uppeldissvæði, í kjölfar þess að vatnsmiðlun fyrir tilstilli manngerðs Árbæjarlóns var aflögð.“ Vistfræðilegt ástand Elliðavatns telst vera mjög gott. Það er afstaða fulltrúa Flokks fólksins að varðveita náttúru eins og hægt er. Því miður hefur verið gengið freklega á græn svæði, fjörur og aðra náttúru í borgarlandinu. Nú þegar er Elliðaárdalurinn heilmikið mótaður af mönnum og náttúran hefur vikið. Skoðun fulltrúa Fulltrúa Flokks fólksins er að náttúran eigi að njóta vafans og unnið verði að því að Elliðaárnar renni eins og áður en þær voru virkjaðar.

Bókun Flokks fólksins undir liðnum: Lagt fram bréf þjónustu- og nýsköpunarsviðs, dags. 8. janúar 2024, þar sem óskað er eftir að borgarráð heimili þjónustu- og nýsköpunarsviði að hefja greiningarverkefni í tengslum við rafrænar beiðnir:

Þjónustu- og nýsköpunarsvið kallar eftir fjármagni til að útrýma beiðnabókum og að þær verði rafrænar fyrir tilfallandi innkaup starfsfólks Reykjavíkurborgar. Þetta er að sjálfsögðu mikilvægt. Flokkur fólksins undrast hins vegar að þessi beiðni sé núna fyrst að koma fram. Svona lausn hefði átt að vera með þeim fyrstu en er hér spurning um gagnsæi og skilvirkni og koma í veg fyrir misnotkun, svo eitthvað sé nefnt. Flokkur fólksins vill því enn og aftur ítreka að forgangsröðun verkefna innan þjónustu- og nýsköpunarsviðs er algjörlega í lamasessi. Einnig er vert að benda á að hér er um að ræða fjármagn í greiningarvinnu en ekki til kaupa á tilbúnu kerfi. Það er þess vegna ekki útséð með hvenær endanlegur árangur næst af þessu verkefni og rafrænar innkaupabeiðnir muni líta dagsins ljós hjá Reykjavíkurborg.

Bókun Flokks fólksins undir liðnum: Lagt fram bréf þjónustu- og nýsköpunarsviðs, dags. 17. janúar 2024, þar sem óskað er eftir að borgarráð heimili þjónustu- og nýsköpunarsviði, í samvinnu við umhverfis- og skipulagssvið, að hefja þróun á Hverfasjá Reykjavíkur og millilagi fyrir auðguð gögn úr landupplýsingakerfi:

Ef horft er til Hverfasjár verkefnisins þá hlýtur slíkt verkefni að eiga að vinnast með öðrum sveitarfélögum. Hvað með þá gömlu sem útbúin var 2019? Er ekki verið að tala um að halda þeirri lausn og vinna áfram á þeim grunni? Sé það ekki þannig óttast fulltrúi Flokks fólksins að þetta verkefni geti sprengt alla mælikvarða í kostnaði. Umfram allt hlýtur þetta að vera samstarfsverkefni með öðrum sveitarfélögum. Er þetta ekki dæmi um að þjónustu- og nýsköpunarsvið sé að óska eftir fjármagni til þess að hanna frá grunni rafræn kerfi sem nú þegar eru líklegast til og í notkun annars staðar? Eins og kemur fram í greinargerð að þá á allt hverfa- og deiliskipulag á Íslandi að vera orðið rafrænt fyrir janúar 2025. Reykjavíkurborg er þess vegna ekki eina sveitarfélagið sem er að fara í þessa vegferð. Þegar litið er til þess mikla fjármagns sem búið er að setja í málaflokkinn síðustu ár þá má furða sig af hverju svona hægt gengur og af hverju svona mikið á eftir að vinna.

Bókun Flokks fólksins undir liðnum: Lagt fram bréf þjónustu- og nýsköpunarsviðs, dags. 19. janúar 2024, þar sem óskað er eftir að borgarráð heimili þjónustu- og nýsköpunarsviði að hefja verkefnið Torgið 2.0:

Fulltrúi Flokks fólksins er sammála því að það sé ótækt að starfsfólk á einum stærsta vinnustað landsins skuli ekki enn hafa aðgang að fræðslukerfi eins og því sem lýst er í greinargerð. Málið er hins vegar það að fulltrúinn minnist þess að það séu nokkur ár síðan kynningar á fræðslukerfi fyrir starfsfólk Reykjavíkurborgar byrjaðu að koma frá þjónustu- og nýsköpunarsviði. Það var alltaf eins og umrætt fræðslukerfi væri nánast á næsta leiti en ekkert virðist hafa heyrst né sést af þessu kerfi fyrr en nú. Samkvæmt greinargerð virðist ekkert fræðslukerfi hafa verið í boði fyrir starfsfólk Reykjavíkurborgar. Aftur má minnast á mikilvægi samstarfs við önnur sveitarfélög. Hér má velta fyrir sér af hverju Reykjavíkurborg sér um að búa til og reka svona upplýsingatorg sjálf. Ýmis fyrirtæki á Íslandi kaupa bara aðgang að sérlausnum sem sjá alfarið um svona lagað.

Eftir því sem Flokkur fólksins kemst næst í þessu máli þá hefðu margir haldið að þetta Bygg 2.0 hefði átt að vera búið fyrir löngu. Af hverju er þetta ekki komið lengra? Þetta eru svona dæmigerðar spurningar um lausnir sem hafa verið að malla mjög lengi þrátt fyrir mikið fjármagn sem farið hefur til sviðsins. Fulltrúi Flokks fólksins hefur upplýsingar um að fyrstu umsóknirnar hafi verið komnar í gegn í þessu verkefni fyrir alllöngu síðan, þannig það ætti ekki að vera of mikil vinna að tengja fleiri umsóknir inn í þetta. Stafræn vegferð er mikilvæg í nútímasamfélagi. Þegar litið er til þess mikla fjármagns sem búið er að setja í málaflokkinn síðustu ár þá má furða sig af hverju svona hægt gengur og af hverju svona mikið á eftir að vinna.

Bókun Flokks fólksins undir liðnum: Lagt fram bréf borgarstjóra, dags. 23. janúar 2024, þar sem drög að erindisbréfi starfshóps um endurskoðun stjórnskipulags eigna- og viðhaldsstjórnunar hjá Reykjavíkurborg eru lögð fram til kynningar:

Hlutverk þessa hóps er helst að endurskoða stjórnskipulag eigna- og viðhaldsstjórnunar hjá Reykjavíkurborg. Nýlega skilaði starfshópur af sér áfangaskýrslu þar sem m.a. var lagt til að slíkur hópur yrði settur í gang í kjölfar úttektarskýrslu innri endurskoðunar en í henni var dregið upp ýmislegt sem laga þarf á þessum vettvangi. Í úttekt innri endurskoðunar kom fram að umsýslu með fasteignir A-hluta borgarinnar sé ábótavant. Mörg dæmi voru nefnd um galla kerfisins sem dæmi að borgarráð/borgarstjórn, sem útdeilir fjármunum til viðhalds, hefur ekki haft fullnægjandi forsendur til að taka upplýstar ákvarðanir um fjármagn til viðhalds. Bent var á í skýrslunni að bæta þurfi skipulagið og endurskoða stjórnskipulag sem styður við skilvirka eigna- og viðhaldsstjórnun hjá Reykjavíkurborg og draga úr hættu á að skipting ábyrgðar milli leigusala og leigutaka leiði til aukins viðhalds og meiri viðhaldskostnaðar. Þessum hópi ber vonandi gæfa til að rýna þessa þætti og gera viðeigandi breytingar því viðhaldi á mörgum byggingum borgarinnar var of lítið sinnt og þau mistök öll mega ekki endurtaka sig.

Bókun Flokks fólksins undir liðnum: Lagt fram bréf menningar- og íþróttasviðs, dags. 5. janúar 2024, sbr. samþykkt menningar-, íþrótta- og tómstundaráðs frá 5. janúar 2024 á samstarfssamningi milli Reykjavíkurborgar og Íþróttabandalags Reykjavíkur:

Nýr samstarfssamningur Reykjavíkurborgar og Íþróttabandalags Reykjavíkur liggur á borðinu. Fulltrúa Flokks fólksins er umhugað um eina reglu sem er í gildi og er um styrki vegna aðstöðu til æfinga og keppni í íþróttamannvirkjum í Reykjavík. Fulltrúi Flokks fólksins hefur ítrekað bent á og lýst áhyggjum yfir aðstöðumun félaga, t.d. í Laugardal. Körfuknattleiksdeild Ármanns hefur ekki boðlega aðstöðu til æfinga nema í Laugardalshöll. Þessi félög eiga engan stað vísan, stað sem þau geta kallað „sinn“. Takmarkað aðgengi að Laugardalshöll kemur að sama skapi niður á blak- og handboltadeildum Þróttar. Ef horft er yfir skólaárið verða börnin í hverfinu af 40-45% af æfingum vegna forgangs sérsambanda og Íþrótta- og sýningarhallarinnar. Þau íþróttahús sem eiga að nýtast í staðinn eru annað hvort allt of lítil eða utan hverfis. Jafnræðis er því engan veginn gætt. Flokkur fólksins óskaði eftir að fá samanburð á fjármögnunarsamningum íþróttahúsa borgarinnar og sérstaklega aðgengi félaga sem nota Laugardalshöllina. Í svari frá 15. nóvember 2023 kemur fram að Íþróttabandalag Reykjavíkur sjái um að úthluta æfingatímum til félaganna í íþróttamannvirkjum borgarinnar og notar til þess einhver „sérstök“ viðmið. Þarna er mismunun í gangi sem taka þarf á í þessum nýja samstarfssamningi.

Bókun Flokks fólksins undir liðnum: Lögð fram að nýju tillaga áheyrnarfulltrúa Flokks fólksins um dreifingu pappírspoka fyrir lífrænan úrgang, sbr. 47. lið fundargerðar borgarráðs frá 11. janúar 2024.

Samþykkt að vísa tillögunni frá með fjórum atkvæðum borgarráðsfulltrúa Samfylkingar, Framsóknar, Pírata og Viðreisnar gegn þremur atkvæðum borgarráðsfulltrúa Sjálfstæðisflokksins og Sósíalistaflokks Íslands. MSS24010108

Bókunin:

Tillaga fulltrúa Flokks fólksins um að beina því til stjórnar SORPU og þeirra sem annast sorphirðu í borginni að huga sérstaklega að eldra fólki og hreyfihömluðum, sem ekki geta nálgast poka fyrir lífrænan úrgang á endurvinnslustöðvum, er felld af meirihlutanum með mótatkvæðum allra atkvæðabærra minnihlutafulltrúa í borgarráði. Tillagan fer því til borgarstjórnar til frekari umræðu. Þessu fagnar fulltrúi Flokks fólksins. Þessi skerðing á þjónustu getur haft slæmar afleiðingar fyrir marga eldri borgara, hreyfihamlaða og þau sem ekki aka bíl eða þau sem vilja lifa bíllausum lífstíl. Flokkur fólksins leggur til að eldri borgarar og þeir sem ekki geta nálgast pokana á SORPU fái tækifæri til að panta pokana heim til sín eða að sorphirðufólk geti afhent þeim nýja poka t.d. á sama tíma og sorphirða á sér stað. Þetta fyrirkomulag, þ.e. að sorphirðufólk afhendi pappírspoka með reglulegu millibili er viðhaft í öðrum löndum. Meirihlutinn á að hugsa vel um eldra fólk og öryrkja en ekki haga málum þannig að meira sé lagt á það fólk en nauðsynlegt er. Hér er um skerðingu á þjónustu að ræða. Til að mæta þessum hópi sem hér um ræðir með þetta atriði er vel hægt að finna leiðir að mati fulltrúa Flokks fólksins. Þetta er allt spurning um vilja.

Borgarráðsfulltrúar Samfylkingar, Framsóknar, Pírata og Viðreisnar leggja fram svohljóðandi bókun:

Ný samræmd flokkun sorps á höfuðborgarsvæðinu hefur gengið vonum framar. Útdeiling bréfpoka fyrir lífrænan úrgang hefur verið langt umfram væntingar. SORPA hefur lýst því yfir að bæði verði hægt að fá poka endurgjaldslaust á endurvinnslustöðvum og gegn vægu gjaldi í verslunum. Þar sem verkefnið er á borði stjórnar SORPU og þar er unnið að því að útfæra framtíðarfyrirkomulag á dreifingu poka vísar meirihluti borgarráðs tillögunni frá.

Bókun Flokks fólksins undir liðnum: Lögð fram að nýju tillaga áheyrnarfulltrúa Flokks fólksins um innkaup á endurnýttum símum, sbr. 31. lið fundargerðar borgarráðs frá 17. ágúst 2023. Einnig lögð fram umsögn þjónustu- og nýsköpunarsviðs, dags. 11. janúar 2024.

Tillagan er felld.

Flokkur fólksins lagði til að einungis endurnýttir símar verði keyptir fyrir þá starfsmenn borgarinnar sem eiga rétt á símtæki. Raftækjasóun á Íslandi er gríðarleg og til að reyna að minnka þá sóun var þessi tillaga lögð fram. Flokkur fólksins vill leggja fram eftirfarandi ábendingar og athugasemd við svör sviðsstjóra þjónustu og nýsköpunarsviðs. Það ætti að vera hægt að beina því til innkaupaskrifstofu borgarinnar að hún fái tilboð í endurnýtta síma og þeir verði fyrsta val. Ef þeir eru ekki til þá megi kaupa aðra. Ein ástæða þess að tegundarval er ekki meira, er sú að fáir kaupa endurnýtta síma. Margt af því sem verið er að gera í umhverfismálum kostar og spurning er hvernig aðilar verðmeta hluti á móti umhverfisáhrifum eins og getið er hér í svari. Til staðar er virkt endurvinnslukerfi eins og Foxway. Viljum við endurnýta síma og lengja þannig líftíma síma og þar með fresta því að framleiddur sé nýr sími. Ekki er hægt að endurvinna 100% farsíma. Er betra í umhverfismálum að nota síma í 2-3 ár og endurvinna hann þá, eða nota hann í 4-6 ár og endurvinna þá? Nú er lag fyrir borgina að sýna hvort henni sé alvara með umhverfismálin.

Borgarráðsfulltrúar Samfylkingar, Framsóknar, Pírata og Viðreisnar leggja fram svohljóðandi bókun:

Ekki er ásættanlegt framboð af endurnýttum símum og tækjum til staðar á Íslandi eins og stendur en slíkur markaður væri forsenda þess að Reykjavíkurborg myndi íhuga tillöguna. Til staðar er þó virkt endurvinnslukerfi á notuðum raftækjum og víða er boðið upp á að skila inn gömlum tækjum til endurvinnslu. Reykjavíkurborg skilar öllum raftækjum sem ekki er hægt að nýta í slíka endurvinnslu. Flestar íslenskar verslanir sem selja snjallsíma eru samstarfsaðilar Foxway sem hýsir endurvinnslukerfi fyrir snjalltæki. Þar eru tækin ýmist yfirfarin, endurnýtt eða endurunnin. Þær aðferðir tryggja að þær auðlindir sem notaðar eru til framleiðslu raftækja séu nýttar eins og hægt er.

Lögð fram fundargerð stjórnar SORPU bs. frá 9. janúar 2024. MSS24010027
Áheyrnarfulltrúi Flokks fólksins leggur fram svohljóðandi bókun undir 3. lið fundargerðarinnar:

Stjórn SORPU ræðir gjaldskrárbreytingar SORPU sem tóku gildi um áramótin. Samkvæmt þeim er gert ráð fyrir að tekjur SORPU hækki um tæp 12% milli ára. Ástæða hækkunarinnar er fyrst og fremst bætt meðhöndlun úrgangs og með útflutningi á blönduðu rusli til orkuvinnslu. Einnig því að verulega verður dregið úr urðun í Álfsnesi. Gjaldskrárhækkanir eru viðkvæmt mál um þessar mundir. Í miðri umræðu meirihlutans um að halda aftur af gjaldskrárbreytingum til að leggja sitt af mörkum við að sporna gegn hækkun verðbólgu hefur SORPA hækkað sína gjaldskrá svo um munar. Þetta er auðvitað ekki ásættanlegt og mun fara eins og aðrar gjaldskrárhækkanir beint út í verðlagið. Sumt af nýja sorphirðukerfinu hefur gengið vel en annað ekki. Engu að síður er mikilvægt að setja allar gjaldskrárhækkanir sem mögulegt er á frest enda er það í þágu almannahags.

Bókun Flokks fólksins undir liðnum: Lögð fram fundargerð stjórnar Strætó bs. frá 15. desember 2023. MSS23010021

Fulltrúa Flokks fólksins finnst ánægjulegt að sjá í fundargerð Strætó bs. að verið sé að fjárfesta í nýjum vögnum en eins og vitað er eru margir vagnar Strætó orðnir gamlir og úr sér gengnir. Það kemur ekki fram hvenær er hugsanlegt að nýir vagnar komi í notkun en vonandi þurfum við ekki að bíða lengi eftir því. Hægt virðist ganga með að lagfæra Klappið sem er ætlað að hraða tíma við skönnun á farmiðum. Samkvæmt nýjustu tímaáætlun frá birginum FARA er gert ráð fyrir að snertilausar greiðslur verði tilbúnar á fyrsta ársfjórðungi 2024.

Bókun Flokks fólksins undir liðnum: Lögð fram fundargerð öldungaráðs frá 10. janúar 2024. MSS24010033. Áheyrnarfulltrúi Flokks fólksins leggur fram svohljóðandi bókun undir 3. lið fundargerðarinnar:

Öldungaráð óskar eftir upplýsingum um stuðningsþjónustu fyrir eldra fólk, upplýsingar um fjölda aðila sem eru eldri en 67 ára og uppfylla skilyrði fyrir stuðningsþjónustu, oft nefnt félagsleg liðveisla, vegna skertrar færni sem kann að hafa áhrif á athafnir daglegs lífs. Fulltrúi Flokks fólksins fagnar þessari fyrirspurn enda hefur flokkurinn verið með tillögur um sálfélagslegt úrræði fyrir fólk eldra en 67 til að sporna við leiða og einmanaleika. Í svari kemur fram að borgin veiti stuðning, áður kallað liðveisla. Í þessari fyrirspurn er ekki verið að spyrja um stuðning við athafnir daglegs lífs eins og Flokkur fólksins skilur þetta heldur félagslegan stuðning til að rjúfa félagslega einangrun. Slíkur stuðningur er ekki nægur því ekki gefst nægur tími til að sinna þeim þætti þegar veitt er önnur þjónusta samhliða á heimilinu. Félagslegi stuðningurinn verður afgangs eða útundan því þeir sem sinna þessum hluta hafa iðulega stífa dagskrá. Ekki komast allir á félagsmiðstöðvarnar og það er einmitt það fólk sem þarf að sinna betur sálfélagslega. Velferðartækni getur aldrei komið í staðinn fyrir samveru og samtal í návist manneskju þótt hún sé góð upp að vissu marki.

Lögð fram svohljóðandi fyrirspurn áheyrnarfulltrúa Flokks fólksins er varða þjónustu- og nýsköpunarsvið í tengslum við uppsagnir og fleira.

Þann 16. janúar sl. voru birtar fréttir af því að breytingar hefðu verið gerðar á 23 stöðugildum á þjónustu- og nýsköpunarsviði, 12 hafi verið sagt upp og 11 samningar ekki endurnýjaðir eða ekki ráðið í lausar stöður. 1. Stendur til að fara í frekari hagræðingu og/eða skipulagsbreytingar á þjónustu- og nýsköpunarsviði en kynnt hefur verið? 2. Hefur fleiri verið sagt upp til viðbótar við þessa 12? 3. Eru dæmi um fleiri tilvik þar sem samningar hafa ekki verið endurnýjaðir eða ekki ráðið í lausar stöður? 4. Hvert verður hlutverk sviðsstjóra nú þegar skrifstofa sviðsstjóra hefur verið lögð niður? Stendur til að leggja niður stafrænt ráð í tengslum við þessar skipulagsbreytingar?